ނިޝާމާ މަރުވެފައި އޮތްވާ ފެނުނީ އޭނާ ދިރިއުޅެމުންދިޔަ ގޭގެ ކޮޓަރީ ތެރޭގައި އޮތްވަ އެވެ. އޭނާ މަރުވެފައި އޮތްވާ ފެނުނީ، އޭނާގެ ހަބަރެއް ނުވެގެން ކޮޓަރިއަށް އާއިލާ މެމްބަރުން ވަދެ ބެލުމުންނެވެ.
މިކަމާއި ގުޅިގެން ފުލުހުންގެ މީޑިއާ އޮފިޝަލް މިއަދު ވިދާޅުވީ، ނިޝާމާގެ ހަށިގަނޑު މިދިޔަ ހޮނިހިރު ދުވަހު މާލެ ގެނެސްފައި ވާކަމަށެވެ. އަދި ޕޯސްޓް މޯޓަމް ހެދުމަށް ރާއްޖެއިން ބޭރަށް ފޮނުވަން ކުރަންޖެހޭ ކަންކަން ކުރަމުން އަންނަ ކަމަށްވެސް އޮފިޝަލް ވިދާޅުވި އެވެ.
ނިޝާމާ މަރުވެފައި އޮތްވާ ފެނުނީ، މިމަހުގެ 10 ވަނަ ދުވަހުގެ މެންދުރުގެ ވަގުތުގަ އެވެ. މި ކަމާއި ގުޅިގެން ނިޝާމާގެ ފިރިމީހާ، އދ. ފެންފުށީ، ރޯސްވިލާ، އަބޫބަކުރު ފައިސަލް (އ32) ކޯޓު އަމުރެއްގެ ދަށުން ފުލުހުން ހައްޔަރު ކޮށްފައި ވާއިރު، ކޯޓުން ވަނީ އޭނާ 15 ދުވަހަށް ބަންދު ކުރުމަށް އަމުރު ކޮށްފަ އެވެ.
ހދ. ކުޅުދުއްފުށީ މެޖިސްޓްރޭޓް ކޯޓުގައި ރޭ އޮތް ބަންދު މުއްދަތުގެ މަޖިލީހުގައި އެއްވެސް އެއްޗެއް ބުނަން އޭނާ ބޭނުން ނުވާ ކަމަށް އޭނާ ބުނި ކަމަށްވަނީ މައުލޫމާތު ލިބިފަ އެވެ. ފައިސަލް 15 ދުވަހަށް ބަންދު ކުރަން އަމުރުކުރީ ހދ. ޖުޑީޝަލް ދާއިރާގެ އިސް މެޖިސްޓްރޭޓް އަލީ އާދަމް އެވެ.
ހދ. ނޮޅިވަރަމްގައި މަރުވެފައި އޮތްވާ ފެނުނު އުމުރުން 28 އަހަރުގެ ނިޝާމާ މުހައްމަދުގެ މަރުގެ މައްސަލަ ފުލުހުން ގެންދަނީ ތަހުގީގު ކުރަމުންނެވެ. ނިޝާމާގެ މަރުގެ ހަބަރާއި އެކު ނިޝާމާގެ އާއިލާ އަށް ބޮޑު ޝޮކެއް ލިބިފައިވެ އެވެ.
