އެމަަސައްކަތް ލަސްވަމުންދާތީ މިއަދުގެ މަޖިލީހުގައި ދާންދޫ ދާއިރާގެ މެމްބަރު ޔައުގޫބް އަބްދުﷲ ކުރެއްވި ސުވާލަށް ޖަވާބުދެެއްވަމުން މިނިސްޓަރު ނަސީމް ވިދާޅުވީ، މާމެންދޫ ސިއްހީ މަރުކަޒު ބޮޑުކުރުމަށް އަޅާ އިމާރާތު މަސައްކަތަކީ ލާމަރުކަޒީ ނިޒާމުގެ ދަށުން ކައުންސިލާއި ހަވާލުކޮށްގެން ކުރިއަށް ގެންދިޔަ މަޝްރޫއު އެއް ކަމަށެވެ.
އެމަސައްކަތް ކުރިއަށް ނުދާތީ އެ އެއްބަސްވުން އުވާލައި އެމަސައްކަތް މިހާރު ކުރިއަށް ގެންދަނީ ހެލްތު މިނިސްޓްރީންކަން ފާހަގަކުރައްވާ މިނިސްޓަރު ވިދާޅުވީ، އެކްސްޓެންޝަން އިމާރާތާއި، ލެބޯޓަރީ އިމާރާތް އެޅުމަށް ކޮންޓެރެކްޓަރަކާއި ހަވާލުކޮށް މިހާރު ދަނީ އެ މަސައްކަތް ކުރެވެމުން ކަމަށެވެ.
މާމެންދޫ ސިއްހީ މަރުކަޒު މަޝްރޫއު މިހާރު ހެލްތު މިނިސްޓްރީން ހަވާލުކޮށްފައިވަނީ، ރައިޒާ ޕްރައިވެޓް ލިމިޓެޑާ އެވެ.
ޖުމްލަ 4.8 މިލިއަން ރުފިޔާގެ މި މަޝްރޫއުގެ އެމަސައްކަތް ހަވާލުކުރީ އެއް އަހަރު ދުވަސްތެރޭ ނިންމާގޮތަށް މިދިޔަ އޮކްޓޫބަރު މަހުގެ ހަވަނަ ދުވަހު އެވެ.
މި މަޝްރޫއުގެ އިތުރުން އެއަތޮޅު ނިލަންދޫގެ ސިއްހީ މަރުކަޒު ބޮޑުކުރުމާއި ލެބޯޓަރީއެއް އެޅުމުގެ މަސައްކަތްވެސް ހުއްޓިފައި އޮންނަތާ ދުވަސްތަކެއް ވެފައިވާ ކަމަށް މިއަދުގެ މަޖިލީހުގައި ފާހަގަކުރެެއްވި އެވެ.
މިނިސްޓަރު ވިދާޅުވީ، ނިލަންދޫގެ ސިއްހީ މަރުކަޒު ބޮޑުކުރުންވެސް ފުރަތަމަ ހަވާލުކުރެވިފައި އޮތީ ކައުންސިލާއި ނަމަވެސް އެމަސައްކަތްވެސް ކުރިއަށް ނުދާތީ އެއްބަސްވުން ބާތިލުކޮށްފައިވާ ކަމަށެވެ.
މިނިސްޓަރު ވިދާޅުވީ، އެމަޝްރޫއުގެ މަސައްކަތްވެސް އަންނަ އަހަރުގެ އެޕްރީލަށް ނިންމާލެވޭނެ ކަމަށް ލަފާކޮށްފައިވާ ކަމަށާއި، އެ ޓާގެޓަށް މަސައްކަތް ނިންމާލެވޭތޯ މަސައްކަތް ކޮށްދޭނެ ކަމަށެވެ.
