ސުޕްރީމް ކޯޓުގެ ފަނޑިޔާރު އަދި، ދިވެހި ފަނޑިޔާރުންގެ ޖަމިއްޔާގެ ރައީސް ހުއްނުއްސޫދު، ގާނޫނީ ފަންނުގެ ދާއިރާގެ ގާނޫނަށް މިހާރު ހުށަހަޅާފައިވާ އިސްލާހަށް ދެކޮޅު ހެއްދެވީ ރައްޔިތުންގެ މަޖިލީހުގެ ޖުޑިޝަރީ ކޮމިޓީގައި އެ އިސްލާހާ ގުޅޭ ގޮތުން ދެއްކެވި ވާހަކަފުޅުގައެވެ.
ބަންޑާރަ ނާއިބު ޑްރާފްޓް ކުރައްވާ ދިއްގަރު ދާއިރާގެ އެމްޑީޕީގެ މެމްބަރު އިކްރާމް ހަސަން މިހާރު މަޖިލީހަށް ހުށަހެޅި ދިރާސާ ކުރުމުގެ މަރުހަލާގައިވާ ގާނޫނީ ފަންނުގެ ދާއިރާގެ ގާނޫނަށް ހުށަހަޅާފައިވާ އިސްލާހުގައި ބުނެފައިވަނީ ފަނޑިޔާރަކު ކުރައްވާ އެކަށީގެން ނުވާ އަމަލެއްގެ ސަބަބުން މަޖިލީހުން ފަނޑިޔާރަކު ވަކި ކުރަން ނިންމައިފި ނަމަ، ނުވަތަ އޭނާގެ މައްސަލަ މަޖިލީހުގައި އޮއްވައި އިސްތިއުފާ ދެއްވައިފި ނަމަ އޭނާގެ ގާނޫނީ ވަކީލުކަމުގެ ހުއްދަ ބާތިލުވާނެ ކަމަށެވެ. އެއަށް ފަހު އަލުން އެ ބޭފުޅަކަށް ވަކީލުކަން ކުރެވޭނީ ވަކި ކުރިތާ ފަސް އަހަރު ފަހުން އަލުން ހުއްދައަށް އެދި ހުއްދަ ހޯދައިގެން ކަމަށްވެސް މި އިސްލާހުގައި ބުނެފައިވެއެވެ.
