ދެ އަހަރު ވަންދެން ރަނގަޅަށް ހޭނާރާ އޮވެ، މަރީ މަރުވިކަން އޭނާ އަށް އެހީ ހޯދުމަށް އޭނާގެ ކޮއްކޮ ފޭސްބުކުގައި ހިންގަމުން އަންނަ ޕޭޖުގައި ވަނީ ބުނެފަ އެވެ. އެ ޕޭޖުގައި ބުނެފައިވާ ގޮތުގައި، މަރީ މަރުވީ މިއަދުގެ ހެނދުނުގެ ވަގުތެއްގައި މާލޭގަ އެވެ.
މަރީ މަރުވިއިރު، އޭނާގެ ނުވަ އަހަރުގެ ދަރިއެއްވެސް ހުރެ އެވެ.
މަރީގެ ހާލު ދެރަވެ ފަރުވާ ހޯދަން ފެށީ، މިދިޔަ އަހަރުގެ މޭ މަހުގެ 28 ވަނަ ދުވަހު ހޮސްޕިޓަލުގެ ކެންޓީނުން ގަތް ކްރީމް ޖެހި ބަނަހެއް ކެއުމުގެ ސަބަބުން އެލާޖިކް ވެގެން އައިޖީއެމްއެޗް އަށް ގެންދިއުމުން އެ ހޮސްޕިޓަލުން ޖެހި އިންޖެކްޝަނެއްގެ ސަބަބުންނެވެ.
މިކަމާއި ގުޅިގެން މީގެ ކުރިން އައިޖީއެމްއެޗް އިން ވަނީ، ނުބައިކޮށް އިންޖެކްޝަން ދެވުނުކަން ގަބޫލުކޮށް، އެ މައްސަލަ ބަލާ ފިޔަވަޅު އަޅާނެ ކަމަށް ބުނެފަ އެވެ. އަދި އެކަމަށް އެ ހޮސްޕިޓަލުން ވަނީ މާފަށްވެސް އެދިފަ އެވެ.
އޭގެ ފަހުން މިއަދާއި ހަމައަށްވެސް މަރީ އޮތީ ހޭނާރާ އެވެ. އައިޖީއެމްއެޗް އިން އޭނާ ބެލުމަށްފަހު ދެވޭނެ އިތުރު ފަރުވާއެއް ނެތުމުން އާއިލާއިން ވަނީ މަރީ އިންޑިއާ އަށްވެސް ގެންގޮސްފަ އެވެ. އެހެން ނަމަވެސް އިންޑިއާއިންވެސް މަރީ ބެލުމަށްފަހު ދެވޭނެ އިތުރު ފަރުވާއެއް ނެތުމުން، މި އަހަރުގެ މޭ މަހު އޭނާގެ އާއިލާއިން ވަނީ މަރީ ރާއްޖެއަށް ގެނެސްފަ އެވެ.
