އުޝާމް މިއަދު ކުރެއްވި ޓްވީޓެއްގައި ރައީސް ޔާމީނަށް މި ރައްދު ދެއްވީ، އިންޑިއާގެ ޖީއެމްއާރް ކުންފުންޏަށް ވެލާނާ އިންޓަނޭޝަނަލް އެއާޕޯޓު ވިއްކާލަން ހެދި އެއްބަސްވުން އުވާލުމަށް އެމްއެންޕީގެ ރައީސް މުހައްމަދު ނާޒިމް އާއި، ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އިތުރުން އަދާލަތު ޕާޓީގެ ރައީސް ޝެއިހް އިމްރާން އަބްދުﷲ ބޭނުންނުވި ކަމަށް ރާއްޖޭގެ ކުރީގެ ރައީސް އަބްދުﷲ ޔާމީން ވިދާޅުވުމާ ގުޅިގެންނެވެ.
ޖީއެމްއާރު ކަންތަކާ ގުޅޭ ގޮތުން އުޝާމް ވިދާޅުވީ އެއަރޕޯޓް އަތުލަން ނިންމީ އޭރުގެ ސަރުކާރުގެ ކެބިނެޓުން ކަމަށެވެ. އޭރު ވެރިކަމުގައި ހުންނެވީ ޑރ. ވަޙިދުއެވެ. 27 ނޮވެމްބަރ 2012 ގެ ކެބިނެޓް ބައްދަލުވުމުގެ ޔައުމިއްޔާތައް މިހާރުވެސް ހުންނަންވާނެ ކަމަށް އުޝާމް ވިދާޅުވިއެވެ. އަދި ކެބިނެޓްގެ ނިންމުން ތަންފީޒުކުރުމަށް އެންމެ މުހިންމު މަސައްކަތެއް އޭރު ކުރި އެކަކީ ނާޒިމް ކަމަށާއި އެ ހަގީހަތް ބަދަލު ނުކުރެވޭނެކަމަށް އުޝާމް ވިދާޅުވިއެވެ.
