ފުރަގަސްދީގެން ރިސެޕްޝަނިސްޓާއި ވާހަކަ ދައްކާން ހުރި ފިޒާ، ލަވާންޔާގެ ލޮލުގައި އަޅައިގަތުމަށް ވަގުތުކޮޅޅެއް ނެގި އެވެ. އަވަސް ފިޔަވަޅުތަކުގައި ބާރަށް ގޮސް، ފިޒާގެ އަތުގައި ހިފައި ވަރަށް ބާރަށް ލަވާންޔާއާއި ދިމާއަށް އަނބުރާލީ ގަދަކަމުންނެވެ.
"ކިހިނެއް ވެގެންތަ ތިއުޅެނީ..؟" ރުޅިއައިސް ރަތްވެފައިވާ ލަވާންޔާއާއި ދިމާއަށް ފިޒާ ބުނެލި އެވެ.
"ކަމެއް ވެގެން މިއުޅެނީ މަށަށްތަ..؟" އަޑުގައި ހުރި ބާރެއް ލާފައި ލަވާންޔާ، ފިޒާއާއި ކުރިމަތިލި އެވެ.
"ވެގެން އުޅޭކަމަކާއި ކަލޭ ބޭނުންވެގެން ތިއުޅޭ އެއްޗެއް ނިކަން ސާފުކޮށް ބުނެދީބަލަ..! ފައިސާއާއި މުއްސަނދިކަންތަ..؟ މަޝްހޫރުކަމާއި މަގުބޫލުކަންތަ..؟ ނޫނީ އެހެން އެއްޗެއް ބޭނުންވަންޏާވެސް ބުނެލައިގެން އުޅެބަލަ..!" ވިހަގަދަ ޖަނަވާރެއް ފަދައިން ފިޒާއާއި ދިމާއަށް ލަވާންޔާގެ ހަމަލާ އަމާޒުކުރި އެވެ.
'ތިޔަ ކިޔާއެއްޗެއްވެސް، ތި ބުނަންއުޅޭ އެއްޗެއްވެސް އަހަންނަކަށް ނުވިސްނުން..!" ވާނުވާ ނޭގިފައި ފިޒާ ބުނެލި އެވެ.
"އޯހހހ.. މާ މާތް މީހަކަށް ވާންއުޅޭނެކަމެއް ނެތް..! އަހަރުމެން އެންމެންނަށް ވަރަށް ރަގަޅަށް އިނގޭ ކަލޭތިއީ ކާކުކަމާއި ކަލެއަކީ ކޮން ފާޑެއްގެ މީހެއްކަން.. ފިރިހެނުން ފަހަތުން ދުވެގެން ކައިގެން ބޮއެގެން އުޅޭ، ހަޔާތްކުޑަ ގޮތްކުޑަ އަންހެނެއް ކަލޭތިއީ..!" ދެކޮނޑުގައި އަތް އަޅުވައި ކޮށްޕަމުން ލަވާންޔާ ފިޒާއަށް މަލާމާތްކޮށް ފުރައްސާރަކުރި އެވެ.
"ކަލޭ މިތަނަށް ވަދެގަނެގެން ތިއުޅެނީ ކޮންކަމެއް ހާސިލްކުރަންވެގެން..؟ ތާބިޝް ލިބޭނެކަމަށްތަ؟ ހިތަށްވެސް ނާރުވާތި..! ތާބިޝްއަކީ އަހަރެންގެ ހައްގެއް.. އެއީ އަހަރެންގެ ލޯބި..! ތާބިޝްއަކީ ހަމައެކަނި އަހަރެންގެ މީހެއް.. ކަލޭކަހަލަ ގަމާރު ޖާހިލެއް ފަހަތުން ތާބިޝް ދުވާނެކަމަށް ހީނުކުރާތި..!" ފިޒާ ކޮށްޕަމުން ލަވާންޔާ އެއްޗެހިކި އެވެ.
މުވައްޒަފުންނާއި އޮފީހަށް އެކި ބޭނުންތަކަށް އައިސްތިބި އެތައް ބައެއްގެ ކުރިމަތީގައި އަޑު ގަދަކޮށް ލަވާންޔާ ދިޔައީ އެއްޗެހިކިޔައި ފިޒާއަށް ފުރައްސާރަކުރަމުންނެވެ.
