ބަންޑާރަ ނައިބު ވިދާޅުވީ ރައްޔިތުންގެ މަޖިލީހާ މޮރިޝަސްއިން ރާއްޖެއާއި ދެކޮޅަށް ހުށަހަޅާފައިވާ މައްސަލައިގެ މައުލޫމާތު ހިއްސާކޮށްފައި ވަނީ މިއަހަރުގެ ފެބްރުއަރީ މަހުގެ 17 ވަނަ ދުވަހު ކަމަށެވެ.
މިހާރު ފެންމަތިވެގެން އުޅޭ މައްސަލައިގެ ތަފްސީލް ދެއްވަމުން ބަންޑާރަ ނައިބް ވިދާޅުވީ ޗާގޮސްއަކީ މޮރިޝަސްގެ ސިޔާދަތީ ބާރު ހިނގާތަނެއް ކަމަށް ދިވެހިރާއްޖެއިން ގަބޫލުކޮށް އދ ގައި ވޯޓު ދިނުމަށް ނިންމި ނިންމުމުގެ ސަބަބުން މޮރިޝަސްއިން ރާއްޖެއާއި ދެކޮޅަށް ހުށަހަޅާފައިވާ މައްސަލައަށް އެއްވެސް ބުރުލެއް ނާރާނެ ކަމަށެވެ. ބަންޑާރަ ނައިބް ވިދާޅުވީ މި ސަރުކާރުން މަސައްކަތް ކޮށްފައި ވަނީ ދިވެހި ދައުލަތުގެ އެންމެ މަތީ މަސްލަހަތަށް އިސްކަން ދީގެން ކަމަށެވެ. އަދި ކުރިޔަށް އޮތްތަނުގައި ވެސް އެ މަސައްކަތް އެ ގޮތަށް ކުރައްވާނެ ކަމުގެ ޔަގީންކަން ބަންޑާރަ ނާއިބު ދެއްވިއެވެ.
ރާއްޖެއާ ޗާގޯސްގެ ކަނޑުގެ މައްސަލައިގައި ރާއްޖޭގެ އެންމެ މަތީ މަސްލަހަތު ދިފާއު ކުރައްވާނެ ކަމަށް ރައީސް އިބްރާހީމް މުހައްމަދު ސާލިހްވެސްވަނީ ވިދާޅުވެފައެވެ. ޗާގޯސް މައްސަލައިގައި އަދި ހާރިޖީ ދާއިރާއާ ގުޅޭ އެހެން ކަމެއްގައިވެސް، ރާއްޖޭގެ ސިޔާދަތީ މިނިވަންކަމަށް ގެއްލުމެއް ލިބޭ ފަދަ ނިންމުމެއް ނިންމައި، އަދި އެފަދަ ކަމަކަށް ޖާގަވެސް ނުދޭނެކަމުގެ ޔަގީންކަން ރައީސުލްޖުމްހޫރިއްޔާވަނީ ދެއްވާފައެވެ.
