މި ދެ ތަރިންގެ މައްސަލަ ސުޕްރީމް ކޯޓަށް ލޯޔަރެއް ހުށަހެޅީ، އެމީހުން ކުޅެފައިވާ ފިލްމު 'ޕަތާން' ގެ ޕްރޮމޯޝަނަށް ނެރުނު ލަވައެއް ކަމަށްވާ 'ބޭޝަރަމް ރަންގު' ގައި ދިޕިކާ ހެދުން އަޅާފައިވާ ގޮތުންނާއި ހެދުމުގައި ބޭނުންކޮށްފައިވާ ކުލައިގެ ސަބަބުން ހިންދޫ ދީނުގެ މީހުންނަށް ފުރައްސާރަ ވާކަމަށް ބުނެއެވެ.
ޒެފްރަން ކުލައިގެ ހެދުމެއް ލައެން ދިޕިކާ އެ ލަވައިގެ މަންޒަރެއްްގައި އުޅޭއިރު، އެ ކުލައަކީ ހިންދޫންނަށް މާތް ކުލައެއް ކަމަށް މައްސަލަ ހުށަހެޅި ވަކީލު ވަނީ ބުނެފައެވެ.
މައްސަލައިގައި ވަނީ ދިޕިކާ އަދި ޝާހު އާއި މެދު ޖިނާއީ ފިޔަވަޅެއް އަޅައި ދިނުމަށް ވެސް އެދިފައެވެ. އަދި އެ ލަވަ ބޭން ކުރުމަށް ވެސް ވަނީ މައްސަލައިގައި އެދިފައެވެ.
ދީޕިކާ އަދި ޝާހުރުކް ހާން
ހިންދޫންގެ ހަރުކަށި ބައެއް އިސް ވެރިން އަންނަނީ ޝާހުގެ އެންމެ ފަހުގެ ފިލްމު 'ޕަތާން' އަޅުވާ ސިނަމާތަކުގައި ހުޅުޖެހުމަށް ވެސް ގޮވާލަމުންނެވެ. އަދި އިންޑިއާގެ ބައެއް ސަރަހައްދު ތަކުގައި ޝާހު އާއި ދެކޮޅަށް އަންނަނީ މުޒާހަރާ ކުރަމުންނެވެ. ބައެއް މީހުން ގެންދަނީ ޝަހުރުކް ހާންގެ ފޮޓޯ ވެސް އަންދަމުންނެވެ.
ޝާހުގެ ފޮޓޯ ބަޔަކު އަންދާލަނީ: ފައިލް ފޮޓޯ
މިމަހު ކުރީކޮޅު ޝާހު ވަނީ ހިންދޫ ދީނުގެ އަޅުކަމެއް ވެސް އަދާކޮށްފައެވެ. ނަަމަވެސް އޭގެ ދުވަސްކޮޅެއް ކުރިން ޝާހު ވަނީ އުމްރާއެއް ވެސް ކޮށްފައެވެ.
މައްސަލަ ހުށަހެޅި އިރު ޝާހު އާއި ދީޕިކާ މިވަގުތު ހުރީ ގަތަރުގައި ވޯލްޑްކަޕް ނިންމުމުގެ ރަސްމިއްޔާތުގައި ބައިވެރިވުމަށް ގޮހެވެ. އެ ރަސްމިއްޔާތުގައި ވެސް ޕަތާން ގެ ޕްރޮމޯޝަނެއް ކުރިއަށް ގެންދާނެކަމަށް ރިޕޯޓުތައް ބުނެއެވެ.
ޝާހު ވަނީ ދިޕިކާގެ ދިފާއުގައި ނުކުތުމަށް އެނާގެ ފޭނުންގެ ކިބައިން އެދިފައެވެ.