"ލަވާންޔާ...! ކޮން ޑްރާމާއެއް މިތަނުގައި ކުރިއަށްމިދަނީ..؟ ފިޒާއަށް ތުހުމަތުކޮށް ކޮންފަދަ ހުތުރު އިލްޒާމްތަކެއް ތި އަޅުވަނީ..؟ އަހަރެންގެ މުވައްޒަފުންނަށް ފުރައްސާރަކުރުމަކީ އަހަރެން ތަހަންމަލްކޮށް ކުޅިބަލަން ހުންނާނެ ޒާތުގެ ކަންކަމެއް ނޫން..! ފިޒާއަކީ އަހަރެންގެ އެންމެ ހާއްސަ މުވައްޒަފު.. އޭނާއާއި ބެހޭގޮތުން ތިފަދަ ވާހަކަތަކެއް ނުދެއްކޭނެ..!" ވަރަށް ނުރުހުންވެފައި ބައްސާމް ހައިދަރް ލަވާންޔާއާއި ކުރިމަތިލި އެވެ.
މީޓިން ރޫމްގައި އޮތް ބައްދަލުވުން ނިންމާފައި ނިކުތްވަގުތު އޮފީސްތެރޭގައި އަޑުގަދަވުމުން، ވެގެން އުޅޭގޮތް ބަލައިލާން ރިސެޕްޝަން ސަރަހައްދަށް ބައްސާމް ހައިދަރް އައީ އެވެ. ލަވާންޔާ ތުހުމަތު އަޅުވައި އެއްޗެހިކިޔަމުން ދިޔައީ ފިޒާއަށްކަން އެނގުމުން ދުރުގައި ނުހުރެ ފިޒާގެ ދިފާއުގައި ބައްސާމް ތެދުވީ އެވެ.
"މިސްޓަރ ބައްސާމް ހައިދަރް، އަޅުގަނޑު ވަރަށް އިހްތިރާމްކުރަން ތި ބޭފުޅާއަށް.. އެކަމަކު މިފެންވަރުގެ މީހުން، މިކަހަލަ އިއްޒަތްތެރި އޮފީސްތަކަށް ފޮނުވާއިރު، އަދަބު އަހްލާގައި މަސައްކަތު މާހައުލުގެ ރީތި އާދަކަށް ކޮންމެވެސް ވަރަކަށް ދަސްކޮށްދީފައި ފޮނުވާ.." ފިޒާއާއި ދިމާއަށް ދެ ލޯ ވައްކޮށްފައި ލަވާންޔާ ވާހަކަދެއްކީ ބައްސާމް ހައިދަރްއާއި އެވެ.
"މާނައަކީ ކޮބާ؟ ކިޔަން ތިޔައުޅެނީ ކީކޭ..؟ އަހަރެންގެ ކުންފުނީގެ އެންމެ ލޯޔަލް، ހުރިހައި ގޮތަކުން އެންމެ ރަގަޅު މުވައްޒަފަކީ ފިޒާ..! އެއަށްވުން ބުރަކޮށް މަސައްކަތްކުރާ، އެއަށްވުރެން ޕްރޮފެޝަނަލް މީހަކު އަހަރެންގެ ހަޔާތުގައި ދުވަހަކުވެސް ނުދެކެން..! ތިޔަފަދަ ހުތުރު އިލްޒާމެއް ފިޒާގެ ބޮލަކު ނޭޅުވޭނެ.. ތިއީ ކަނޑައެޅިގެން ދޮގުވާހަކައެއް..؟" އިސްޖަހައިގެން ހުރި ފިޒާގެ މޫނަށް ބަލައިލުމަށްފަހު، ބައްސާމް ހައިދަރުގެ ތައުރީފް ފިޒާއަށް ބަންޑުންކޮށްލި އެވެ.
"އާދެ.. އާދެ.. އެހެންވެ ޕްރޮޖެކްޓްގެ މަސައްކަތް ފެށީންސުރެން، ތާބިޝްގެ ފަހަތުން އަޅައިގަނެގެން އެ އުޅެނީ.. ތިޔަ ވިދާޅުވީ ވަރަށް ރަގަޅަށް.. ވަރަށް ބުރަކޮށް ތާބިޝް އަތުއަޅުވާލެވޭތޯ މަސައްކަތްކުރަމުން ދަނީ..؟" މަލާމާތުން ފުރިގެންވީ ހިނިގަނޑަކާއެކު ލަވާންޔާ ބުނެލި އެވެ. ލަވާންޔާ ފަދަ ގޮތެއް ނެތް އަންހެންކުއްޖެއްގެ ކުރިމަތީގައި ހުރުމަކީ ބައްސާމް އައިދަރްއަށް ފަސޭހަކަމަކަށް ނުވި އެވެ.
