ރާއްޖޭގެ ބްރޯޑްކާސްޓިން ހިދުމަތް، ވަކިން ހާއްސަކޮށް "ދިވެހިރާއްޖޭގެ އަޑު" ތަރައްގީ ކުރެއްވުމުގައި އަގުހުރި ހިދުމަތްތަކެއް ކުރެއްވި ސަމަރުބުލޫ އިބްރާހީމް މަނިކު އަވަހާރަވީ އާލާސްކަންފުޅަށް ފަރުވާ ހޯއްދަވަމުން ގެންދަވަނިކޮށް އިންޑިޔާގައެވެ. އިބްރާހީމް މަނިކު އެންމެ ފަހުން އާއްމުކޮށް ބައްދަލުވުމަކުން ފެނުނީ، ބްރޯޑްކާސްޓިން ކޮމިޝަނުން ސެޕްޓެމްބަރު މަހު ބޭއްވި ބްރޯޑްކާސްޓިން އެވޯޑް ހަފުލާގަ އެވެ. އެ ރޭ އިބްރާހީމް މަނިކަށް ރައީސް އިބްރާހީމް މުހައްމަދު ސޯލިހު ވަނީ ލައިފްޓައިމް އެެޗީވްމަންޓް އެވޯޑް ދެއްވާފައެވެ.
އިބްރާހީމް މަނިކު ވަކިވެގެން ދިޔުމަކީ ދިވެހި ބްރޯޑްކާސްޓިންއަށް އަދި އެ މަނިކުފާނާ އެކުގައި މަސައްކަތް ކުރެއްވި ބޭފުޅުންނަށް ލިބިގެންދާނެ ފުން ހިތާމައެކެވެ. ދިވެހިރާއްޖޭގެ އަޑުގައި އިބްރާހީމް މަނިކުގެ ދަށުން މަސައްކަތް ކުރެއްވި ނަސްރުﷲ އިދުރީސް އެކަން ސޯޝަލް މީޑިއާގައި ފާހަގަ ކުރެއްވިއެވެ.
އިބްރާހީމް މަނިކުގެ އެންމެބޮޑު ގަައުމީ ޚިދުމަތްތަކުގެ ތެރެއިންވެސް އެންމެ ބޮޑަށް ފާހަގަ ކުރެވޭނެ އެއް ދާއިރާއަކީ ދިވެހި ރާއްޖޭގެއަޑުގެ ޚިދުމަތްތަަކެވެ. މުޅި ރާއްޖޭގެ އެންމެހައި ކަންކޮޅުތަކަށް ވަގުތުން ވަގުތަށް ޚިދުމަތް ލިބެންފެށި ހަމައެކަނި މީޑިއާއަކީ އަދި މުއާސަލާތުގެ ވަސީލަތަކީ ދިވެހިރާއްޖޭގެ އަޑު ކަމުގައި ހެއްދެވުމުގެ އިސް މޭސްތިރިއަކީ އިބްރާހީމް މަނިކެވެ. މިއީ ދިވެހިރާއްޖޭގެ އަޑަށް ލިބިފައިވާ އެންމެ ބޮޑު ތާރީޚީ ޝަރަފާއި ފަޚުރު ކަމަށް އަޑުގައި ކުރިން މަސައްކަތް ކުރެއްވި ތާރީޚު ލިޔުންތެރިޔާ މުހައްމަދު ޝާތިރު ވިދާޅުވިއެވެ.
އިބްރާހީމް މަނިކު ބްރޯޑްކާސްޓިންގެ ހިދުމަތާ ގުޅިވަޑައިގަތީ، އިބްރާހީމް ނާސިރުގެ ރައީސްކަމުގައި 1974 ވަނަ އަހަރުއެވެ. އެންމެ ފުރަތަމަ ކުރެއްވި މަސައްކަތަކީ "ރޭޑިއޯ މޯލްޑިވްސް" ގެ އިނގިރޭސި ސެކްރެޓަރީއެއްގެ ގޮތުގައި މަސައްކަތް ކުރެއްވުމެވެ. ޕްރޮގްރާމް އުފެއްދެވުމަށް ޝައުގުވެރިކަން ހުންނާތީ އެ ދާއިރާ އިން ފަހުން ކުރިއަށް ވަޑައިގަތީ އެވެ. ފުރަތަމަ އުފެއްދެވީ "ލަންކާގެ ޖައްވުން" ނަމަކަށް ކިޔާ ސިންގަޅަ ލަވަ ޕްރޮގްރާމެކެވެ.
އިންފޮމޭޝަން މިނިސްޓަރުކަން އިބްރާހީމް މަނިކަށް ދެއްވީ ރައީސް މައުމޫނުގެ ވެރިކަމުގައެވެ. އިންފޮމޭޝަން މިނިސްޓަރުކަން ލިބިވަޑައިގަތުމުން އިބްރާހީމް މަނިކު ވަނީ ރޭޑިއޯ އާއި ޓީވީގެ ހިދުމަތަށް ބޮޑެތި ބަދަލުތަކެއް ގެންނަވައި އެ ދާއިރާ ތަރައްގީ ކުރައްވައިފަ އެވެ. ރާއްޖޭގެ ރަށްރަށަށް ޓީވީގެ ހިދުމަތް ދޭން ފެށީ އޭނާގެ ދައުރުގަ އެވެ.
އިބްރާހީމް މަނިކަކީ ބްރޯޑްކާސްޓިންގެ އިތުރުން ފުޓްބޯޅައިގެވެސް ބޭފުޅެކެވެ. އިބްރާހިމް މަނިކުވަނީ ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ ޗެއާމަންކަން ވެސް ކުރައްވައިފަ އެވެ. އޭނާގެ ޗެއާމަންކަމުގެ ދަށުން ރާއްޖޭގެ ފުޓްބޯޅަ، ދެކުނު އޭޝިއާ ދޫކޮށް ދެކުނު އިރުމަތީ އޭޝިއާ އަށް ގެންދިއުމަށް މަސައްކަތްކުރެއްވި އެވެ.
އިބްރާހީމް މަނިކު އެފްއޭއެމް ހިންގެވިއިރު، ދިވެހި ފުޓްބޯޅަ އަށް 50 އަހަރު ފުރުމުގެ މުނާސަބަތުގައި 2000 ވަނަ އަހަރު ގޯލްޑެން ޖުބިލީ ފުޓްބޯޅަ މުބާރާތް ބޭއްވިއެވެ. އެއީ މިހާތަނަށްވެސް ރާއްޖޭގައި ބޭއްވުނު އެންމެ ފޯރިގަދަ އެއް ބައިނަލް އަގްވާމީ މުބާރާތެވެ.
