އެމަނިކުފާނު މިހެން ވިދާޅުވީ، މިއަދުގެ ޖަލްސާގައި ވާހަކަފުޅު ދައްކަވަމުން، އައްޑޫ މަރަދޫ ދާއިރާގެ މެމްބަރު އިބްރާހިމް ޝަރީފް (މަވޯޓާ) ދެއްކެވި ވާހަކަފުޅާއި ގުޅިގެންނެވެ.
މަޖިލީހުގެ ތަޅުމުގައި ވާހަކަފުޅު ދައްކަވަމުން މަވޯޓާ ވިދާޅުވީ، މަޖިލިސް މަސްތުވާތަކެތީގެ އައްޑާ އަކަށް ވެގެން ނުވާނެ ކަމަށާއި، މަޖިލީހުގެ ގޯތި ތެރޭ ތިބެ ފާޅުގައި މަސްތުވާތަކެތި ބޭނުންކޮށް، މަޖިލީހުގެ ޖަލްސާއަށް އައުމުގެ ފުރުސަތު ރިޔާސަތުން ދީގެން ނުވާނެ ކަމަށެވެ. އަދި މަޖިލީހުގައި، ބްރެތް އެނަލައިޒާ ބަހައްޓަންޖެހޭ ހިސާބަށް ގޮސްފައި ވާކަމަށް މަވޯޓާ ވިދާޅުވި އެވެ.
އެކަމާއި ގުޅިގެން ރައީސް ނަޝީދު ވަނީ، މަވޯޓާ އަށް ރައްދު ދެއްވާ ވާހަކަފުޅު ދައްކަވާފަ އެވެ. އެގޮތުން އެމަނިކުފާނު ވަނީ، މަޖިލީހަކީ މަސްތުވާތަކެތި ބޭނުން ކުރާ ތަނެއް ނޫން ކަމަށާއި، އެފަދަ އެއްވެސް ކަމެއް މަޖިލީހުގެ ތެރޭ ނުހިނގާ ކަމަށް ވިދާޅުވެފަ އެވެ. އަދި މެމްބަރުންގެ ކަރާމަތާއި އިއްޒަތް ގެއްލޭ، ސާބިތު ނުހިފޭ ވާހަކަ ނުދެއްކުމަށް ރައީސް ނަޝީދު އެދިވަޑައިގެންނެވި އެވެ.
ރައީސް ނަޝީދުގެ ވާހަކަފުޅަށް ރައްދު ދެއްވާ މެމްބަރު މަވޯޓާ ވަނީ، އޭނާ ދެއްކި ވާހަކަތަކަކީ ހަގީގަތެއްތޯ ނުވަތަ ނޫންތޯ ވެސް އެނގޭނީ، މަޖިލީހުގައި ބްރެތް އެނެލައިޒާ ބެހެއްޓުމުން ކަމަށް ވިދާޅުވެފަ އެވެ. އަދި މަޖިލީހަކީ ގައުމަށް ދިމާވާ ބޮޑެތި ކަންކަމުގެ ވާހަކަ ދައްކާ އެންމެން ގުޅިގެން އެކަންކަމަށް ހައްލު ހޯދާ ތާކަށް ހަދަންޖެހޭ ކަމަށް ވިދާޅުވެފަ އެވެ.