"ތާބިޝްއަކީ ކަލެއާއި އަރާއަރަފޯދިގެންވާ މީހެއް ނޫން.. ކަލެއާއި އެއްފެންވަރެއްގެ މީހަކު މި އޮފީހަކު ނޫޅޭ.. ވަން ދޮރު އެހުރީ.. އަވަސްގޮތަކަށް މިތަނުން ނިކުމެގެން ދިއުން އެއީ އެންމެ ރަގަޅުގޮތް..! ކަލޭގެ އެނދު ހޫނުކޮށްދޭކަށްވެސް، ކަލެއާއާއެކު އެނދު ފަޅުފިލުވާކަށްވެސް ތާބިޝް ނުދާނެ..! އަމިއްލަ ފިރިމީހާ، ކަލޭ ދޫކޮށްލާފައި ދިޔާމައި އެހެންމީހުންގެ ފިރިންނާއި އެހެން މީހުންގެ ލޯބިވެރިން ހޯދައިގެން ކަލޭގެ އެދުންތައް ފުއްދަން އެހެން ކޮންމެވެސް މިސްރާބެއް ހޯދާ..! ގޮތްކުޑަ ލަދުކުޑަ...!"
ލަވާންޔާގެ ޖުމުލަ ފުރިހަމަ ނުވަނީސް ބާރުގަދަ އަތަކުން ލަވާންޔާގެ އަތުގައި ހިފައި ދަމައިގަތެވެ. އެންމެ ސިކުންތެއްވެސް ބޭކާރު ނުކޮށް ލަވާންޔާގެ މޫނުމަތީގައި ބާރުގަދަ އެތިފަހަރެއް އަޅާލައިފި އެވެ.
ލިބުނު ޝޮކްގައި ލޯ މަރައިލުމަށްފަހު، އުނދަގުލުން ލަވާންޔާގެ ލޯ ހުޅުވާލާފައި ކުރިމަތީގައި ހުރި މީހާއާއި ދިމާއަށް ބަލައިލި އެވެ. މޫނުމަތީގައި ހޫނުގަދަ އެތިފަހަރެއް ދިނުމަށްވުރެން ލަވާންޔާ އަންތަރީސްވީ، އެވަގުތު އެތަނަށް ތާބިޝްއަށް އައީތީ އެވެ. ކެބިންގެ ދޮރު، ބޭރުން ތަޅުލީ ފިޒާއާއި ކުރިމަތިލުމަށް ފުރުސަތު ހޯދާށެވެ. ނަމަވެސް ކަންކަން ލަވާންޔާ ބޭނުންވި ހިސާބަށް ނުގެންދެވެނީސް ތާބިޝް މިހުރީ ކުރިމަތީގަ އެވެ. ލަވާންޔާއަށް ނޭގުނު ހަގީގަތަކީ ލަވާންޔާއަށް ހުރެވުނީ ތާބިޝްގެ އޮފީހުގައި ކަމެވެ. ތާބިޝްގެ އެންމެ ފޯނުކޯލަކަށް އަންނާނެ އެތައް މީހަކު އެ އޮފީހުގައި މަސައްކަތްކުރާނެކަމެވެ. ތާބިޝް ގުޅާލުމާއެކު އައިސް، ކެބިންގެ ދޮރުހުޅުވީ ޕިއޯން އެވެ.
ކެބިން ދޮރުހުޅުވުމާއެކު ޕިއޯން ދިން ހަބަރަކުން ތާބިޝްގެ ދެފައި ބިމުން ކެހިގެންދިޔަ އެވެ. ދެފައިގައި ހުރި ބާރެއްލާފައި ދުވަމުން ރިސެޕްޝަން އޭރިއާއަށް އެ އައީ ފިޒާގެ ހައްގުގަ އެވެ.
"ނޮޓް އަ ވޯރޑް އެގެއިންސްޓް ފިޒާ..!" ރުޅިއައިސް ރަތްވެފައި ތާބިޝް ބުނެލީ ދަތްކުނޑި ވިކާފަ އެވެ.
