އެ އިދާރާއިން މިއަދު ނެރެފައިވާ ބަޔާނެއްގައި ބުނެފައިވަނި، ރާއްޖޭގެ ހުރިހާ ސަރަހައްދެއްގައި ބޯ ހިމެނުމުގެ މަސައްކަތް މިހާރު ނިމިފައި ވާކަމަށާއި، އެހެން ނަމަވެސް މާލެ ސަރަހައްދުގައި 900 އަށްވުރެ ގިނަ ތަނަށް މިހާތަނަށް ވަދެވިފައިނުވާތީ، އެ ތަންތަނުން މީހުންނާ ގުޅޭތޯ މަސައްކަތް ކުރަމުން އަންނަ ކަމަށެވެ.
އެ ތަންތަނަށް ވަދެވިފައި ނުވަނީ، ބައެއް ތަންތަން ތަޅުލާފައި ހުރުމުންނާއި، ގުޅޭނެ ގޮތެއް ނުވުމުންނާއި، މައުލޫމާތު ދޭނެ މީހަކާއި ދިމާނުވުމާއި، ރަށުން ބޭރުގައި އުޅުމާއި، މައުލޫމާތު ދިނުމަށް އެޕޮއިންޓްމަންޓު ދިން ނަމަވެސް އެ ގަޑިއަށް ޓީމުތަކަށް ނުދެވުމުން ކަމަށް އެ އިދާރާއިން ވަނީ ބުނެފަ އެވެ.
އަދި ނުވަދެވޭ ތަންތަނުގެ ތެރޭގައި ބޭނުންނުކުރާ ތަންތަނާއި ބަޔަކު ދިރިނޫޅޭ ތަންތަން ހުރުމަކީ އެކަށީގެންވާ ކަމެއް ކަމަށް އެ އިދާރާއިން ބުނެފައިވެއެވެ.
އެ އިދާރާއިން ނެރެފައިވާ ބަޔާނުގައި އިތުރަށް ބުނެފައިވަނީ، ބޯހިމެނުމުގެ މައުލޫމާތު ނުދެވި ތިބި ފަރާތްތަކުން އެ ބިއުރޯގެ ހޮޓްލައިން ނަންބަރު 1423 އަށް ގުޅުއްވާ މައުލޫމާތު ހިއްސާ ކުރުމަށް އެދޭ ކަމަށާއި، ނުވަތަ އެ އިދާރާގެ ވެބްސައިޓްގައިވާ ފޯމު މެދުވެރިކޮށް އެކަން އެންގުމަށް އިލްތިމާސް ކުރާ ކަމަށެވެ.
ބޯހިމެނުމުގެ ދާއިމީ ނަތީޖާ ނެރުމަށް ހަމަޖެހިފައިވަނީ މި މަހުގެ 20 ވަނަ ދުވަހުގެ ކަމަށް ބިއުރޯ އޮފް ސްޓެޓިސްޓިކްސްއިން ވަނީ ބުނެފަ އެވެ.
