އޭޝިއަން ކަޕް ކޮލިފައިންގައި ދިވެހި ޓީމުން ކުޅުން ފަހު މެޗު ކުޅުނީ މިދިޔަ މަހުގެ 18 ވަނަ ދުވަހު އެވެ. އެ މެޗަށްފަހު ޓީމު އެނބުރި މާލެ އައުމަށް 20 ވަނަ ދުވަހު، ފުރަން އެއަޕޯޓަށް ދިޔަނަމަވެސް ޓިކެޓްގެ ކަންތައް ހަމަ ޖެހިފައި ނެތުމުން ގިނަ ކުޅުންތެރިންނާއި އޮފިޝަލުންނަށް ފުރޭ ގޮތް ނުވި ކަމުގެ ކަންބޮޑުވުން އެޓީމުގެ ބައެއް މެމްބަރުން ވަނީ މީގެ ކުރިން ފާޅުކޮށްފަ އެވެ.
ސައުދީއަށް ދިޔަ ދިވެހި ޓީމަށް އިޝާރާތްކުރައްވާ މިނިސްޓަރު މަހްލޫފް މިއަދުގެ މަޖިލީހުގައި ވިދާޅުވީ، ސައުދީން ރާއްޖެކޮޅަށް 11 ގޯލު ޖެހިކަމަށާއި، ރަނގަޅަށް ތައްޔާރުވެގެން ނޫންގޮތަށް ދާ އެފަދަ ޓީމުތަކަށް ހަރަދުކުރުމަށްވުރެ ރާއްޖޭގެ ރަށަކަށް އެ ފައިސާ ހަރަދުކުރުންވެސް މާ ރަނގަޅު ކަމަށެވެ.
މިނިސްޓަރު ވިދާޅުވީ، ރަނގަޅަށް ތައްޔާރުވެގެން ނޫންގޮތަކަށް ރާއްޖޭން ބޭރަށް އެއްވެސް ޓީމެއް ނުފޮނުވަން އޮންނާނީ ސާފުކޮށް ނިންމާފައި ކަމަށާއި، ސައުދީއަށް ދިޔަ ޓީމު ފޮނުވީވެސް އެ މިނިސްޓްރީން ނޫންކަމަށެވެ.
ބައެއް ކްލަބުތަކަށް މުސާރަ ނުދުނިމުގެ މައްސަލަތަކާއި، އެވާހަކަތައް ދައްކާ ކުޅުންތެރިން ސަސްޕެންޑުކުރުމުގެ މައްސަލަތަކާއި، ބޭރު ކުޅުންތެރިންނާއި ކޯޗުންނަށް މުސާރަ ނުދީގެން ބަނޑުހައި ހޫނުކަމުގެ ހަޅުތާލު ވެސް ކުރާ މައްސަލަތައް ފާހަގަކޮށް މަޖިލީހުގައި މިއަދު ހުޅުދޫ ދާއިރާގެ މެމްބަރު އިލިޔާސް ލަބީބު ވަނީ ސުވާލުކުރައްވާފަ އެވެ.
އެކަމަށް ހައްލު ހޯދުމަށް މިނިސްޓްރީން މަސައްކަތް ކުރަމުންދޭތޯ ސުވާލުކުރުމުން މިނިސްޓަރު މަހްލޫފް ވިދާޅުވީ، މިހާރު އެމަނިކުފާނު ހުންނެވީ ”ދެން ވާގޮތް ބަލަން“ ކަމަށެވެ.
އެފްއޭއެމްގެ ރައީސް އަކު ހޮވަނީ ކްލަބުތަކުން ކަމަށްވާއިރު، ކްލަބުތަކުން މިއަދު ބޭނުންވިޔަސް އެފްއޭއެމް ބަދަލުކުރެވިދާނެ ކަމަށް މިނިސްޓަރު ވިދާޅުވި އެވެ. ބަނޑުހައި ހޫނުކަމުގެ ހަޅުތާލާއި ކުޅުންތެރިންގެ ގިނަ ޝަކުވާތަކެއް ހުރިނަމަވެސް، އެކަމަށް ހައްލެއް ގެންނަން ކްލަބުތަކުން މަސައްކަތް ކުރާތަން ނުފެންނަ ކަމަށް ވިދާޅުވި އެވެ.
މިނިސްޓަރު ވިދާޅުވީ، އެކަމުގައި އިންތިހާއަށް ކަންބޮޑުވާ ކަންކަން އެބަހުރި ކަމަށާއި، އެ ހުރިހާ ކަންބޮޑުވުމެއް އެމަނިކުފާނުގެ ވެސް އެބައޮތްކަމަށެވެ. އަދި، އަންނަ ހަފްތާގައި އެފްއޭއެމް އާއިއެކު ވަކިން ބައްދަލުކޮށް ސީރިއަސް މަޝްވަރާތަކެއް ކުރާނެ ކަމަށް މިނިސްޓަރު ވިދާޅުވި އެވެ.