"ތާބިޝް.." ދެލޮލުން ފެން އައިސްފައި ހުރެ، ހޫނު އެތިފަހަރު އަމާޒުވި ކޮލުގައި ހިފަހަށްޓައިގެން ލަވާންޔާއަށް ބުނެވުނީ ތާބިޝްގެ ނަމެވެ.
ތާބިޝްގެ ދެ ލޮލުން އަލިފާން ކަނި ބުރާވަރަށް އޭނާވަނީ ރުޅިގަދަވެފަ އެވެ. މިއީ ލަވާންޔާއަށް ކެތްކުރެވުނު މަންޒަރަކަށް ނުވި އެވެ.
"އަހަރެންގެ މޫނުމަތީގައި ތި ޖެހީ، މިހިރަ ލަދުކުޑަ އަންހެނާގެ ހައްގުގައިތަ..؟" ގޮތްދޫކުރުމެއް ނެތި ލަވާންޔާ ކުރިމަތިލި އެވެ.
"ލަވާންޔާ..!"
މުޅި އޮފީހަށް އަޑުއިވޭވަރަށް ތާބިޝް ހަޅޭއްލަވައިގަތެވެ. ތާބިޝްގެ މި މިޒާޖަކީ އޭނާގެ މުވައްޒަފުން ދުވަހަކކުވެސް ދެކިފައިވާ ސިފައެއް ނޫނެވެ. ރުޅިގަދަވެގެން ތާބިޝް ތުރުތުރު އަޅާ އެވެ.
"އަހަރެންގެ އިބާރާތް ދޭހަވުމުގައި އޮޅުމެއް އުޅެނީތަ..؟ އަހަރެން ބުނީ ފިޒާއާއި ބެހޭގޮތުން އެއްވެސް އެއްޗެއް ނުބުނާށޭ..!" ތާބިޝް ހަޅޭއްލެވީ ކަރުބުޑުން އަޑު ނެރިގެންނެވެ.
"ތާބީޝް، ކިހިނެއް ވެގެންތަ ތިއުޅެނީ..؟ އެއީ ކާކުކަން ތާބިޝްއަކަށް ނޭގޭނެ.. މާ މައުސޫމް އަންހެނަކަށްވެގެން ދަޅަދައްކައިގެން އޭނާ އެއުޅެނީ ތާބިޝްވެސް އޭނާގެ މަޅީގައި ޖައްސަންވެގެން.. އޭނާއާއި ބެހޭގޮތުން އެއްވެސް އެއްޗެއް ތާބިޝްއަކަށް ނެގޭނެ..!" ހަތިޔާރު ބަހަށްޓަން ލަވާންޔާ ހިތަށްވެސް ނޭރި އެވެ.
މަޑުމައިތިރިކަމާއެކު ވާހަކަދެއްކީ ތާބިޝްއަށް ވިސްނައިދެވޭތޯ އެވެ. ލަވާންޔާއާއިމެދު ތާބިޝްގެ ހިތް ސާފުކޮށް، ފިޒާއަށް ނުރައްކަލެއްކަމުގައި ތާބިޝް ހެދޭނެ ގޮތަކާއި މެދުގައި ލަވާންޔާ ވިސްނި އެވެ.
ދެކެވެމުންދިޔަ ވާހަކަތަކާއި އަޅުވަމުންދިޔަ ތުހުމަތުތަކާއި ކުޅިބަލަމުންދިޔަ މުވައްޒަފުންނާއި އެހެނިހެން މީހުންގެ ފޯނުތަކުގައި ރައްކާކުރަމުންދިޔަ މަންޒަރުތައް ފިޒާއަށް ބަލައެއް ނުގަނެވުނެވެ. ގަތްލަދާއި ގެނުވި މާޔޫސްކަމަކީ އެހެން އިންސާނަކަށް އަންދާޒާކުރާން ފަސޭހަ ކަންކަމެއް ނޫނެވެ. ހިތަށް ކެތްނުވުމުން ދެ ކޯތާފަތުން ހޯސްލާފައި ކަރުނަ ދެމިގަތެވެ. ކޮޅަށް ހުނންނާނެ ހަކަތައެއް ނުލިބުމުން ބިންޗަށް ވެއްޓިގަނެވުނީ އަނިޔާވެރި މިދުނިޔޭގައި ދުވަހަކުވެސް އިންސާފެއް ނުލިބޭނެކަން ކަށަވަރު ކޮށްފަ އެވެ.
