މި އަންހެން މީހާ އަކީ، ވިހަން ބަނޑުގައި ރިއްސުމާއި، ގުޅިގެން ރޭގެ ވަގުތެއްގައި އެ ހޮސްޕިޓަލަށް ގެންދިޔަ އަންހެނެކެވެ. އޭނާ ހޮސްޕިޓަލަށް ގެންދިޔައީ، ރޭ 22:00 ހާއިރު ކަމަށް ވަނީ މައުލޫމާތު ލިބިފަ އެވެ.
މި ކަމާއި ގުޅުގެން "ސީއެންމް" އަށް މައުލޫމާތު ދިން އަންހެން މީހާގެ އާއިލާ މީހަކު ބުނީ، އަންހެން މީހާ ވިހަން ބަނޑުގައި ރިއްސައިގަތުމުން ހޮސްޕިޓަލަށް ގެންދިޔަ ފަހުން ފުރަތަމަ އަންހެން މީހާ ބެލި ޑޮކްޓަރުންނާއި، ނަރުހުންގެ ޑިއުޓީ ބަދަލުވި ކަމަށެވެ. އަދި އޭގެ ފަހުން އަންހެން މީހާ އަށް ހޮސްޕިޓަލުން މާ ބޮޑު ސަމާލުކަމެއް ދީފައި ނުވާ ކަމަށް ވަނީ ބުނެފަ އެވެ.
އޭނާ އިތުރަށް ބުނީ، އެހެން ރިހުން އަރައިގަނެގެން އޮއްވާ އެންމެ ފަހުން ވޯޑަށް އަންހެން މީހާ ވިހެއީ ކަމަށާއި، ވިހެއީ އެއްވެސް ސިއްހީ ހިދުމަތްތެރިއެއްގެ އެހީތެރިކަން ނުލިބި އެކަނި ކަމަށެވެ. އަދި މިއީ ހޮސްޕިޓަލުގެ ފަރުވާ ކުޑަކަމުން ދިމާވި ކަމެއް ކަމަށްވެސް އޭނާ ވަނީ ބުނެފަ އެވެ.
މިކަމާއި ގުޅިގެން ސީއެންއެމް އާއި ވާހަކަ ދައްކަމުން، ހޮސްޕިޓަލުގެ ކަސްޓަމާ ރިލޭޝަންސް އޮފިސަރު ސާލިމް އަލީ ވިދާޅުވީ، އެފަދަ ކަމެއް ހިނގައިގެން އުޅޭ ކަމަށާއި، އެކަމާއި ގުޅިގެން ބަލަންޖެހޭ ކަންކަން ބަލަމުން އަންނަ ކަމަށެވެ. އަދި އެކަން ފަހުން ހިއްސާ ކުރައްވާނެ ކަމަށްވެސް ސާލިމް ވިދާޅުވި އެވެ.
ތިނަދޫ ހޮސްޕިޓަލުގެ ވޯޑެއްގައި އެކަނި އޮވެ އަންހެނެއް ވިހާފައި ވާއިރު، މީގެ ކުރިންވެސް އެ ހޮސްޕިޓަލުގެ ހޭނައްތާ ޑޮކްޓަރު ޗުއްޓީ އަށް ދާން ޖެހުމުން ކުރީބައިގައި ސިޒޭރިއަން ހަދަން ޖެހުނު މައްސަލައެއް ވެސް ވަނީ ކުރިން ފެންމަތިވެފަ އެވެ.
