އެޗްޕީއޭއިން މިއަދު ނެރެފައިވާ ބަޔާނެއްގައި ބުނެފައިވަނީ، މި އަހަރުގެ އޭޕްރީލް މަހުން ފެށިގެން ރާއްޖޭގައި ޑެންޖީ ހުން ޖެހޭ މީހުންގެ އަދަދު އިތުރުވާން ފަށާފައި ވާކަމަށާއި، މިދިޔަ ސެޕްޓެމްބަރު މަހަށްވުރެ އޮކްޓޯބަރުގެ މިހާތަނަށް މި ހުން ޖެހިގެން ރިޕޯޓް ކުރި މީހުންގެ އަދަދު އިތުރުވެފައިވާ ކަމަށެވެ.
އެޗްޕީއޭގެ ބަޔާނުގައި ބުނެފައިވަނީ، ކޮންމެ އަހަރެއްގެ ވިއްސާރަ މޫސުމާ ގުޅިގެން ޑެންގީ އުޅޭ ނިސްބަތް އިތުރުވާ ކަމަށާއި މިއަހަރަކީ ގިނައިން ވިއްސާރަކުރި އަހަރަކަށްވެފައި މިހާރުވެސް ކުރަމުންދާ ވިއްސާރައާ ގުޅިގެން މަދިރި އާލާވެ އިތުރުވުން ކުރިއަށް އޮތް ތަނުގައި ގިނަވާނެ ކަމަށް ބެލެވޭ ކަމަށެވެ. އަދި ޑެންގީ އަކީ ސާފު ފެނުގައި އުފެދޭ އީޑީސް މަދިރީގެ ސަބަބުން ފެތުރޭ ބައްޔަކަށް ވުމުން މި ބަލިން ރައްކާތެރިވާން މަދިރި ހެފުމުން ރައްކާތެރިވުމާއި މަދިރި އުފެދުން މަދުކުރަން މަސައްކަތް ކުރުމަށް އެޗްޕީއޭއިން ވަނީ އިލްތިމާސްކޮށްފަ އެވެ.
މީގެ އިތުރުން ޑެންގީ ހުން ޖެހިއްޖެ ހާލަތެއްގައި ގޭގައިވެސް ފަރުވާ ދެވޭނެ ކަމަށާއި އެގޮތުން، އަރާމުކުރުމާއި ގިނަގިނައިން ދިޔާއެއްޗެހި ބޭނުން ކުރުމާއި ޕެރެސެޓެމޯލް ބޭނުން ކުރުމަކީ ކުރެވިދާނެ ކަންކަންކަމަށް އެޗްޕީއޭއިން ބުނެ އެވެ. އަދި ތިން ދުވަހަށްވުރެ ގިނަ ދުވަހަށް ހުން އައިސް މާބޮޑަށް ވަރު ދެރަވާނަމަ ޑޮކްޓަރެއްގެ ލަފާ ހޯދުން މުހިންމުކަމަށް އެޗްޕީއޭއިން ވަނީ ބުނެފަ އެވެ.
އެޗްޕީއޭގެ ބަޔާނުގައި އިތުރަށް ބުނީ، ކުޑަކުދިންނާއި، އުމުރުން ދުވަސްވީ މީހުންނާއި، މާބަނޑު މީހުންގެ އިތުރުން ބޮޑެތި ބަލިތަކަށް ބޭސްކުރަމުން ދާ މީހުންނަށް މި ބަލީގެ ނުރައްކާ ބޮޑު ކަމަށާއި، އަދި މިފަދަ ފަރާތްތަކަށް މިބަލިޖެހި އެކަށީގެންވާ ފަރުވާ ނުދެވިއްޖެނަމަ ފުރާނައަށް ނުރައްކާވުމަކީ އެކަށީގެންވާ ކަމެއް ކަމަށް ވަނީ ބުނެފަ އެވެ.
މަދިރިން ރައްކާތެރިވުމުގެ ގޮތުން ހަޑިގަނޑު ރަނގަޅަށް ނިވާވާގޮތަށް ހެދުން އެޅުމާއި، މަދިރި ލޯޝަނާއި މޮސްކިޓޯ ރެޕެލެންޓް ބޭނުންކުރުމާއި، ފަތިސް ވަގުތާއި ހަވީރުގެ ވަގުތުގައި ގޭގެ ދޮރުތައް ލައްޕާފައި ބެހެއްޓުމަކީ ކުރެވިދާނެ ކަންކަންކަމަށް އެޗްޕީއޭއިން ވަނީ ބުނެފަ އެވެ.
