ކައުންސިލުގެ ރައީސް އަބުދުލް ރަހްމާން ސަބީހް ވިދާޅުވީ ލޭންޑް ޔޫސް ޕްލޭން ފާސްވެފައިވާތީ އެއާ އެއްގޮތަށް ރަށުގެ ބަނދަރުމަތީގައި ލޯކަލް މާރުކޭޓެއް ހެދުމަށް ނިންމާފައިވާކަމަށެވެ.
ނ. އަތޮޅުގެ ވެރިރަށުގެ ބަނދަރުމަތީގައި ލޯކަލް މާރުކޭޓެއް ހެދުމަށް ވިސްނާފައިވަނީ، ރައީސް ވިދާޅުވި ޑިޒައިން އެންޑް ބިލްޑް އުސޫލުން ތަން ތަރައްގީ ކުރުމަށް ދޫކޮށްލާގޮތަށެވެ.
ދެ ތިން މަސްދުވަހުގެ ތެރޭގައި އެމަސައްކަތް ނިންމާލެވޭނެކަމަށް އުންމީދު ކުރާ ކަމަށާއި މާރުކޭޓާ އެކު ދަނޑުވެރިންނަށް އެމީހުން ހައްދާ ތަކެތި އެއް ތަނެއްގައި ތިބެގެން ވިއްކުމުގެ މަގު ފަހިވެގެންދާނެ ކަމަށާއި އެކަމުން ދަނޑުވެރިކަން އިތުރަށް ފުޅާވެގެންދާނެކަމަށް ރައީސް ވިދާޅުވި އެވެ.
" ދަނޑުވެރިކަން ކުރުމަށް މި ދޫކުރާ ބިންތަކަކީ ގުރުއަތު ލައިގެން އެ ހޮވޭ ބަޔަކަށް ދެ އަހަރު ދުވަހުގެ މުއްދަތަކަށް ހިލޭ ދޫކުރާ ބިންތަކެއް. އެ ބިންތައް ދޫކުރަނީ ހަމައެކަނި އެންމެ ކަމަކަށް ޝަރުތުކޮށްފައި. އެއީ ބިންތައް ސާފުތާހިރުކޮށް ބަލެހެއްޓުން. ބިންތައް ލިބޭ މީހުން އެމީހަކު ބޭނުންވާ އެއްޗެއް ހައްދައިގެން އެކަމުން ނަފާ ހޯދަންވީ،" ކައުންސިލުގެ ރައީސް ސާބީހު ވިދާޅުވި އެވެ.
ގާތްގަނޑަކަށް 2000 މީހުން ދިރިއުޅެމުންދާ މަނަދޫގައި ދަނޑުވެރިކަން ކުރަން ބޭނުންވާ ފަރާތްތަކަށް އެ ފުރުސަތު ހޯދައިދިނުމަށް ކައުންސިލުގެ ބެލުމުގެ ދަށުގައި ހުރި ބިންތަކުން 5000 އަކަފޫޓާއި 3000 އަކަފޫޓާއި ދެމެދުގެ 30 ބިން މިހާރުވެސް ދޫކޮށްފައިވާ ކަމަށާއި ދަނޑުވެރިކަމަށް ހާއްސަ ކޮށްގެން ދޫކޮށްފައިވާ 11 ބިމެއްގައި ދަނޑުވެރިކަން ކުރަމުން އަންނައިރު ދަނޑުތަކުން ލިބޭ ތަކެތި ވިއްކަނީ ރަށު ފިހާރަތަކުގައި ބަހައްޓައިގެން ކަމަށް ކައުންސިލުގެ ރައީސް ވިދާޅުވިއެވެ.
