ވެލާނާ އިންޓަރނޭޝަނަލް އެއާޕޯޓު 35 އަހަރަށް ޖީއެމްއާރަށް ކުއްޔަށް ދިނީ ކުރީގެ ރައީސް މުހައްމަދު ނަޝީދުގެ ވެރިކަމުގަ އެވެ. އެހެން ނަމަވެސް ދައުލަތަށް ގެއްލުންވާ ގޮތަށް ވި އެއްބަސްވުމެއް ކަމަށްބުނެ ކުރީގެ ރައީސް މުހައްމަދު ވަހީދުގެ ސަރުކާރުން އެއްބަސްވުން ވަނީ ބާތިލް ކޮށްފަ އެވެ.
ޖީއެމްއާރުގެ އެއްބަސްވުން ބާތިލްކުރި މައްސަލައިގައި އެ ކުންފުންޏަށް 271 މިލިއަން ޑޮލަރު ދައުލަތުން ދޭން ޖެހޭނެ ކަމަށް ސިންގަޕޫރުގެ އާބިޓްރޭޝަނުން ނިންމުމާއި ގުޅިގެން ރައީސް ޔާމީންގެ ވެރިކަމުގައި އެ ފައިސާ ވަނީ ދައްކައި ހަލާސްކޮށްފަ އެވެ.
ރޭ އިދިކޮޅު ކޯލިޝަނުން ބޭއްވި ޖަލްސާއެއްގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ، ރައީސް ނަޝީދުގެ ވެރިކަމުގައި ޕީޕީއެމް އަށް ޖެހުނީ، ޖީއެމްއާރް އަށް އެއާޕޯޓް ދިނުމާއި ދެކޮޅަށް މަސައްކަތް ކުރަން ކަމަށާއި، އޭގެ ފަހުން ރައީސް ވަހީދުގެ ވެރިކަމުގައި ޖެހުނީ، ޖީއެމްއާރު އަތުން އެއާޕޯޓް އަތުލުމުގެ ކަންކަން ކުރަން ކަމަށެވެ. އަދި ރައީސް ނަޝީދުގެ ވެރިކަމުގައި ޖީއެމްއާރު އަށް އެއާޕޯޓް ދިނުމަށް ދެކޮޅު ހެދި ބައެއް ސިޔާސީ ލީޑަރުން، ރައީސް ވަހީދުގެ ވެރިކަމުގައި ޖީއެމްއާރު އަތުން އެއާޕޯޓް އަތުލާ އެއްބަސްވުން އުވާލުމަށް ދެކޮޅު ހެއްދެވި ކަމަށްވެސް ރައީސް ޔާމީން ވިދާޅުވި އެވެ.
ރައީސް ޔާމީންގެ ވާހަކަފުޅުގައި އިތުރަށް ވިދާޅުވީ، ޖީއެމްއާރްއަށް އެއާޕޯޓް ހިންގަން ދިން އެއްބަސްވުން ބާތިލް ކުރުމަށް ސިޔާސީ ލީޑަރުން ދެކޮޅު ހެދީ، ރައީސް ނަޝީދުގެ ވެރިކަން ނިމި، ރައީސް ކަމަށް ޑރ. ވަހީދު އައްޔަންވި ފަހުން ކަމަށާއި، ހިޔާލުބަދަލުނުވެ ތިއްބެވީ ހަމައެކަނި ޑރ. ހަސަން ސައީދު އާއި އެމަނިކުފާނާއި އެކަނި ކަމަށެވެ.
މީގެ އިތުރުން ރައީސް ޔާމީން ވިދާޅުވީ، އަދާލަތު ޕާޓީގެ ރައީސް އިމްރާން، ޖީއެމްއާރު އަށް އެއާޕޯޓް ދިނުމާއި ދެކޮޅު ހެދިކަމަށް ބުނެ ދައްކާ ވާހަކަތަކުގެ އަޑުތައް އިވޭ ކަމަށާއި، އެހެން ނަމަވެސް އެއީ ރަނގަޅު ވާހަކަތަކެއް ނޫން ކަމަށެވެ. އެކަމަށް އިޝާރާތް ކުރައްވާ ރައީސް ޔާމީން ވިދާޅުވީ، އެ ބައްދަލުވުމަށް އިމްރާން ވަޑައިގަތީ، ޖަލްސާ ހިނގާތާ 25 ވަރަކަށް މިނެޓު ފަހުން ކަމަށާއި، އޭރު އެއްބަސްވުން ހަދައިގެން ތިބެން ބޭނުން ނުވާކަމަށް ބައްދަލުވުމުގައި ވިދާޅުވެފައި ވާކަމަށް ރައީސް ޔާމީން ވިދާޅުވި އެވެ.
ޖީއެމްއާރުގެ ވާހަކަތައް ރައީސް ޔާމީން ދައްކަވާފައި މިވަނީ، އެމަނިކުފާނުގެ ވެރިކަމުގައި ތަރައްގީ ކުރި، ވެލާނާ އިންޓަނޭޝަނަލް އެއާޕޯޓްގެ އާ ރަންވޭ އާއި ގުޅިގެން ސަރުކާރުގެ ބައެއް ފަރާތްތަކުން ދައްކަވަމުން ގެންދަވާ ވާހަކަތަކާއި ގުޅިގެންނެވެ. އެގޮތުން ސަރުކާރުގެ ބައެއް ފަރާތްތަކުން ވަނީ، އެއާޕޯޓްގެ އާ ރަންވޭ ތަރައްގީ ކުރަން ފެށީ މީގެ 12 އަހަރު ކުރިން ކަމަށް ދޭހަވާ ގޮތަކަށް ވާހަކަފުޅު ދައްކަވާފަ އެވެ.
