އެ ބިއުރޯއިން ނެރުނު ބަޔާނެއްގައި ވާގޮތުން، ބޯހިމެނުމަށް މައުލޫމާތު ނުނެގިހުރި ތަންތަނުގެ ތެރެއިން 41 އިންސައްތަ ތަންތަނުގެ މައުލޫމާތު މިހާރު ވަނީ އެއްކުރެވިފައެވެ. މިހާރު ކުރަމުންދަނީ ބޯހިމެނިފައި ނުވާކަން ބިއުރޯއަށް އަންގަމުންދާ މީހުންގެ މައުލޫމާތު ނެގުމުގެ މަސައްކަތެވެ.
ބޯހިމެނުން ފުރިހަމަ ވަނީ ހުރިހާ ފަރުދުން ހިމެނިގެން ކަމުން ބޯހިމެނުމުގައި ކޮންމެ ފަރުދަކު ވެސް ހިމެނުނުކަން ޔަގީން ކުރެއްވުމަށާއި، މީހުން ދިރިނޫޅޭ ތަންތަނާއި ނިދުމަށް ބޭނުންކުރާ ތަންތަނާއި ހުސްކޮށް ހުރި ތަންތަނުގެ ވެރި ފަރާތްތަކުން އެކަން ފާހަގަކޮށްދީ ބިއުރޯ އަށް އަންގައި ދިނުމަށް ވެސް ބިއުރޯ އެދެއެވެ.
ބޯހިމެނުމުގެ މަސައްކަތް ފެށީ، މިދިޔަ ސެޕްޓެމްބަރު ތެރޭގައެވެ. އެމަސައްކަތް ނިންމާ ބޯހިމެނުމުގެ ވަގުތީ ނަތީޖާ އިއުލާންކުރާގޮތަށް އޮތީ މިމަހުގެ ހަވަނަ ދުވަހު އެވެ. ނަމަވެސް އެހާތަނަށް ބޯހިމެނުމުގެ މަސައްކަތް ނިންމާލެވިފައި ނުވާތީ ވަގުތީ ނަތީޖާ އިއުލާންކުރުން މިހާރު އޮތީ ތާރީހެއް ނެތްގޮތަށް ފަސްކޮށްފައެވެ. އެެހެންވިޔަސް، ބޯހިމެނުމުގެ ރަސްމީ ނަތީޖާ މި މަހުގެ 20 ގައި އިއުލާން ކުރާނެ އެވެ.
