ޝަރީއަތުން ފާހަގަކުރީ ޔޫސުފް ނައީމަށް ސާބިތުވި ރިޝްވަތު ދިނުމުގެ ކުށަކީ ތިންވަނަ ދަރަޖައިގެ ކުށެއް ކަމަށެވެ. އެ ކުށުގެ އަސާސީ އަދަބަކީ ތިން އަހަރާއި ދެމަހާއި 12 ދުވަހުގެ ޖަލު ހުކުމެކެވެ.
ޔޫސުފް ނައީމުގެ ސިއްހަތާއި އުމުރަށް ބަލައި އަދަބު ދަށް ކޮށްދީ ގޭބަންދަކަށް ބަަދަލުކޮށްދިނުމަށް ނައީމުގެ ފަރާތުން އެދިފައި ވެއެވެ. ނަމަވެސް ޝަރީއަތުން ބުނީ، އަދަބު ދަށްކުރާނެ އަދި މަތި ކުރެެވޭނެ ހާލަތެެއް ވެސް ނެތް ކަމަށެވެ.
އަދި ކުށްކޮށްފައިވާ ގޮތަށް ބަލާއިރު، އެއީ ރާވައިގެން ދުރާލައި ކޮށްފައިވާ ކުށަކަށްވުމުން ގޭބަންދަށް ބަދަލު ކޮށްދިނުމުގެ ލުއިވެސް ނުދެވޭނެ ކަމަށެވެ. އެހެންވެ، އޭނާގެ މައްޗަށް އިއްވީ ކުށުގެ އަސާސީ އަދަބު، ތިން އަހަރާއި ދެމަހާއި 12 ދުވަހުގެ ޖަލު ހުކުމެކެވެ.
ދައުލަތުން ބުނެފައިވާ ގޮތުން ކުއްޔަށް ދޫކުރުމުގެ މުއާމަލާތުގެ ތެރެއިން ޔާމީނަށް ރިޝްވަތުގެ ގޮތުގައި 1 މިލިއަން ޑޮލަރު ނައީމު ދިނެވެ.
ދައުވާގައި ވާގޮތުން:
- ވ. އާރަށް ޓޫރިޒަމް މިނިސްޓްރީއަށް ބަދަލުކުރީ 2015 ވަނަ އަހަރުގެ އޮގަސްޓް ނުވަ ވަނަ ދުވަހު
- ޔޫސުފް ނައީމުގެ 99 އިންސައްތަ ހިއްސާ އޮންނަ ގޮތަށް ޓޫޖީ ޕްރައިވެޓް ލިމިޓެޑްގެ ނަމުގައި ކުންފުންޏެއް އުފެއްދީ 2015 ވަނަ އަހަރުގެ އޮގަސްޓް 13 ވަނަ ދުވަހު
- ޓޫޖީ ޕްރައިވެޓް ލިމިޓެޑްގެ 99 ހިއްސާ އެލްއޭ ރިސޯޓްސް ޕްރައިވެޓް ލިމިޓެޑްއަށް ވިއްކާލީ 2015 ވަނަ އަހަރުގެ ސެޕްޓެމްބަރު އަށްވަނަ ދުވަހު
- ރަށުގެ ލީޒް އެކުއިޒިޝަން ކޮސްޓްއަށް އެއް މިލިއަން ޑޮލަރު، އަދި ޔޫސުފް ނައީމަށް ވަކިން އެއް މިލިއަން ޑޮލަރުގެ ޗެކެއް އެމްއެމްޕީއާރުސީން ދިން
- އެފައިސާ ޔޫސުފް ނައީމް އެކައުންޓަށް ޖަމާވީ 2015 ވަނަ އަހަރުގެ ސެޕްޓެމްބަރު މަހުގެ 13 ވަނަ ދުވަހު
- 15 ވަނަ ދުވަހު ޔާމީންއަށް ޔޫސުފް ނައީމު އެކައުންޓުން އެއް މިލިއަން ޑޮލަރުގެ ޗެކެއް ދިން
- ދެ ދުވަސް ފަހުން އެފައިސާ ޔާމީންގެ އެކައުންޓަށް ޖަމާވި
ހުކުމުގައި ބުނީ، ޔާމީންގެ ނަމުގައި އެކައުންޓެއް ހުޅުވައި، ނައީމްގެ އެކައުންޓުން ޔާމީންގެ އެކައުންޓަށް ފައިސާ ޖަމާކުރުމަކީ އިއްތިފާގެއް ކަމަށް ގަބޫލު ނުކުރެވޭ ކަމަށެވެ.
