ސަރުކާރުން 2017 ވަނަ އަހަރު އާރަށް އިންވެސްޓްމަންޓް އަށް އެރަށް ދިނީ ދަނޑުވެރިކަން ކުރުމަށެވެ. އެހެން ނަމަވެސް މިއަދާއި ހަމައަށްވެސް އެރަށުގައި ދަނޑުވެރިކަމުގެ އެއްވެސް މަސައްކަތެއް ނުކޮށް، އެރަށަށް އެކުންފުނިން ގެއްލުން ދެމުންދާކަމަށް ބުނެ، އެރަށުގެ ގިނަ ރައްޔިތުން އަންނަނީ އިހުތިޖާޖު ކުރަމުންނެވެ.
އެގޮތުން މިދިޔަ ހަފްތާގައި ތިނަދޫ ކައުންސިލްގެ ރައީސް ހުސައިން ޝިފާގު އާއި ކައުންސިލްގެ އިތުރު މެމްބަރުން ވަނީ އެރަށަށް އަރާ އެކަމާއި ދެކޮޅަށް އަޑުއުފުލާފަ އެވެ. އެރަށުން ކައުންސިލް މެމްބަރުން ފޭބީ، ސަރުކާރުގެ ކަމާއި ބެހޭ އިދާރާތަކުން އެކަމާއި ގުޅިގެން ކައުންސިލާއި މަޝްވަރާ ކުރާނެ ކަމަށް އެއްބަސްވުމުންނެވެ.
އެރަށަށް ގެއްލުން ދެމުން ދާކަމަށް ބުނެ، އީޕީއޭއަށް މައްސަލަ ޖައްސާފައި ވަނިކޮށް، އެންވަރަމެންޓް މިނިސްޓަރު އައިމިނަތު ޝައުނާ އާއި އީޕީއޭއިން އެރަށަށް އިއްޔެ ދާނެ ކަމަށް ވަނީ ބުނެފަ އެވެ. އެހެން ނަމަވެސް އެރަށަށް އިއްޔެ އެބޭފުޅުން ގޮސްފައި ނުވެ އެވެ.
އެހެން ނަމަވެސް އެރަށަށް މިނިސްޓަރުގެ އިތުރުން އީޕީއޭއިން ދާނެ ކަން ބުނުމާއި އެކު، ހުޅިދޫގެ ފަރުގެ ރީތި ދިމާލުން، ބައެއް ކަނޑާލައި ފަރަށް ގެއްލުންވާ ގޮތަށް 2020 ވަނަ އަހަރު އަރުވާފައި އޮތް ބާޖު ރަށާއި ހަވާލުވެގެން ތިބި ކުންފުނިން ވަނީ އިއްޔެ މެންދުރު ނަގާފަ އެވެ.
މިކަމާއި ގުޅިގެން ތިނަދޫ ކައުންސިލްގެ ރައީސް ހުސައިން ޝިފާގު ކަންބޮޑުވުން ފާޅުކުރައްވާ ވިދާޅުވީ، ބާޖު އެތަނުން ނެގި ނަމަވެސް ބާޖުގެ ސަބަބުން ފަރަށް ލިބުނު ގެއްލުން ފޮރުވާ ނުލެވޭނެ ކަމަށާއި، ކަމާއި ބެހޭ އިދާރާތަކުން އެކަން ރަނގަޅަށް ތަހުގީގު ކުރާނެ ކަމަށް އުއްމީދު ކުރައްވާ ކަމަށެވެ.
މީގެ އިތުރުން އެކަމާއި ގުޅިގެން ކަންބޮޑުވުން ފާޅު ކުރި ބައެއް ފަރާތްތަކުން ބުނީ، ސަރުކާރުގެ އިދާރާތަކުން އެރަށަށް އަންނާނެ ކަން އިއުލާން ކުރުމުން ބާޖު އެތަނުން ނެގީ، އެކުންފުނިން އޮޅުވާލުމުގެ ބޭނުމުގައި ކަމަށާއި، ބާޖު އެތަނުން ނެގުމަށް ފުރުސަތު ލިބުނީ، ސަރުކާރުން އެރަށަށް އައުން ލަސް ކުރުމުން ކަމަށެވެ.
މިކަމާއި ގުޅިގެން "ސީއެންއެމް" އަށް މައުލޫމާތު ދިން އީޕީއޭގެ އޮފިޝަލަކު ވިދާޅުވީ، އެރަށުގައި ހުރި ބަލަންޖެހޭ ކަންކަން ބަލަމުން އަންނަ ކަމަށާއި، އެކަމާއި ގުޅިގެން ފަހުން މައުލޫމާތު ހިއްސާ ކުރާނެ ކަމަށެވެ.