"އަހަންނަށްވުރެން ރަގަޅަށް ފިޒާ ދަންނާނެ އެހެން އެއްވެސް އިންސާނަކު މި ދުނިޔޭގައި ނުހުންނާނެ..!" ތާބިޝްގެ މަޑުމައިތިރި، އެހެންނަމަވެސް އިންޒާރުގެ ބުނެލުމަކުން މުޅިތަނަށް ހިމޭންކަން އައެވެ.
"ސީރިއަސްލީ...! ޔޫ ޑޯންޓް ނޯ ހަރ ތާބިޝް..! އިނދެގެން އުޅުނު ފިރިމީހާވެސް އޭނާ ގެއިން ނެރި ބޭރުއަރުވާލީ، ލަދުހަޔާތެއް ނެތުމުން.. ފިރިމީހާގެ ގެއަށް ހިލޭ ފިރިހެނުން ވައްދައިގެން ހުތުރު ކުޅިވަރުކުޅޭ ރަންޑީއެއް ތިއީ..!" ލަވާންޔާ ހިތުން، އޭނާގެ މި މައުލޫމާތަކީ ތާބިޝް އޭނާގެ ކޮޅަށް އަނބުރާލަން ލިބެން އޮތް ލައިސަންސެކެވެ. ނަމަވެސް ރައްދުއައީ ދިމާ އިދިކޮޅަށެވެ.
ލަވާންޔާގެ ދެ ކޮނޑުގައި ހިފާ ބާރުކޮށްފައި ތާބިޝް ކޮށްޕާލި އެވެ. ނަމަވެސް ބިމަށް ނުވެއްޓި ލަވާންޔާ ސަލާމަތްވީ، އޭނާ ވައްޓާލުމުގެ މަގުސަދެއް އެ ހަރަކާތުގައި ތާބިޝްގެ ނެތުމުންނެވެ.
"ލަވާންޔާ..! ދާދި ދެންމެ އަހަރެން މިބުނީ، އަހަންނަށްވުރެން ރަގަޅަށް ފިޒާ ދަންނާނެ އެހެން އެއްވެސް އިންސސާނަކު މިދުނިޔޭގައި ނުހުންނާނެޔޭ..!" ޔަގީންކަމާއި އެކު ބުނެލަމުން ތާބިޝްގެ ހަށިގަނޑު ސީދާކޮށްލި އެވެ. ލަވާންޔާގެ ފިޔަވަޅު ފަހަތަށް އެޅުނީ ތާބިޝްގެ އަޑުގައި ހުރި ޔަގީންކަމުގެ ސަބަބުންނެވެ.
"ކިހިނެއް- ތާބިޝް- އަށް- އެކަން- އިނގެނީ..؟" ބިރުން ތުރުތުރު އަޅަމުން ލަވާންޔާ ސުވާލުކުރި އެވެ.
"އެއީ.. އަހަރެން މިއީ ފިޒާގެ ފިރިމީހާ..! ފިޒާއަކީ އަހަރެންގެ އަލަތު އަނބިމީހާ..! އަހަރެންގެ އަނބިމިހާއާއި ހިލާފަށް އެޗެއް ބުނެވޭނެ މީހަކު މި ފުރާޅުގެ ދަށުގައި ނުހުންނާނެ.. އަހަރެން ތަކުރާރުކޮށް ބުނަން، ފިޒާއަށް ތުހުމަތުކޮށް ބުނެވޭނެ ނުވަތަ ދެއްކޭނެ އެއްވެސް ހުތުރު ވާހަކައެއް، ހުތުރު އިލްޒާމެއް ނުވަތަ ހަޑިހުތުރު ފުރައްސާރައެއް ނުހުންނާނެ.. އެފަދަ މީހަކު ހުރިއްޔާ އަހަރެންގެ ކުރިމައްޗަށް މިވަގުތު އާދޭ..! ކަލޭމެންގެ ޝައްކު އަހަރެން ސާފުކޮށްދޭނަން.. އަހަރެންގެ އަންހެނުންގެ އިއްފަތްތެރިކަމާއި މާތް އަހްލާގައި އަބުރުވެރިކަން ސާބިތުކޮށްދޭނަން..!" އެތަނުގައި ތިބި އެންމެންގެ މައިބަދައިން ހީބިހިނަގާވަރަށް ބާރަށް ތާބިޝް ބުނެލި އެވެ. އެއްވެސް މީހަކަށް ގުޑާލަންވެސް ނުކެރުނެވެ.
