ads
ކަޅުވަކަރު މިސްކިތް--
ކަޅުވަކަރު މިސްކިތް ރާވައި ނިންމާލައިފި
ކަޅުވަކަރު މިސްކިތް އަލުން ރޭވުމުގެ މަސައްކަތް ނިންމާލައިފި އެވެ.

ޗާންދަނީ މަގު ކުރީގެ ދިރާގު ހެޑް އޮފީސް ހުރި ސަރަހައްދުގައި ކަޅުވަކަރު މިސްކިތް އަލުން ރާވައި ނިންމާލާފައިވަނީ އިއްޔެ ކަމަށް ހެރިޓޭޖް މިނިސްޓްރީން ބުނެ އެވެ. ކަޅުވަކަރު މިސްކިތުގެ ވަޅު ވެސް އިއްޔެ ވަނީ އެތަނުގައި ބަހައްޓާފަ އެވެ. 

ކަޅުވަކަރު މިސްކިތަކީ ލަކުޑީގެ ރީތި މަސައްކަތްތަކާއި، ގަލުވަޑާމުގެ ކަވި މަސައްކަތްތަކާ އެކު ދިވެހިންގެ އަތްތެރިމަސައްކަތް ވަރަށް ރީތިކޮށް ދައްކުވައިދެ މިސްކިތެކެވެ.

ކަޅުވަކަރު މިސްކިތް އަލުން ބެހެއްޓިއިރު މިސްކިތުގެ ހިރިގަލުގެ ބްލޮކްތަކަށް ކޮންމެވެސް ވަރަކަށް ގެއްލުންތަކެއް ލިބިފައިވާތީ އެފަދަ ބްލޮކްތައް ހެރިޓޭޖް މިނިސްޓްރީން ވަނީ ބޭނުންކުރެވޭ ގޮތަށް ހަދާފަ އެވެ.

ކަޅުވަކަރު މިސްކިތުގެ ހިރިގަލުގެ ބަޔަކީ ހިރިގަލުގެ ބްލޮކްތަކަކުން ރާވާލާ ގޮތަށް ހަދާފައިވާ ބަޔަކަށް ވާތީ ހިރިގަލުގެ ބައިގެ މަސައްކަތްތައް ނިމުމާ އެކު މިސްކިތުގެ ހައިބަތު މިހާރުވެސް ވަނީ ފެންނަން ފަށާފަ އެވެ.

ކަޅުވަކަރު މިސްކިތް އަލުން ރޭވުމަށް ކުރަންޖެހޭ މަސައްކަތުގެ މައިގަނޑު މަސައްކަތްތައް ނިމިފައިވީ ނަމަވެސް މިސްކިތް ހުރި ސަރަހައްދު އާންމުންނަށް ހުޅުވާލާނެ ވަކި ދުވަހެއް ހެރިޓޭޖު މިނިސްޓްރީން އަދި ހާމަކޮށްފައެއް ނުވެ އެވެ.

ކަޅުވަކަރު މިސްކިތް އަލުން ހެރިޓޭޖް ސައިޓެއްގެ ގޮތުގައި ބޭނުންކުރަން ނިންމާފައިވީ ނަމަވެސް މިމިސްކިތުގައި ނަމާދު ކުރެވޭނެ ކަމަށްވެސް ހެރިޓޭޖް މިނިސްޓްރީން ވަނީ ބުނެފަ އެވެ.

ކަޅުވަކަރު މިސްކިތް ބިނާކުރައްވަން ފެއްޓެވީ އައްސުލްޠާން މުޙައްމަދު ޝަމްސުއްދީން (ދެވަނަ)ގެ ރަސްކަމުގައެވެ. ޣިޔާސުއްދީން ރަދުންގެ ގަނޑުވަރު ކުރިން ހުރި ބިމުގައި އެ ގަނޑުވަރު ރޫޅާލުމަށްފަހު ކަޅުވަކަރު މިސްކިތް ބިނާކުރަން ފެށީ ޝަމްސުއްދީން ރަދުން ނަދުރުފުޅެއް ވިދާޅުވެފައިވާތީ ކަމަށް ތާރީހީ ލިޔުންތަކުގައިވެ އެވެ.

މި މިސްކިތް ބިނާކޮށް ނިމި ބޭނުންކުރަން ފަށާފައިވަނީ ޝަމްސުއްދީން ރަދުންގެ ދެބެއިންގެ ދެދަރި ކޮއްކޯފުޅު އައްސުލްޠާން ހަސަން ނޫރައްދީން އިސްކަންދަރު ކައްތިރި ބަވަނަ މަހާރަދުންގެ ރަސްކަމުގެ 10 ވަނަ އަހަރުގެ ތެރޭގަ އެވެ. ތާރީޚީ ލިޔުންތަކުން އެނގޭ ގޮތުގައި ކަޅުވަކަރު މިސްކިތް ބިނާކުރަން ފެށި ތާރީޚުން ފެށިގެން މިސްކިތުގެ މަސައްކަތް ނިންމާ ބޭނުންކުރަން ފެށި ތާރީޚަށް ތިން ރަސްކަލެއްގެ ރަސްކަން ހިނގާފައިވެ އެވެ.

ކުރީގެ ރައީސް އަބްދުﷲ ޔާމީނުގެ ސަރުކާރުގައި ސަލްޓަން ޕާކް ތަރައްގީކުރުމަށް އެތަނުގައި އޭރު ހުރި ކަޅުވަކަރު މިސްކިިތް ނަގާފައިވަނީ 2016 ވަނަ އަހަރުގެ ތެރޭގަ އެވެ. އަދި އެ މިސްކިތް ހުރި ތަނުގައި ވަނީ ވިންޓާ ޕާކެއް ހަދާފަ އެވެ. ކަޅުވަކަރު މިސްކިތަކީ ރާއްޖެގެ ތާރީހާއި ސަގާފަތާ ގުޅިފައިވާ ތަނަކަށްވުމުން 200 އަހަރުވީ އެ މިސްކިތް އަލުން ރޭވުމަކީ ރައީސް އިބްރާހީމް މުހައްމަދު ސޯލިހް ރިޔާސީ ވައުދުތަކުގެ ތެރޭގައި ވެސް ހިމެނޭ ވައުދެކެވެ. 

75%
ކަމުގޮސްފި
0%
އަޑުއެހިތާ މިހުރީ
25%
ސަތޭކައަކުން ސުމެއް
0%
ވަރަށް ސަލާމް
ކޮމެންޓްސް