ހައިކޯޓުގެ ކޯޓު ޝެޑިއުލްގައިވާ ގޮތުން ހުނޭސާގެ މައްސަލައިގެ ހުކުމް ކުރުން އޮތީ މިއަދު މެންދުރުއެވެ. ހުނޭސާއާ ދެކޮޅަށް ދައުލަތުން ކުރާ މަސްތުވާތަކެތީގެ މައްސަލައިގެ ޝަރީއަތެއް ކުރިމިނަލް ކޯޓުގައިވެސް މިއަދު އޮންނާނެއެވެ.
ހައިކޯޓުގައި މިހާރު ހިނގަމުންދާ މައްސަލައަކީ ޑްރަގް ޓްރެފިކިންގެ މައްސަލައިގައި ހައްޔަރުކޮށްފައި ހުއްޓާ ދޫކޮށްލި ޓިކްޓޮކް ތަރި ހުނޭސާ އާދަމް ދޫކޮށްލަން ކްރިމިނަލް ކޯޓުން ނިންމި ނިންމުން ހައިކޯޓުން ބާތިލުކޮށް، އޭނާ ބަންދު ކުރުމާ މެދު އަނެއް ކްރިމިނަލް ކޯޓުން އަލުން ގޮތެއް ކަނޑައެޅުމަށް އަމުރު ކުރުމުންވެސް އޭނާ ބަންދުކޮށް ނުދީގެން ޕީޖީން އަނެއްކާވެސް ހައިކޯޓަށް ހުށަހެޅި މައްސަލައެވެ. މި މައްސަލައިގެ އަޑު އެހުންތައް ހައިކޯޓުންވަނީ މިދިޔަ ހަފްތާގައި ނިންމާލާފައެވެ.
މަސްތުވާތަކެތީގެ މައްސަލަތަކެއްގައި ދައުވާ އުފުލާފައިވާ ހުނޭސާ އާދަމް ނަސީރު (ހުނޫ) ޝަރުތުތަކާއެކު ބަންދުން ދޫކޮށްލާފައިވަނީ މިދިޔަ ޖުލައި މަހުގެ ފަންސަވީސްވަނަ ދުވަހުއެވެ. އޭނާ ދޫކޮށްލުމާއި އެކު ދައުލަތުން އެ މައްސަލަ ހައިކޯޓުގައި އިސްތިއުނާފު ކުރިއެވެ. އެ މައްސަލަ ދައުލަތުން ހައިކޯޓުގައި އިސްތިއުނާފު ކުރުމުން ހައިކޯޓުން އެ މައްސަލަ ބެލި ފަނޑިޔާރުންގެ އިއްތިފާގުން މިދިޔަ އޮގަސްޓް މަހު ނިންމާފައިވަނީ ހުނޫ ދޫކޮށްލަން ކްރިމިނަލް ކޯޓުން ނެރުނު އަމުރު ބާތިލުކޮށްފައެވެ.
މައުލޫމާތު ލިބިފައިވާ ގޮތުގައި ހުނޫގެ މައްޗަށް ޑައިމޯފިން ޓްރެފިކްކުރުމުގެ ކުށުގެ ދައުވާ އާއި ކެނެބިސް ޓްރެފިކްކުރުން އަދި މަސްތުވާ އެއްޗެއް ޓްރެފިކްކުރުމުގެ ދައުވާކޮށްފައިވެ އެވެ. ދައުލަތުން ހުނެއިޝާގެ މައްޗަށް މި ދައުވާތައް އުފުލާފައިވަނީ މިދިޔަ މާޗް މަހުގެ 28 ވަނަ ދުވަހު އޭނާ އާއި އިތުރު ފިރިހެނަކާއި ދެމީހުންތިބި މާލޭގެ ގެއަކުން ގިނަ އަދަދެއްގެ މަސްތުވާތަކެތި ފެނުނު މައްސަލައަކާއި ގުޅިގެންނެވެ. މި މައްސަލަ އާއި ގުޅިގެން ހުނެއިޝާ އާއި އެކު އެގޭގައި ދެން އިން ފިރިހެން މީހާގެ މައްޗަށްވެސް ވަނީ މިފަދަ ދައުވާތަކެއް ކޮށްފަ އެވެ.
މަސްތުވާތަކެތީގެ ގާނޫނުގައި ބުނެފައިވާގޮތުން ޑައިމޯފިން ޓްރެފިކް ކުރުމާއި، ކެނަބިސް ޓްރެފިކް ކުރުމަކި ބޮޑެތި އަދަބުތައް ލިބޭ ކުށެކެވެ. ހިނގަމުންދާ މައްސަލަތައް ހުނޭގެ މައްޗަށް ސާބިތުވެއްޖެނަމަ އޭނާ އުމުރަށް ޖަލަށްލުމަކީ އެކަށީގެންވާކަމެކެވެ.