ލަވާންޔާގެ މޫނުން މީހަކު ފެން ދަމައިގަތްފަދަ އެވެ. އެސްފިޔަ ޖަހައިނުލާ ބަލަމުން ގެންދިޔައީ ތާބިޝޝްއަށެވެ. އެންމެ ސިކުންތަކަށްވެސް ތާބިޝްގެ ނަޒަރު ފިޒާއާއި ދުރަށް ނުލަ އެވެ. ލަދުގަނެ، ދެރަވެފައި ހުރެ ތާބިޝް ފިޒާގެ ކުރިމަތީގައި އިސްޖަހައިލި އެވެ. ކަކޫ ލަންބައި އެއްފައިމައްޗަށް އިށީނެވެ.
"ފިޒާ" މަޑުމަޑުން ފިޒާއަށް ގޮވައިލަމުން ފިޒާގެ ދެއަތުގައި ހިފާލި އެވެ.
"އައި އެމް ސޮރީ!" މަޑުމަޑުން ތާބިޝް ބުނެލި އެވެ.
ވަށައިގެން ތިބި އެއްވެސް މީހެއްގެ ހަރަކާތަކަށް ނުވަތަ އެމީހުންތިބީތީވެ، ޖެހިލުންވުމެއް ނެތި ފިޒާގެނެސް ތާބިޝްގެ ދެއަތުގެ ތެރޭގައި ބޮނޑިކޮށްލި އެވެ.
ގިނައިރެއްނުވެ، ފިޒާގެ އަތުގައި ހިފައިގެން ކޮޅަށް ތެދުވި އެވެ. ވަށައިގެންތިބި އެންމެންނާއި ދިމާއަށް ނުރުހުންވެ ހުރެ ތާބިޝް ބަލައިލި އެވެ. އެއާއެކު ފިޒާ ގޮވައިގެން، ބާރު ހިނގުމުގައި އެތަނުން ހިނގައްޖެ އެވެ.
.....................
އެއްވެސް އެއްޗެއް ނުބުނެ ފިޒާ ގޮވައިގެން ނިކުމެގެން ދިޔައީ އޮފީހުގެ ޕާކިންއަށެވެ. ކާރުދޮރު ހުޅުވާފައި ޕެސެންޖަރ ސީޓުގައި އިށީނުމަށް ފިޒާއަށް މަޖުބުރުކުރި އެވެ.
ތާބިޝްގެ ސިކުނޑީގައި ދައުރުވަމުންދިޔައީ ދާދި ދެންމެ ހިނގައިދިޔަ ބިރުވެރި ކަންތައްތަކެއް ނޫނެވެ. އޭގެ މާކުރީގެ ހަނދާންތަކެއްގެ މަންޒަރު ތާބިޝްގެ ސިކުނޑީގައި ރޯލްވަމުންދިޔަ އެވެ. ދެމީހުންގެ ލޯބީގެ ދުވަސްތަކެވެ. އުފާވެރިކަމާއި ހިނިތުންވުމެވެ. އެކަކު އަނެކެކަށްޓަކައި ކުރި އިންތިޒާރުގެ ފޮނިފޮނި ހަނދާންތަކެވެ.
ދާދި ގާތުގައި ފިޒާ އިނެވެ. ދެލޮލުން ފައިބަމުންދިޔަ ކަރުނައިގެ ފައްވާރާއަކަށް ބަދަލެއް ނާދެ އެވެ. ލަވާންޔާގެ ހުތުރު އިލްޒާމްތަކުން ފިޒާގެ ހިތް ކުދިކުދިވެއްޖެ އެވެ. ދެ ލޯ މަރައިލެވުނީ އެ އަޑުތަކާއި އިލްޒާމްތަކުން ދުރަށްދެވޭތޯ އެވެ. ހިޔާލުގެ އޮއެވަރުގައި ފިޒާއަށް ދަތުރުކުރެވުނީ އޭނާ ބޭނުންވި އައްސޭރިއަކަށް ނޫނެވެ. ކަންފަތުގައި ގުގުމާލީ އަހަރުތަކެއް ކުރީން، ތާބިޝް ވެފައިވާ ވައުދެކެވެ.
