ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ވޯލްޑް ބޭންކާއި އައިއެމްއެފް އިން ބާއްވާ އަހަރީ ބައްދަލުވުމުގައި ބައިވެރިވުމުގެ ދައުވަތު އެމަނިކުފާނަށް ލިބިވަޑައިގެންފައިވާ ކަމަށާއި، އެހެން ކަމުން އެ ބައްދަލުވުމުގައި ބައިވެރިވެވަޑައިގަތުމަށް މިރޭ އެމެރިކާގެ ވޮޝިންޓަން އަށް ފުރާވަޑައިގަތުމަށް ހަމަޖެހިފައި ވާކަމަށެވެ.
ރައީސް ނަޝީދު އިތުރަށް ވިދާޅުވީ، މި ބައްދަލުވުމުގެ ހަރަދުތައް ބަލަހައްޓަނީ، ކްލައިމެޓް ވޮނަރަބަލް ފޯރަމް (ސީވީއެފް)ގެ ފަރާތުން ކަމަށާއި، އެ ފޯރަމުގައި ސީވީއެފްގެ ފަރާތުން 20 ފައިނޭންސް މިނިސްޓަރުން ބައިވެރިވެވަޑައިގަންނަވާކަމަށެވެ.
ޖަލްސާގައި އިތުރަށް ވާހަކަފުޅު ދައްކަވަމުން ރައީސް ނަޝީދު ވިދާޅުވީ، ތަރައްގީ ވަމުން އަންނަ ގައުމުތަކަށް އިގްތިސާދީ ގޮތުން ބޮޑެތި ހުރަސްތަކެއް ކުރިމަތި ވަމުން އަންނަ ކަމަށާއި، ބޮޑެތި ލޮޅުންތަކެއް ކުރިމަތިވަމުން އަންނަ ކަމަށެވެ.
އަދި މިކަމަކީ ބައިނަލްއަގްވާމީ މާލީ އިދާރާތަކުން ފުންކޮށް ވިސްނަން ޖެހޭ ކަންކަން ކަމަށްވެސް އެމަނިކުފާނު ވިދާޅުވި އެވެ.
