ބަހްރައިންގެ ރަސްގެފާނު ހަމަދު ބިން އީސާ އަލް ހަލީފާގެ ދައުވަތަކަށް ރައީސްގެ ދެކަނބަލުން ކުރައްވާ މި ދަތުރުފުޅުގައި ސަރުކާރުގެ އިސް އޮފިޝަލުންގެވަފުދެއް ބައިވެރިވެވަޑައިގަންނަވަ އެވެ.
މި ދަތުރުފުޅައި ގުޅޭ ގޮތުން ރައީސް އޮފީހުން ބުނީ، މި ދަތުރުފުޅުގައި ރައީސް ސޯލިހު، ބަހްރައިންގެ ރަސްގެފާނު ބައްދަލުކުރައްވައި ދެ ގައުމުގެ ދެމެދު އޮންނަ ގުޅުން އިތުރަށް ބަދަހިކުރެއްވުމާ ގުޅޭގޮތުން ވާހަކަފުޅު ދައްކަވާނެ ކަމަށާއި، ބަހްރައިން ސަރުކާރުގެ އެހެން ބައެއް އިއްޒަތްތެރިންނާވެސް ބައްދަލުކުރައްވާނެ ކަމަށެވެ.
އަދި މި ދަތުރުފުޅުގެ ތެރެއިން ދެގައުމުގެ ދެމެދު އެކި ދާއިރާތަކުން ގުޅުންބަދަހި ކުރުމާއި ގުޅޭ ގޮތުން މަޝްވަރާ ކުރައްވާ، ދެގައުމުގެ ދެމެދު ބައެއް އެއްބަސްވުންތައް ބަދަލު ކުރުމަށް ހަމަޖެހިފައި ވާކަމަށްވެސް ރައީސް އޮފީހުން ވަނީ ބުނެފަ އެވެ.
ބަހްރައިން އަށް ކުރައްވާ މި ދަތުރުފުޅު ނިންމަވާލެއްވުމަށްފަހު ރައީސް އެނބުރި ރާއްޖެ ވަޑައިގަތުމަށް ހަމަޖެހިފައިވަނީ، މިމަހުގެ އަށް ވަނަ ދުވަހު އެވެ.
