އުތީމުގައި މީގެ ކުރިން ހުރި އިންޖީނުގެއަކީ، ރަށުގެ ރައްޔިތުންނާއި ކައިރި ހިސާބެއްގައި ހުރި އިންޖީނުގެއެއް ކަމުން، އެ ރަށުގެ ރައްޔިތުންނަށް އެތައް އުނދަގޫތަކެއް ވަނީ މީގެ ކުރިން ދިމާވެފަ އެވެ.
އުތީމުގައި މިއަދު ބޭއްވުނު ހާއްސަ ރަސްމިއްޔާތުގައި ފެނަކައިން އިމާރާތް ކުރި އުތީމުގެ އާ އިންޖީނުގެ ހުޅުވައި ދެއްވީ، ރައީސް އިބްރާހިމް މުހައްމަދު ސޯލިހު އެވެ.
މި ރަސްމިއްޔާތުގައި ވާހަކަފުޅު ދައްކަވަމުން އުތީމު ކައުންސިލްގެ ރައީސް، އަބްދުﷲ ރަޝީދު ވަނީ، ރައީސް ސޯލިހު އުތީމަށް ކޮށްދެއްވަމުން ގެންދަވާ މަސައްކަތަށް ހާއްސަ ޝުކުރުއް އަދާ ކުރައްވާފަ އެވެ. މީގެ އިތުރުން ފެނަކައިގެ އެމްޑީ އަހުމަދު ސައީދު އާއި ފެނަކައިގެ މުވައްޒަފުންނަށް ވަނީ ހާއްސަ ޝުކުރެއް އަދާ ކުރައްވާފަ އެވެ.
އުތީމުގައި އަލަށް ހުޅުވިގެން ދިޔަ މި އިންޖީނު ގެއަކީ، 478.89 އަކަފޫޓުގެ ބޮޑު އިންޖީނުގެ އެކެވެ. މީގެ ކުރިން އެރަށުގައި ހުރި އިންޖީނުގެ އަކީ، 130 އަކަފޫޓުގެ އިންޖީނުގެ އެކެވެ.
އަލަށް ހުޅުވިގެން ދިޔަ އިންޖީނުގޭގެ އޮފީހުގައި، މީޓިން ރޫމް، މެނޭޖާ ރޫމް، ރިސެޕްޝަން އެންޑް ލޮބީ، ޖެނެރަލް އޮފީސް، ރެސްޓް ރޫމް، ސްޓޯ ރޫމް، ޕޭންޓްރީ، ޓެކްނިކަލް ސްޓާފް ރޫމް ވަނީ އިމާރާތް ކޮށްފަ އެވެ.
މިވަގުތު އަލަށް އިމާރާތް ކުރެވުނު އިންޖީނުގޭގައި 1000 ކިލޯ ވޯޓުގެ ޖަނަރޭޓަރެއް ބެހެއްޓިފައި ވާއިރު، މި އިންޖީނުގޭގައި، 600 ކިލޯ ވޯޓުގެ ހަތަރު ޖެންސެޓް ބެހެއްޓޭގޮތަށް ވަނީ ތައްޔާރު ކުރެވިފަ އެވެ.
