ކޯރަމް ހަމަނުވާ ކަމަށް ބުނެ ޓެކްސް ބޮޑުކުރުމުގެ ބިލަށް ވޯޓަށް ނާހައި އިއްޔެ ރިޔާސަތުގައި އިންނެވި ވިލުފުށީ ދާއިރާގެ މެމްބަރު ހަސަން އަފީފު މަޖިލިސް ނިންމާލުމުން އިއްޔެ މަޖިލީހުގައި ކޯޅުން ބޮޑުވި އެވެ.
މެމްބަރުން ބުނާގޮތުން ރިޔާސަތުން އިއްޔެ މަޖިލިސް ނިންމާލީ، ވޯޓްލާގަޑި އިއުލާނު ނުކޮށް ވޯޓުގެ ފަސްމިނެޓް ކުރިން ޖަހަންޖެހޭ ރަގަބީލް ވެސް ނުޖަހަ އެވެ. އަދި ވޯޓަށް އަހާނެ މެޖޯރިޓީ ނެތްކަމަށް ވިދާޅުވެ ރިޔާސަތުން މަޖިލިސް ނިންމާލިއިރު ކޯރަމްވެސް އޮތީ ހަމަޔަށް ކަމަށް ބުނެ އިއްޔެެ މެމްބަރުން ވަރަށް ބޮޑަށް ހިތްހަމަ ނުޖެހުން ފާޅުކުރި އެެވެ.
މަޖިލީހުގެ ރިޔާސަތުން ކަންކުރެއްވި ގޮތް ދިފާއު ކުރައްވާ، ރައީސް ނަޝީދު މިއަދު މަޖިލިސް ފަށްޓަވަމުން ވިދާޅުވީ، މަޖިލީހުގެ ޖަލްސާ ނިންމަން ގަވާއިދުގައި އޮންނަނީ އެންމެ ގޮތެއް ކަމަށެވެ.
މަޖިލީހުގެ ނިންމުން ގަވާއިދާއި ހިލާފުކަމަށް މެމްބަރުންނަށް އޮޅިވަޑައިގެންފައިވާތީ ކަމަށް ވިދާޅުވެ، ރިޔާސަތުން އަންގާ އެންގުމެއްގެ ގޮތުގައި މިހެން ނަޝީދު ވިދާޅުވުމުން، ނިޒާމީ ނުކުތާއެެއް ނަންގަވާ މަރަދޫ ދާއިރާގެ މެމްބަރު އިބްރާހިމް ޝަރީފު (މަވޯޓާ) ވިދާޅުވީ، އެގޮތަށް އެކަން ހިނގިނަމަ ވަރަށް ރަނގަޅުވީސް ކަމަށާއި އެކަމަކު އިއްޔެ މަޖިލީސް ނިމުނީ ތިން ގޯސް ހަދައިގެން ކަމަށެވެ.
އެގޮތުން ކޯރަމް ހަމަވެފައިއޮއްވާ ކޯރަމް ހަމަނުވާކަަމަށް ވިދާޅުވެ މަޖިލީސް ނިންމުން ގޯސްކަމަށް ޝަރީފް ވިދާޅުވި އެވެ. އެޔާއިއެކު އޭނާގެ ވާހަކަ މެދުކަނޑުވާލުމަށްފަހު ނަޝީދު ވިދާޅުވީ، މެމްބަރު ޝަރީފް އިއްޔެ ރިޔާސަތުގައި އިށީނެވިތަން ދެކެވަޑައިގެން ކަމަށާއި އެއީވެސް ގޯހެއްް ކަމަށެވެ.
އިއްޔެގެ މަޖިލީހުގައި ވޯޓަށް އަހާފައި ނުވަނީ ތިންވަނަ ކިޔުން ނީއްވާތީ ކަމަށް ނަޝީދު ވިދާޅުވިނަމަވެސް އިއްޔެ ރިޔާސަތުން މަޖިލިސް ނިންމާލާ ސަބަބަކަށް ވިދާޅުވީ ކޯރަމް ހަމަނުވުމެވެ. އެހެންވެ، މެމްބަރުން ދެކެނީ އެއީ ގަވާއިދުގައި އެކަން ކުރެވޭނެ ގޮތެއް ނޫން ކަމަށެވެ.
އިއްޔެ މަޖިލީސް ނިންމާލިކަން އިއުލާންކުރެއްވުމަށް މަޖިލިސް ހޫނުވެފައިވަނިކޮށް އަފީފް ވަޑައިގަތީއެވެ. އެޔަށްފަހު އެގޮނޑީގައި މެމްބަރު ޝަރީފް އިށީދެވަޑައިގެން އިންނެވިތަން ފެނު ނެވެ.
