Advertisement

މިރޭ 47 ރިސޯޓެއްގައި ހަވާ އަރުވާ ކަމަށް އެމްއެންޑީއެފުން ބުނެފިއެވެ.

އެމްއެންޑީއެފުން ބުނީ މިރޭ މާލޭ ސިޓީގއި ހަވާ ނާރުވާނެ ކަމަށެވެ. ނަމަވެސް 47 ރިސޯޓެއްގައި ހަވާއެރުވުން ކުރިއަށް ގެންދާނެ ކަމަށް އެމްއެންޑީއެފުން ވަނީ ބުނެފައެވެ.

ސީއެންއެމްއަށް މައުލޫމާތު ދެއްވަމުން ޓްއަރިޒަމް މިނިސްޓްރީގެ ސީނިއާ އެގްޒެކްޓިވް އަލީ ހާޝިމް (ސުމިތު) ވިދާޅުވީ އާ އަހަރު ފާހަގަ ކުރުމަށް އެއްވެސް ސަރަހައްދެއްގައި ސަރުކާރުގެ ފަރާތުން ހަވާއަރުވަން ވިސްނާފައި ނެތް ކަމަށެވެ.

އާ އަހަރު ފާހަގަކުރުމަށް ޓޫރިޒަމް މިނިސްޓްރީން ވަނީ ހާއްސަ ޝޯއެއް މާލޭގައި ބޭއްވުމަށް ނިންމާފައެވެ. އެޝޯ ފެށޭނީ އަންނަ އަންގާރަ ދުވަހުގެ ރޭ ކާނިވާ ސަރަހައްދުގައި 8:30 ގައި ކަމަށް އެ މިނިސްޓްރީން ހާމަކުރެއެވެ.

މި ފަހަރުގެ އާ އަހަރުގެ ޝޯ ގައި ރާއްޖޭގެ ފާހަގަކޮށްލެވޭ ފަންނާނުން ބައިވެރިވާނެ ކަމަށް އެ މިނިސްޓްރީން މައުލޫމާތުދެއެވެ. އޭގެ ތެރޭގައި މޯލްޑިވިއަން އައިޑޮލް އިން ވިދާލި ޝަލަބީ އިބްރާހިމް އާއި ޒާރާ މުޖްތަބާ އާއި މުހައްމަދު ޝިއުޒް އާއި ބޮޑުބެރު ބޭންޑެއް ކަމުގައިވާ "ނާބަ" ބޭންޑުގެ ހުށަހެޅުންތައް ފެންނާނެ ކަމަށް މިނިސްޓްރީން ބުނެއެވެ.

ކޮންމެ އަހަރަކުވެސް އާ އަހަރު ކުލަގަދަ ގޮތެއްގައި ވަނީ ފާހަގަކޮށްފައެވެ. އެގޮތުން މި ހަރަކާތްތައް ކުރިން ކުރިއަށް ގެންގޮސްފައި ވަނީ ޓޫރިޒަމް މިނިސްޓްރީ އާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް (އެމްއެމްޕީއާރްސީ) ގުޅިގެންނެވެ.