ރައީސް ޔާމީން މިހެން ވިދާޅުވީ، ނ. އަތޮޅުގެ ހަ ރަށަކަށް މިހާރު ކުރައްވަމުން ގެންދަވާ ދަތުރުފުޅުގައި އެއަތޮޅު ވެރިކަންކުރާ ރަށް މަނަދޫގައި އޮތް ޖަލްސާގައި ވާހަކަފުޅު ދައްކަވަމުން ނެވެ.
އެމަނިކުފާނު ވިދާޅުވީ، ނ. އަތޮޅު އެމަނިކުފާނުގެ ދައުރުގައިވެސް އޮތީ ވަރަށް ބޮޑަށް އެހެން ބައެއްގެ އަތްމައްޗަށް ދޫކޮށްލެވިފައި ކަމަށެވެ.
އެކަން އެގޮތަށް ކުރެވުނީ، “”ގަން ޕޮއިންޓުގައި ޖޭޕީ އާއި އެމްޑީއޭ އާއި އެކީ ހެދުނު އެއްބަސްވުމެއްގެ ސަބަބުން” ކަމަށް ރައީސް ޔާމީން ވިދާޅުވި އެވެ. ޔާމީން ވިދާޅުވީ، އެމްޑީއޭއަށް ނ. އަދި ދ. އަތޮޅު ދޫކޮށްލުމުން އުޅުނީ އަމިއްލަ ޕާޓީ ކުރިއެރުވުމަށް ކަމަށާއި އާހިރުގައި ގޮޑިއެއްވެސް ނުލިބުނީ ކަމަށެވެ.
ޔާމީން ވިދާޅުވީ ޖޭޕީއޭ އާއިއެކު ހެދުނު އެއްބަސްވުމުގެ ނަތީޖާއަކަށް ވެސްވީ މަޖިލީހުން އެމްޑީޕީއަށް މެޖޯރިޓީ ލިބިގެން ދިއުން ކަމަށާއި، އެކަން ކުރެވުނީވެސް ޖޭޕީން ދެއްކި އެތައް ވާހަކަތަކަކާއި ދިން ޔަގީންކަމެއްގެ ސަބަބުން މަޖިލީހުގެ އިންތިހާބުގައި ދާއިރާތަކެއް އެޕާޓީއަށް ދޫކޮށްލުމަށް އެއްބަސް ވެވުމުން ކަމަށެވެ. ނަމަވެސް ފަހުވަގުތުގައި ޖޭޕީގެ ލީޑަރާއި އެބޭފުޅާއާއިއެކު އިސްކޮށް ތިއްބެވި ބޭފުޅުން ޕީޕީއެމް އަށް ވަރަށް ބޮޑެތި މަކަރުތަކެެއް ހައްދަވައިގެން އޮޅުވާލެއްވި ކަމަށް ރައީސް ޔާމީން ވިދާޅުވި އެވެ.
ޔާމީން ވިދާޅުވީ، އެ ދާއިރާތައް ޕީޕީއެމްއިން ދޫކޮށްލުމުން ޖޭޕީއަށް އެ ދާއިރާތަކުގެ ގޮނޑި ކާމިޔާބު ނުކުރެވުނު ކަމަށާއި، އެގޮނޑިތައް ރައްޔިތުން ދިނީ އެމްޑީޕީއަށް ކަމަށެވެ.
އެދުވަހު އެދާއިރާތައް ޕީޕީއެމްއިން ދޫކޮށްނުލިނަމަ އެމްޑީޕީގެ ބޮޑު މެޖޯރިޓީއެއް މިއަދު މަޖިލީހުގައި ނޯންނާނެ ކަމަށް ޔާމީން ވިދާޅުވި އެވެ. ހަގީގަތުގައި ޖޭޕީއަށް ގޮނޑިތައް ނުލިބުނު ސަބަބަކީ ޖޭޕީއަކީ އޭރުވެސް އަދި މިހާރުވެސް އެއްވެސްކޮޅެއްގައި ޖެހޭ ޕާޓީއަކަށް ނުވުމާއި، ރާއްޖޭގައި އޮތް ސިޔާސީ ފިކުރަކީ އެމްޑީޕީ އަދި ޕީޕީއެމް ކަމަށް ވުމުން ކަމަށް ރައީސް ޔާމީން ވިދާޅުވި އެވެ.
މިއަދު ރާއްޖެ ތަހަންމަލުކުރާ ހަގީގީ ހިތްދަތިކަމުގެ ސިއްރަކީވެސް އެދުވަހު ގަން ޕޮއިންޓުގަައި ތިބެ އަތޮޅުތަކާއި ދާއިރާތައް ކޯލިޝަންތެރޭ އޮތް ޕާޓީއަކަށް ދޫކޮށްލެވުމުގެ ނަތީޖާ ކަމަށް ރައީސް ޔާމީން ވިދާޅުވި އެެވެ. އަދި ދެން އިއްތިހާދުގެ އެއްބަސްވުމުގައި ބައި އަޅައި، ދޫކުރުމުގެ އުސޫލު ނުގެންގުޅޭނެ ކަމުގެ ޔަގީންކަން ރައީސް ޔާމީން ދެއްވި އެވެ.
