މޭޔަރު އާތިފް މިގޮތަށް ވިދާޅުވީ، ނަސްރުގެ ދުވަސް ފާހަގަކުރުމުގެ ގޮތުން ކުޅުދުއްފުށި ސިޓީ ކައުންސިލާއި ޖަލާލުއްދީން ސްކޫލުން އިންތިޒާމް ކޮށްގެން ބޭއްވި ޖަލްސާގައި ވާހަކަ ދައްކަވަމުންނެވެ.
އޭނާ ވިދާޅުވީ، މިއަދު ގައުމުތައް ހަލާކު ކޮށްލުމުގައި ބޭނުންކުރަނީ، ކަނޑިޔާ ބަޑިއެއް ނޫން ކަމަށާއި، އެއަށްވުރެ ފަހި ވަސީލަތްތައް މިހާރު ހުރި ކަމަށެވެ. ހާއްސަކޮށް ބަވަނަވެފައިވާ ދުނިޔޭގައި ޓެކްނޮލޮޖީ ކުރިއަރާފައިވާއިރު، ގޭގެ ކޮޓަރިތަކުގައި ތިބެގެން ގައުމުތައް އެބަ ހަލާކުކުރާ ކަމަށެވެ.
ފިކުރީ ހަނގުރާމައަކީ، ޕްލޭން ކުރެވިގެން ކުރެވޭ ނުރައްކާތެރި ހަނގުރާމައެއް ކަމަށާއި، މި ހަނގުރާމަ ހާއްސަކޮށްފައިވަނީ މާތްވެގެންވާ ދީނަށް ކަމަށް އޭނާ ވިދާޅުވި އެވެ. އޭގެ ތެރޭގައި ދީނީ ކަންކަމަކީ ތަކުލީފެއް ކަމުގައި ދެއްކުމާއި، ނޭޗާ އަށް އަޅުކަން ކުރުމަކީ މޮޅުކަމެއް ކަމުގައި ދެއްކުމާއި، އެއްކައުވަންތަކަމަށް އިންކާރު ކުރާ މާއްދީ ނަޒަރިއްޔާތު ހުށަހެޅުމާއި، އިސްލާމީ ޝަހުސިއްޔަތު ރޫޅާލާފަދަ ކަންކަމަށް ދައުވަތު ދިނުމާއި، ގައިބަށް އީމާންވުމަށް އިންކާރު ކުރުން މުޖުތަމައު ތެރޭގައި ފެތުރުމަށް މަސައްކަތް ކުރުމާއި، އެހެން ދީންތަކުގެ ސަގާފަތްތައް މުޖުތަމައު ތެރެއަށް ވެއްދުމަށް މަސައްކަތް ކުރުން ހިމެނޭ ކަމުގައި ކުޅުދުއްފުށީ ސިޓީގެ މޭޔަރުގެ ވާހަކާގައި ފާހަގަކުރެއްވިއެވެ.
މި ހަނގުރާމާގައި އެންމެ ބޮޑު އަމާޒު ހިފާފައިވަނީ، ކުދި ޅަދަރިންގެ ވިސްނުމަށް މިކަންކަން ވައްދައި އެކުދިންގެ ވިސްނުން ބަދަލުކުރުން ކަމުގައިވާތީ، އެކަމަށް ކޮންމެ މަންމައަކާއި ބައްޕައަކު ސަމާލުކަން ދިނުމަށް މޭޔަރު އާތިފް އިލްތިމާސްކުރެއްވި އެވެ.
