މާލެ ސަރަޙައްދަށް ދިމާވެފައިވާ އެންމެ ބޮޑު އެއް ގޮންޖެހުމަކީ ވެހިކަލް ޕާކު ކުރާނެ ޖާގަ ނެތުން ކަމަށްވާ އިރު "ވަން ޕާކް" ބިލްޑިންގ އާއެކު އެކަމަށް ބޮޑު ލުޔެއް ލިބޭނެ ކަމަށް އޭޭނާ ވިދާޅުވި އެވެ. މީގެ ކުރިން ވެސް ދަމާސް އިން ވަނީ ވަރަށް ފުރިހަމަ ރިއަލް އެސްޓޭޓް ޕްރޮޖެކްޓްތަކެއް ހިންގާފައި ކަމަށާއި އަލަށް ހަދާ ޕާކިންގ ބިލްޑިންގ ވެސް އެހާ ފުރިހަމަ ވާނެ ކަމަށް އުންމީދު ކުރައްވާ ކަމަށް ވެސް އޭނާ ވިދާޅުވި އެވެ.
ހުޅުމާލޭގައި މި ވަގުތު ޕާކު ކުރަން ޚާއްޞަ ތަނެއް ނުހުރެ އެވެ. ޕާކިންގގެ ޚިދުމަތް ލިބެން ހުންނަނީ ކޮމާޝަލް ފްލެޓް އިމާރާތްތަކުގައި ކަމުން އެ ތަންތަނުގެ ޕާކިންގ ޖާގަ ލިބެނީ ހަމައެކަނި އެތަންތަން ގަންނަ މީހުންނަށް އެކަންޏަށެވެ. އެހެންކަމުން، މީހުން ކާރު ޕާކު ކުރަނީ އާންމު މަގުތަކުގަ އެވެ.
"ވަން ޕާކް" ބިލްޑިންގ ގައި 500 ވެހިކަލަށް އެއްފަހަރާ ޕާކު ކުރެވޭ އިރު، ދިގު މުއްދަތުގެ ޕާކިންގ ޖާގަ އާއި ކުރު މުއްދަތުގެ ޕާކިންގ ޖާގަ އެތަނުން ދޫކުރާނެ އެވެ. ހަތް ބުރި އަށް ހަދާ އެ އިމާރާތުގެ ގްރައުންޑާއި އެއްވަނަ ފްލޯ ފިޔަވައި އެހެން ހުރިހާ ފްލޯއެއް ގައި ހުންނާނީ ޕާކިންގ ޖާގަ އެވެ. ގްރައުންޑް އަދި އެއްވަނަ ފްލޯ ގައި ހުންނާނީ ޝޮޕިން މޯލެކެވެ.
