އޭނާގެ ހަށިގަނޑު ޕޯސްޓްމޯޓަމަށް ފޮނުވާލީ މިއަދު އެވެ. އުމުރުން 28 އަހަރުގެ ނިޝާމާ މަރުވެފައި އޮއްވާ ފެނުނުތާ މިއަަދަށް ވަނީ 12 ދުވަސް ވެފައެވެ.
އޭނާ ޕޯސްޓްމޯޓަމް ހެދުމަށް މާލެ ގެނައީ އޭނާގެ މަރަކީ ގަސްތު މަރެއް ކަމަށް ބެލެވިގެން މިމަހުގެ 12 ވަނަ ދުވަހު އެވެ. ތިން ކުދިންގެ މަންމަ ނިޝާމާގެ މަރުގެ ތުހުމަތު ކުރެވެނީ އޭނާގެ ފިރިމީހާ އދ. ފެންފުށީ، ރޯސްވިލާ، އަބޫބަކުރު ފައިސަލް އަށެވެ.
މިއަދު ނިޝާމާގެ މަރުގެ ތަހުލީލުތަކުގެ ބޭނުމަށް ހަށިގަނޑު ޕޯސްމޯޓަމްއަށް ފޮނުވާލިއިރު، އޭނާގެ މަރުގެ ތުހުމަތުގައި ހައްޔަރުކުރި އޭނާގެ ފިރިމީހާ ފައިސަލް ވަނީ ދަންޖެހިގެން މަރުވެފަ އެވެ.
އުމުރުން 32 އަހަރުގެ ފައިސަލް ދަންޖެހުނީ އޭނާ ހައްޔަރުކޮށްފައި ހުރި ގޮޅިތެރޭ މިމަހުގެ 12 ވަނަ ދުވަހު އެވެ. އޭނާ ސަލާމަތްކޮށް ހޮސްޕިޓަލަށް ގެންގޮސް ފަރުވާދެމުންދާތާ، ހަތް ދުވަސް ފަހުން ކްރިޓިކަލް ހާލަތުގައި ވެންޓިލޭޓަރުގައި އޮވެ ވަނީ މަރުވެފައެވެ.
