މާއުނގޫދޫ ބައި އިލެކްޝަންގައި އެމްޑީޕީގެ ފަރާތުން ވާދަ ކުރި، ކެންޑިޑޭޓް ފާތިމަތު ޝިމާނާ އަށް ވަނީ، 359 ވޯޓު ލިބިފަ އެވެ. ޝިމާނާ އާއި ވާދަ ކުރި ޕީޕީއެމްގެ ކެނޑިޑޭޓް މުހައްމަދު އިބްރާހިމް ވަހީދަށް ލިބުނީ، 281 ވޯޓެވެ.
މި ބައި އިލެކްޝަންގައި ވޯޓު ލުމުގެ ހައްގު ލިބިފައިވާ މީހުންގެ ތެރެއިން 80 އިންސައްތަ މީހުން ވޯޓު ލުމުގައި ބައިވެރިވެފައި ވާކަމަށް އިލެކްޝަންސް ކޮމިޝަނުން ވަނީ ބުނެފަ އެވެ.
މާއުނގޫދޫ ކައުންސިލްގެ ބައި އިލެކްޝަން ބޭއްވީ، އެ ކައުންސިލުގެ މެންބަރެއްގެ ގޮތުގައި ހުންނެވި އެމްޑީޕީގެ މުސްތަފާ އަބްދުލްގައްޔޫމް އެ މަގާމުން އިސްތިއުފާ ދިނުމާއި ގުޅިގެންނެވެ.
މާއުނގޫދޫގެ ހުސްވެފައިވާ ކައުންސިލްގެ ގޮނޑި ޝިމާނާ ކާމިޔާބު ކުރުމާއި އެކު އެ ކައުންސިލްގެ މެޖޯރިޓީ ވަނީ އަންހެނުންނަށް ލިބިފަ އެވެ. އެ ކައުންސިލްގައި ތިބެނީ، ޝިމާނާ އާއި އެކު އެމްޑީޕީ އަށް ނިސްބަތްވާ ދެ އަންހެން ކަނބަލުންނެވެ. ދެން އެކައުންސިލްގެ މެމްބަރުންގެ ގޮތުގައި ތިބެނީ، ޕީޕީއެމްގެ ދެ މެމްބަރުންނެވެ.
މީގެ އިތުރުން މިއަދު ވަނީ، ތ. ގުރައިދޫ، ލ. ދަނބިދޫ އަދި ރ. ރަސްމާދޫގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ ބައި އިލެކްޝަން ވެސް ބާއްވާފަ އެވެ. އެ ބައި އިލެކްޝަން ތަކުގެ ތެރެއިން ތ. ގުރައިދޫގެ ގޮނޑި ޕީޕީއެމްގެ ކެނޑިޑޭޓް ޝަރުމާ ވަނީ ކާމިޔާބު ކޮށްފަ އެވެ. ރ. ރަސްމާދޫގެ ގޮނޑިވެސް ޕީޕީއެމްގެ ކެނޑިޑޭޓް ސާބިރާ މުހައްމަދު ކާމިޔާބު ކޮށްފައި ވާއިރު، ލ. ދަނބިދޫގެ ގޮނޑި ކާމިޔާބު ކުރީ، އެމްޑީޕީގެ ކެނޑިޑޭޓް އައިޝަތު ޒިޔާދާ އެވެ.
