އެޗްޑީސީން ބުނިގޮތުގައި ހުޅުމާލޭ ބީޗް ސަރަހައްދުގައި ގާއިމު ކުރާ މި ހަބަކީ 406.23 އަކަ ފޫޓުގެ ބިމެއްގައި އިމާރާތް ކުރާ، ރައްޔިތުންނާ ގުޅުން ހުރި ގިނަ ހަރަކާތްތަކެއް ހިންގާނެ ތަނެކެވެ.
ކުޑަކުދީންނަށް ހާއްސަ ކޮށްގެން މޫދުގެ ހަރަކާތްތަކާއި ޒުވާނުންގެ ކުރިއެރުވުމަށް ލައިފް ސްކިލް ޕްރޮގްރާމްތައް އަދި ހާއްސަ އެހީއަށް ބޭނުންވާ ފަރާތްތަކަށް ވެސް ގިނަ ހަރަކާތްތަކެއް މި ހަބުން ކުރިއަށް ގެންދިއުމަށް ހަމަޖެހިފައިވާ ކަމަށް އެޗްޑީސީން ބުންޏެވެ.
މިކަމާއި ގުޅޭގޮތުން ސީއެންއެމް އަށް ދެއްވި އިންޓަވިޔުއެއްގައި އެޗްޑީސީގެ އިސް އޮފިޝަލަކު ވިދާޅުވީ މައިގަނޑު ގޮތެއގައި މި ހަބުގައި ހިންގުމަށް ހަމަޖެހިފައިވަނީ ވޯޓާސްޕޯޓްސް ހަރަކާތްތައް ކަމަށެވެ އަދި މި ހަބް އިމާރާތް ކުރާނީ ހުޅުމާލޭގެ ފޭސް 1 ގަ އެވެ.
މީގެ އިތުރުން އޭނާ ވިދާޅުވީ މިހަބް ތަރައްގީ ކުރުމަށްޓަކައި އަލޯހާ ކްލަބާއި އެކު އެއްބަސްވީ އެ ކުލަބަކީ މިކަމުގައި ވަރަށް ތަޖުރިބާކާރު ފަރާތްތަކެއް ހަރަކާތްތެރުވަމުންދާ ކުލަބަކަށް ވާތީކަމަށެވެ.
މި ހަބާއި ގުޅިގެން ތިމާވެއްޓަށް ގެއްލުންވާ ކަންކަމަށް ހޭލުންތެރިކަން އިތުރު ކުރުމަށާއި ޒުވާނުން އަދި ކުޑަކުދީންނަކީ ތިމާވެއްޓަށް ލޯބި ޖެހިފައި ތިބި ބަޔަކަށް ހެދުމަށް ވެސް ހާއްސަ އިސްކަމެއް ދިނުމަށް ހަމަޖެހިފައިވާކަމަށް އެ ކޯޕަރޭޝަނުން ބުންޏެވެ.