"އަހަރެން ވަރަށް ވަރަށް ލޯބިވޭ ފިޒާ..! ފިޒާއަށް އަހަރެންގެ ބޭނުންޖެހޭ ކޮންމެ ވަގުތެއްގައި ފިޒާއާއި އެންމެ ގާތުގައި ވާނަން..!" އިހުނަށްވުރެން ބާރަށް ފިޒާ ރޮއެގަތެވެ. ރުޅިގަދަވެފައި އިން ތާބިޝްގެ އަތް މުށްކަވާލި އެވެ.
"ޑެމިޓް ފިޒާ..! ތިހައި ބަލިކަށި މީހަކަށް ފިޒާވީ ކޮންއިރަކުކަމެއް އަހަންނަކަށް ނޭގޭ..! އަމިއްލަ ދިފާއުގައި ތެދުވަން ދުވަހަކުވެސް ފިޒާ ދަސްނުކުރާނަންތަ..؟ އެހުރިހައި އެންމެންގެ ކުރިމަތީގައި ފިޒާ ފަލީހަތްކުރަމުންދިޔައިރު، އަނގައިންވެސް ނުބުނެ ހުރީ ކީކޭ ހިތަށް އަރައިގެން..؟ ހަމަރަގަޅަށް ފިޒާއަށް އެނގޭނެ އޭނާ އެދެއްކީ ހުސް ދޮގުވާހަކަ.. އެ އުޅުވީ ހަގީގަތެއް ނެތް ހުތުރު އިލްޒާމްތަކެއް..! އެހުރިހައި ތުހުމަތެއް އަމިއްލަ ބޮލުގައި އަޅައިގެން ހުންނާކަށް ނުޖެހޭނެ..! އަމިއްލަ ދިފާއުގައި އެއްޗެއް ބުނުމަކީ ޒުވާބު ކުރުމެއް ނޫން.. އެއީ އެހެންމީހުންގެ ކުރިމަތީގައި ތިމާގެ އަގެއް ނެތުމެއްވެސް ނޫން.. ނުޖެހޭ ފިޒާ އެހުރިހައި އަޑެއް އަހަން އެތަނުގައި އިސްޖަހައިގެން ހުންނާކަށް..!" ރުޅިއައިސް ރަތްވެފައި ތާބިޝް ވާހަކަދެއްކުމުން ކަރުނަ ފޮހެލަމުން އޭނާއާއި ދިމާއަށް ފިޒާ ބަލައިލި އެވެ.
"އަހަރެންގެ އަމިއްލަ ދިފާއުގައި ތެދުވާނެ ގޮތެއް ބުނެބަލަ..! އަހަރެންގެ ދިފާއުގައި އަހަރެން ބުނާއެއްޗެއް އޭނާ ގަބޫލުކޮށް އަހަންނަށް އިތުބާރުކުރަންޖެހޭ ސަބަބެއް އެބައޮތްތަ..؟ އަހަރެންގެ ހަގީގަތް، އެންމެންގެ ކުރިމަތީގައި އޭނާ އެ ބުނެދިނީދޯ..! އަހަރެންގެ ފިރިމީހާ އަހަރެން ގެއިން ނެރެ، އަހަރެން ދޫކޮށްލި ސަބަބު އޭނާ އެ ބުނެދިނީދޯ..! ހަގީގީ ސަބަބު އެންމެންގެ ކުރިމަތީގައި ހަރުއަޑުން ހާމަކުރީމައި، ދިފާއުގައި ތެދުވެ އަހަރެން ބުނާނެ އެއްޗެއް އެބައޮތްތަ..؟" ހޯސްލާފައި ފައިބަމުންދިޔަ ކަރުނަ ފޮހެމުން، ނުހަނު އުދަގުލުން ފިޒާ ވާހަކަދަދެއްކި އެވެ. ތަފާތަކީ ފިޒާގެ މިފަހަރުގެ ބުނެލުމުގައި ހުރި ނަފްރަތާއި ހަރުކަށިކަމެވެ.
"ފިޒާ" ކުރެވޭނެކަމެއްނެތި އަދި ބުނެވޭނެ އިތުރު އެއްޗެއް ނެތިފައި ތާބިޝް ގޮތް ހުސްވެ، ކަރުއެލުވާލި އެވެ. (ނުނިމޭ)
