މި ހާދިސާ ޓުވިޓާގައި ހިއްސާކުރި ފަރާތުން ބުނީ، އެ ސައިކަލުގައި ރޯކޮށްލާފައިވަނީ ރޭ 12:45 ހާއިރު ކަމަށެވެ.
އޭނާ ބުނީ ސައިކަލު ބޭނުން ނުކުރެވޭ ވަރަށް އަދާފައިވާއިރު، ސައިކަލު ހުރިތަނުގެ ދޮރުތަކާއި، އޭސީ ޔުނިޓަށްވެސް ގެއްލުން ލިބިފައިވާ ކަމަށެވެ.
އޭނާ ވަނީ ސައިކަލު އަދަމުންދިޔަ މަންޒަރު ފެންނަ ވީޑިއޯއެއްވެސް ހިއްސާކޮށްފައެވެ.
މިކަމާއި ގުޅިގެން ފުލުހުން ބުނީ، އެމައްސަލަ ތަހުގީގުކުރަމުންދާ ކަމަށާއި، މިހާރު ކުރަމުންދަނީ އެ ސަރަހައްދުގައި ހުރި ސީސީޓީވީ ފުޓޭޖު އެނަލައިޒް ކުރުމުގެ މަސައްކަތް ކަމަށެވެ.
މި މައްސަލާގައި އަދި މީހަކު ހައްޔަރުކޮށްފައެއް ނުވެއެވެ. އަދި އެކަން ކުރި ބަޔަކު ދެނެގަނެވިފައެއް ނުވެއެވެ.
އާއްމުންގެ ގެދޮރަށް ވަދެ މުދަލަށް ގެއްލުން ދިނުމަކީ އަދަބު ކަނޑައެޅިފައިވާ ކުށަކެވެ. ނަމަވެސް މިފަހަކުން އައިސް ގޯތިތެރޭ ބަހައްޓާފައި ހުއްޓާވެސް ބައެއް މީހުންގެ އަގުހުރި މުދަލަށް ދަނީ ގެއްލުން ދެމުން ނެވެ.
މިއަހަރުގެ ފެބްރުއަރީ މަސްތެރޭ ނ. މިލަދޫގައި ވެސް ވަނީ ފުލުހެއްގެ ސައިކަލުގައި ރޯކޮށްލައި އަޅިއަށް ހަދާލާފައެވެ. އެރަށުގައި ރޯކޮށްލީ ޑްރަގް ޑީލެއް ހުއްޓުވި ފުލުހެއްގެ ސައިކަލެއްގައެވެ. ގޯތިތެރޭގައި ހުއްޓައި ފުލުސް މީހާގެ ސައިކަލުގައި އެފަހަރު ރޯކޮށްލި މައްސަލާގައި އެރަށު ފަތަގުމާގެ، އަބްދުﷲ ޝުހާދުގެ މައްޗަށް މިދިޔަ މެއި މަސްތެރޭ ވަނީ ދައުވާ އުފުލާފައެވެ.
އޭގެފަހުން މ. މުލަކުގައި ފުލުސްމީހެއްގެ ގޭ ދޮށުގައި ޕާކު ކޮށްފައިހުރި ސައިކަލެއްގައި ވެސް ވަނީ ރޯކޮށްލާފައެވެ.
