ރާއްޖޭގެ އެކި ސަރަހައްދުތަކުގައި އެމްބިއުލާންސެއް ނުލިބިގެން ރަށު ޕިކަޕުގައި މީހުން އުފުލުން ވަނީ އާންމުވެފަ އެވެ.
މިކަމަށް ހައްލު ހޯދައިދިނުމަށް ސަރުކާރުން މިހާތަނަށް ވަނީ 137 ރަށަކަށް އެމްބިއުލާންސްތައް ފޮނުވާފައެވެ.
މިއަދުގެ މަޖިލީހުގަައި އިހަވަންދޫ ދާއިރާގެ މެމްބަރު މުހައްމަދު ޝިފާއު ވަނީ މިހާރުވެސް އެމްބިއުލާންސް ނެތް ރަށްރަށް ތިބިކަން ފާހަގަކުރައްވާ އެރަށްރަށަށް އެމްބިއުލާންސް ފޮނުވޭވަރުވާނީ ކިހާ ތާކުތޯ މިނިސްޓަރާއި ސުވާލުކުރައްވާފައެވެ.
މި ސުވާލަށް ޖަވާބުދެއްވަމުން މިނިސްޓަރު ވިދާޅުވީ، މިހާރު ކުރަމުންދަނީ ތަންކޮޅެއް ކުދި ރަށްރަށަށް ކުދި އެމްބިއުލާންސް ގެނައުމުގެ އިންތިޒާމު ހަމަޖައްސަމުގެ މަސައްކަތް ކަމަށެވެ.
މިނިސްޓަރު ވިދާޅުވީ، ކުދި ރަށްރަށަށް މިހާރު ހުރި ބޮޑެތި އެމްބިއުލާންސްތައް ފޮނުވުމުން އޭގެ ބޭނުން އެރަށްރަށުގައި ނުކުރެވޭ ކަމަށާއި، އެރަށްރަށުގެ ކުދި މަގުތަކަށް އެތަކެތި ނުފެތޭ ކަމަށެވެ.
މިއަދުގެ މަޖިލީހުގައި މިނިސްޓަރު ވިދާޅުވީ ޗައިނާ އާއި ގުޅިގެން ކުރަމުންދާ އެމަސައްކަތުގެ އެންމެ ފަހުގެ މައުލޫމާތު ހޯދުމަށްފަހު ފަހުން މައުލޫމާތު އަރުވާނެ ކަމަށެވެ.
