ބުދަ ދުވަހުގެ ރޭ ރައީސް މައުމޫން އިސްކޮށް ހުންނަވާ މޯލްޑިވްސް ރިފޯމް މޫވްމަންޓުން ނަސްރުގެ ދުވަސް ފާހަގަ ކުރުމަށް ބޭއްވި ހަފްލާގައި މެޑަމް ނަސްރީނާވަނީ ނޮވެންބަރު ތިނެއްގައި އެ ކަމަނާ ތަޖުރިބާ ކުރެއްވި ކަންކަމުގެ ހަނދާންތައް ވަރަށް ތަފްސީލްކޮށް ކިޔައި ދެއްވާފައެވެ.
އެކަމަނާ ވިދާޅުވި ގޮތުގައި ބާޣީން ރާއްޖެއަށް އެރި ދުވަހުގެ ކުރީރޭ އެކަމަނާ ނިދީ މެންދަންވީ ފަހުން ކަމަށެވެ. އެ ދުވަހު އުޅުއްވީ ހަގު ދަރިކަލުން ޣައްސާން މައުމޫން ގެންގުޅުއްވި ސްޓޭމްޕް އަލްބަމެއް ހިފައިގެން ކަމަށާއި އަދި ފަހުން ރައީސް މައުމޫން އުޅުއްވީ ޖުމްހޫރީ ދުވަހުގެ ޖަލްސާގެ ސްޕީޗް ތައްޔާރު ކުރެއްވުމުގައި ކަމަށެވެ.
އެކަމަނާ ވިދާޅުވީ މި ވާހަކަތައް ކިޔައި ދެއްވީ ތާރީހަށްޓަކައި އެ ވާހަކަތައް ކިޔައިދެއްވަން ޖެހޭ ކަމަށެވެ.
އެމްއާރުއެމުން ބޭއްވި ނަސްރުގެ ދުވަހުގެ ޖަލްސާގައި ނޮވެންބަރު ތިނެއްގައި ސިފައިންގޭގައި މަސައްކަތް ކުރެއްވި ބައެއް އޮފިސަރުންނާއި އަދި މަޝްހޫރު ކޮމީޑިއަން ޔޫސުފް ރަފީއު- ޔޫސޭ އޭނާގެ ހަނދާންތައްވެސް ކިޔައި ދެއްވިއެވެ.
އެމްއާރު އެމުން ބޭއްވި ނަސްރުގެ ދުވަހުގެ ޖަލްސާގައި ރައީސް މައުމޫންވެސް ވާހަކަ ދެއްކެވިއެވެ.
