ޖުމްހޫރީ ދުވަހުގެ ހާއްސަ ޖަލްސާގައި ވާހަކަފުޅު ފައްޓަވަމުން ރައީސް ސޯލިހް ފުރަތަމަ ވެސް ވިދާޅުވީ، މީގެ ހަތަރު އަހަރު ކުރިން ދިވެހި ރައްޔިތުންނަށް އެމަނިކުފާނު އެރުވި ޔަގީންކަމެއް ވާނެ ކަމަށެވެ.
އެއީ ދިވެހި ރައްޔިތުންގެ އުންމީދުތައް ހާސިލުކޮށްދިނުމުގައި ތަފާތު ނުކުރާނެ ކަމާއި، ތަފާތެއް ނެތި ހަމަހަމަ ކަމާއިއެކު ރައްޔިތުންނަށް ހިދުމަތްކުރުމުގައި ދެމިހުންނާނެ ކަމުގެ ޔަގީންކަން ކަމަށް ރައީސް ވިދާޅުވި އެވެ.
ދިވެހި ޖުމްހޫރިއްޔާއަށް 54 އަހަރު ފުރިގެންދާއިރު، މީގެ ހަތަރު އަހަރު ފަހަތުގެ ހަނދާންތައް އާކުރަން ޖެހޭ ކަން ފާހަގަކުރައްވާ ރައީސް ސޯލިހް ވިދާޅުވީ، މީގެ ހަތަރު އަހަރު ފަހަތަށް ހަނދާންތައް ސޮއްސާލާއިރު ފެންނަނީ، ގައުމުގައި އޮތް ހާސްކަމާއި ކަންބޮޑުވުމާއި ބިރުވެރިކަން ކަމަށެވެ.
ސަބަބެއްގެ ގޮތުގައި ރައީސް ފާހަަގަކުރެއްވީ، ގާނޫނު އަސާސީން ލިބިދީފައި އޮތް ހައްގުތަކާއި، މިނިވަންކަން ލިބިދިނުމުގައި މީގެ ހަތަރު އަަހަރު ކުރިން ކަށަވަރުކަމެއް ނެތުމެވެ.
ރައީސް ސޯލިހު ވިދާޅުވީ އޭގެ ނަތީޖާއަކަށްވީ، ވެރިކަމުގެ ނިޒާމު ކިލަބުވެ ހިނގާ ކަންކަމުގެ ދެ ފަރާތް ފެނުން އެއީ ނާދިރުކަމަކަށް ވުން ކަމަށެވެ. އޭރު ފަރުދާގެ ފުރަގަހުގަައި ހިނގިކަންކަން ނިމި މަންޒަރު ސާފުވާން ފެށިއިރު، އިންސާފަކީ އެންމެބޮޑު ބޭއިންސާފަކަށް، އަދި އަމާނާތްތެރިކަމަކީ އެންމެ ބޮޑު ހިޔާނާތްކަމަށް އޮތީ ވެނިމިފައި ކަމަށެވެ.
މީގެއިތުރުން އެދުވަހު މިނިވަންކަމާއި ހައްގުތައް ނިގުޅައިގަނެވެނީ ކާކުގެ ކޮންއިރަކު ކަމެއް އެއްވެސް މީހަކަށް ނޭނގޭ ކަމާއި، ދެން ތިބި އެންމެންނަކީ ނެތް ބަޔަކަށް އެދުވަހު ސަރުކާރުން ހެދިކަމަށް ރައީސް ވިދާޅުވިއެވެ. އަދި އެދުވަހު ސިޔާސީ މީހުންވެސް ތިބީ ކުޑަގޮޅީގައި ކަމަށް ރައީސް ވިދާޅުވި އެވެ.
އޭގެ ހަތަރު އަހަރު ފަހުން އެމަންޒަރު މިސަރުކާރުން ބަދަލުކޮށްދީ ރައްޔިތުންނަށް އިންސާފާއި ހަމަހަމަ ކަމުގެ ޖަޒީރާ ދިރިއުޅުމެއް ހޯދަައިދީފައިވާނެ ކަމަށް ރައީސް ވިދާޅުވި އެވެ.
