ފުލުހުން ބުނިގޮތުން މިއަދު މެންދުރު 12:30 ހާއިރު، ފުލުހުންނަށް ރިޕޯޓު ލިބުނީ، މީހަކު މަރާލައިގެން އުޅޭ ކަމަށެވެ. ފުލުހުން ސީން އަށް އެޓެންޑުވެ ”ހޭނެތިފައިވާ މީހަކު“ އެރަށު ހެލްތު ސެންޓަރަށް ގެންގޮސްފައި ވެއެވެ.
އޭނާ ހެލްތު ސެންޓަރަށް ގެނައިރުވެސް އޮތީ މަރުވެފައި ކަމަށް ޑޮކްޓަރާއި ހަވާލާދީ ފުލުހުން ބުންޏެވެ. އޭނާ މަރާލިކަމުގެ ތުހުމަތު ބައެއް މީހުން ކުރަނީ އަންހެންމީހާގެ ފިރިމީހާ އަށެވެ.
”ސީއެންއެމް“ އަށް އެރަށު ކައުންސިލުން މައުލޫމާތު ދިންގޮތުގައި، އަންހެންމީހާ މަރުވި ކަމަށް ބެލެވެނީ ކުއްލި ގުދުރަތީ މަރަކުން ނެވެ.
އަންހެންމީހާ މަރުވެފައި އޮއްވާ ފެނުނީ، އޭނާގެ ކޮޓަރި ނުހުޅުވައިގެން ބެލިބެލުމުން ކަމަށާއި، ހަރަކާތް ނެތުމުން އެރަށު ހެލްތު ސެންޓަރަށް ގެންދިއުމުން އޭނާ މަރުވެފައިވާކަމަށް ޑޮކްޓަރު ވިދާޅުވި ކަމަށް ކައުންސިލުން ބުންޏެވެ.
މޫސާ ވިދާޅުވިގޮތުން އޭނާއަށް މިހާތަނަށް ލިބުނު މައުލޫމާތުން ހަށިގަނޑުގައި އެއްވެސް އަނިޔާއެއްގެ ނިޝާނެއް ހުރިކަން އެގިފައެއް ނުވެ އެވެ. ނުވަތަ ޝައްކުކުރެވޭ ކަމެއް ފެނިގެން އެކަން ބަލަމުންދާ ކަންވެސް އެގިފައެއް ނުވެ އެވެ.
އަންހެންމީހާ ފެނުނުއިރު އެއްވެސް ޒަހަމެއް ހަށިގަނޑުން ފެނިފައިވޭތޯ ފުލުހުންނާއި ސުވާލުކުރުމުން ފުލުހުން އެ ތަފްސީލް ހިއްސާކޮށްފައެއް ނުވެ އެވެ.
އަންހެންމީހާގެ މަރުގެ ތުހުމަތު ފިރިމީހާއަށް ކުރާއިރު އޭނާ ހޯދުމުގެ މަސައްކަތް ކުރަމުންދާ ކަމަށް އެރަށު ބައެއް މީހުންނާއި ހަވާލާދީ ބައެއް މީޑިއާތަކުން ދަނީ ރިޕޯޓުކުރަމުން ނެވެ. ނަމަވެސް މިކަމާއި ގުޅޭގޮތުންވެސް ފުލުހުންގެ ސާފު ޖަވާބެއް އަދި ނުލިބެއެވެ.
ފިރިހެންމީހާ އާއި ގުޅޭގޮތުން ކައުންސިލުގެ ރައީސް ވިދާޅުވީ، އެކަން ހިނގިއިރު ފިރިހެންމީހާ ހުރީ ކުޅުދުއްފުށީގައި ކަމަށް މައުލޫމާތު ލިބޭ ކަމަށެވެ. އަދި ދެމަފިރިންގެ މެދުގައި މައްސަލައެއް ޖެހިގެން، ކަމެއް ހިނގައިގެންވެސް މީގެ ކުރިން މައްސަލައެއް ކައުންސިލާއި ހަމަޔަށް އައިސްފައި ނުވާކަމަށް ވެސް އޭނާ ވިދާޅުވި އެވެ. މިވަގުތު ހުންނެވީ ރަށުގައި ނޫންކަމުން މާބޮޑަށް އެކަމާއި ވާހަކަދައްކަން ނޭނގޭކަންވެސް ރައީސް ފާހަގަކުރެއްވި އެވެ.
