ކްރިމިނަލް ކޯޓުގައި މިހާރު ހިނގަމުންދާ ރައީސް ޔާމީނާ ގުޅޭ ދެ މައްސަލައެއްގެ ހުކުމް އަންނަ އާދިއްތަ ދުވަހު ކުރުމަށްވަނީ ތާވަލުކޮށްފައެވެ. އެއީ ރިޝްވަތު ހިފުމާއި މަނީ ލޯންޑަރިންގެ މައްސަލައެކެވެ. މި މައްސަލަތަކުގެ ހުކުމް ކުރުމާ ގާތްވެފައިވަނިކޮށް، ބުރާސްފަތި ދުވަހު ހަވީރު ރައީސް ޔާމީން ޕީޕީއެމްގެ ލީޑަޝިޕްގެ ބޭފުޅުންނާ ބައްދަލު ކުރެއްވި ކަމަށްވަނީ މައުލޫމާތު ލިބިފަ އެވެ.
މި ބައްދަލުވުން އޮތް ކަމަށްވަނީ ރައީސް ޔާމީންގެ ގެކޮޅު، ހ. ދޫވެހީގަ އެވެ.
ރަސްމީކޮށް ޕީޕީއެމުން މިކަން ކަށަވަރުކޮށްދީފައި ނުވިނަމަވެސް އެ ބައްދަލުވުމުގެ މައުލޫމާތު އެނގޭ މީހަކު ކިޔައިދިން ގޮތުގައި ރައީސް ޔާމީން އެދިވަޑައިގެންނެވީ އެ މަނިކުފާނު މިނިވަން ކުރަން ކުރެވެން ހުރި މަސައްކަތް އެންމެވެސް ކޮށް ދެއްވުމަށެވެ.
މައުލޫމާތު ލިބިފައިވާ ގޮތުގައި ބުރާސްފަތި ދުވަހުގެ ރައީސް ޔާމީނު ޕީޕީއެމް/ ޕީއެންސީގެ ލީޑާޝިޕްގެ ބޭފުޅުންނާ ބައްދަލު ކުރެއްވިއިރު، މިއީ މި ފަހުން އެމަނިކުފާނު ބޭއްވި މި ފަދަ ދެވަނަ ބައްދަލުވުމެވެ. މި ނިމުނު ހަފްތާގެ ކުރީކޮޅުވެސް ރައީސް ޔާމީން ޕާޓީގެ ލީޑާާޝިޕާ ބައްދަލުކޮށް ދެއްކެވީ ދާދި އެއް ވާހަކަތަކެކެވެ.
ކްރިމިނަލް ކޯޓުގައި މިހާރު ހުކުމާ ގާތްވެފައިވާ މައްސަލައަކީ، ވ. އާރަށާ ގުޅޭ މައްސަލައެކެވެ. އާރަށު މައްސަލާގައި ޔާމީންގެ މައްޗަށް އުފުލާފައިވަނީ މަނީ ލޯންޑަރިންގެ ދައުވާ އާއި ރިޝްވަތު ގަބޫލު ކުރުމުގެ ދައުވާ އެވެ. މި މައްސަލައިގެ ދައުވާތައް ޔާމީންގެ މައްޗަށް ސާބިތުވެއްޖެނަމަ މަދުވެގެން އަށް އަހަރު ދުވަހުގެ ޖަލު ހުކުމެއް އަންނާނެ އެވެ. އެހެން ވެއްޖެ ނަމަ މަތީމަރުހަލާއަކުން އެ ހުކުމް ބާތިލުކުރުމާ ހަމަޔަށް ރިޔާސީ އިންތިހާބުގެ ފުރުސަތު ޔާމީނަށް ގެއްލޭނެ އެވެ.
