ސުޕްރީމް ކޯޓުން ނެރެފައިވާ ޝަރީއަތުން އަދަބު ކަނޑައެޅުމުގައި އަމަލުކުރާނެ ގޮތުގެ އުސޫލުގެ 30 ވަނަ މާއްދާގައި, ހުކުމުގައި ކަނޑައެޅިފައިވާ މުއްދަތުގައި ޖޫރިމަނާގެ ފައިސާ ނުދައްކައިފިނަމަ، އެ މުއްދަތު ފާއިތުވާތާ 30 ދުވަހުގެ ތެރޭގައި އެއޮފީހުން ކޯޓަށް އެކަން އަންގަން ވާނެކަމަށް ބަޔާންކޮށްފައި ވެއެވެ.
ޕީޖީ އޮފީހުގެ ޕަބްލިކް ޕްރޮސެކިއުޓަރު އަހުމަދު ޝަފީއު މިއަދު ”ސީއެންއެމް“ އަށް ވިދާޅުވީ، އެފަދަ މީހުންގެ މައުލޫމާތު މޯލްޑިވްސް އިންލޭންޑް ރެވެނިއު އޮތޯރިޓީ(މީރާ) އާއި ގުޅިގެން ހޯދައި އެމައުލޫމާތު ހުށަހެޅުމުގެ މަސައްކަތް މި ނޮވެމްބަރުން ފެށިގެން ކުރަމުންދާ ކަމަށެވެ.
މިހާތަނަށް ހޯދި މައުލޫމާތަށް ބަލާއިރު ބައެއް މީހުންގެ މައްޗަށް ކުށުގެ އަދަބުގެ ގޮތުގައި ކަނޑައަޅާފައިވާ ޖޫރިމަނާ ފައިސާ, ހުކުމާ އެއްގޮތަށް ދައްކަމުން ނުދާކަން ފާހަގަވެފައިވާ ކަމަށް ޕީޖީ އޮފީހުން ބުންޏެވެ. އެމީހުންގެ އަދަދު ތަފާސް ހިސާބުތައް އެއްކޮށް ނިމުމުން ހާމަކުރާނެ ކަމަށް ޝަފީއު ވިދާޅުވި އެވެ. އެފަދަ ގިނަ ބަޔަކު ތިބިކަން ފާހަގަކުރައްވާ ޝަފީއު ވިދާޅުވީ، އެއީ އަދަބު ކަނޑައެޅޭނެ ކަމެއްކަން ގިނަ ފަރާތްތަަކަށް ނޭނގޭ ކަމަށެވެ.
ޕީޖީ އޮފީހުން އެމީހުންގެ މައުލޫމާތު ކޯޓަށް ހުށަހެޅުމުން އެފަދަ މީހުންގެ މައްޗަށް އަލުން ޖަލު އަދަބު, ނުވަތަ ޖޫރިމަނާ އަދަބަށްވުރެ ބުރަ އަދަބެއް އެ ގަވާއިދުގެ 39 ވަނަ މާއްދާގެ ދަށުން ފަނޑިޔާރަށް ކަނޑައެޅޭނެ އެވެ.
