ރައްޔިތުންގެ މަޖިލީހުގައި އިއްޔެ އޮތް ސުވާލުކުރުމުގެ ސެޝަނުގައި މެމްބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު މަހުލޫފް ވަނީ، ރިސޯޓުތަކުގައި ބަރާބަރަށް ރާ ބޮއި އެހެން ހުރިހާ ސަކަރާތެއްވެސް ޖަހާއިރު، ކެސިނޯގެ ނަންގަންނަ އިރަށް ގޯސްވާ ކަމަށް ވިދާޅުވެފަ އެވެ.
އަދި އެކަންކަމުގައި މަޝްވަރާ ކުރުމުގެ އުސޫލު ގެންގުޅެންޖެހޭ ކަމަށް މިނިސްޓަރު މަހުލޫފް ވަނީ ވިދާޅުވެފަ އެވެ.
މިނިސްޓަރުގެ ވާހަކައަށް އެތައް ބައެއްގެ ފާޑުކިޔުން އަމާޒުވެފައި ވާއިރު، ރާއްޖޭގެ ބައެއް ދީނީ އިލްމުވެރިންވެސް ވަނީ، މަހުލޫފް ދެއްކި ވާހަކައަށް އެބޭފުޅާ ތައުބާވާން ޖެހޭނެ ކަމަށް ވިދާޅުވެފަ އެވެ. އަދި ބައެއް ބޭފުޅުން ވަނީ، ވަޒީރުންނާއި އެނޫންވެސް އެފެންވަރުގެ ބޭފުޅުން މަގާމާއި ހަވާލުވާއިރު، ކުރާ ހުވާގައި އިސްލާމްދީނަށް ހުރުމަތްތެރިކޮށްހިތަން އޮންނަ ކަމަށާއި، އެހެންކަމަށް ވީއިރު ކެސިނޯ ފަދަ ހަރާމްކަމެއް ތައާރަފްކުރަން ގޮވާލައްވައިފި ބޭފުޅަކު ހުވަޔާއި ހިލާފުވިކަމުގެ ކައްފާރާ ދައްކަންޖެހޭނެ ކަމަށް ވިދާޅުވެފަ އެވެ.
އެތައް ބައެއްގެ ފާޑުކިޔުން މިކަމާއި ގުޅިގެން މިނިސްޓަރު މަހުލޫފަށް އަމާޒުވެފައި ވަނިކޮށް މިނިސްޓަރު މިއަދުގެ ވަގުތެއްގައި ކުރެއްވި ޓުވީޓެއްގައި ވިދާޅުވީ، އެބޭފުޅާއަކީ، ކެސީނޯ އަޅަން ތާއީދު ކުރާ މީހެއް ނޫން ކަމަށާއި، އަދި އެކަމަށް ވަކާލާތު ކުރާ މީހެއްވެސް ނޫން ކަމަށް ވިދާޅުވެފަ އެވެ. އަދި އިއްޔެ ދެއްކުނު ވާހަކައައިން އޮޅުން އަރާފައިވާތީ އެކަމަށް މާފަށް އެދޭ ކަމަށް މިނިސްޓަރު ވިދާޅުވި އެވެ.
ރައްޔިތުންގެ މަޖިލީހުގެ ތަޅުމުގައި އިއްޔެ ވާހަކަފުޅު ދައްކަވަމުން މިނިސްޓަރު މަހުލޫފް ވަނީ، ހިޔާލުތަފާތުވުންތައް އޮތް މިންވަރުން ދަރިން އެސުވާލުކުރުމުން ދޭނެ ޖަވާބެއްވެސް ނޭނގޭ ހިސާބަށް ގޮސްފައިވާ ކަމަށާއި، ރަނގަޅާއި ނުބައިވެސް ބުނެދޭން ދަތިވާ ކަމަށް ވިދާޅުވެފަ އެވެ.
އަދި، ދީނީ ގޮތުން ހިލާފު އުފެދިފައިވާ ކަންކަމުގައި ވާހަކަދައްކައިގެން ގޮތްތަކެއް ހޯދަން ރާއްޖޭގައި ދަސްކުރަން ޖެހޭ ކަމަށާއި، އެއްކޮށް ގުޅިގެން އުޅެވޭނެ ގޮތަކަށާއި، އެހެން ގައުމުތަކުގައި އުޅޭހެން އުޅެން ދަސްކުރަން ޖެހޭ ކަމަށް ވިދާޅުވި އެވެ.
