ހިޔާނާތުގެ މައްސަލަ ސާބިތު ވުމާއި ގުޅިގެން ކްރިމިނަލް ކޯޓުން ވަނީ ރައީސް ޔާމީން 11 އަހަރަށް ޖަލަށް ލުމަށް ހުކުމް ކޮށްފަ އެވެ. ކްރިމިނަލް ކޯޓުން ޔޫސުފް ނައީމްގެ މައްޗަށް ތިން އަހަރުގެ ޖަލު ހުކުމެއް ވަނީ ކޮށްފަ އެވެ.
އެ ދެ ބޭފުޅުންވެސް ރޭގެ ވަގުތެއްގައި ހުކުމް ތަންފީޒު ކުރުމަށް މާފުށީ ޖަލަށް ގެންގޮސްފައި ވާއިރު، އެކަމާއި ގުޅިގެން "ސީއެންއެމް" އިން ކުރި ސުވާލަކަށް ޖަވާބު ދެއްވަމުން ކަރެކްޝަންގެ މީޑިއާ އޮފިޝަލް ޔުސްރީން ވިދާޅުވީ، ރައީސް ޔާމީން ހުންނެވީ، ދައުލަތަށް ހިދުމަތް ކުރެއްވި ބޭފުޅުން ބައިތިއްބަން މާފުށީ ޖަލުގައި ހަދާފައި ހުންނަ ވީއައިޕީގައި ކަމަށެވެ.
އެޕާޓްމަންޓެއް ގޮތަށް ހަދާފައިވާ މިގޮޅިއަކީ ރައީސް ޔާމީންގެ ވެރިކަމުގައި ކުރީގެ ރައީސް މުހައްމަދު ނަޝީދު ޖަލަށް ލުމުން ރައީސް ނަޝީދު ހުންނެވުމަށް ހެދިގޮޅިއެކެވެ. ނަމަވެސް އޭގެ ފަހުން ޖަލަށް ހުކުމް ކުރެވުނު ސިޔާސީ ބައެއް ބޭފުޅުންވެސް މިތަނުގައި ހުކުމް ތަންފީޒު ކުރައްވާފައި ވެއެވެ.
އޭގެތެރޭގައި މިހާރުގެ ހޯމް މިނިސްޓަރު އިމްރާން އަބްދުﷲއާއި ކުރީގެ ޑިފެންސް މިނިސްޓަރު އަދި އެމްއެންޕީގެ މިހާރުގެ ރައީސް މުހައްމަދު ނަޝީދުއާއި ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ނާޒިމް ހިމެނިވަޑައިގަންނަވައެވެ.
ޓީވީއާއި އެހެނިހެން ވަސީލަތްތަކާއި އެކު ސިޓިންރޫމަކާއި އެކު ހަދާފައިވާ ވީއައިޕީގައި ހުންނަނީ ކުދިވަކި ކޮޓަރިތަކެއްކަމަށާއި ހިނގާލާއުޅެލާނެ ޖާގައެއްވެސް އެސަރަހައްދުގައި ހަދާފައިވާކަމަށް އެތަނުގައި ކުރިން ތިއްބެވި ބައެއް ބޭފުޅުންގެ ފަރާތުން މައުލޫމާތު ލިބިފައިވެއެވެ.
ރައީސް ޔާމީން ވީއައިޕީގައި ހުކުމް ތަންފީޒު ކުރެއްވި ނަމަވެސް މަޖިލީހުގެ ކުރީގެ މެމްބަރުކަންވެސް ކުރައްވާފައިވާ ޔޫސުފް ނައީމް ހުކުމް ތަންފީޒު ކުރަމުންދަނީ، ރައީސް ޔާމީން އާއި ވަކިން އެހެން ގޮޅިއެއްގައި ކަމަށް އޮފިޝަލް ވިދާޅުވި އެވެ. އެހެން ނަމަވެސް މިކަމާއި ގުޅޭ އިތުރު ތަފްސީލެއް ޔުސްރީން ނުދެއްވަ އެވެ.
ޔޫސުފް ނައީމުގެ ސިއްހަތާއި އުމުރަށް ބަލައި އަދަބު ދަށް ކޮށްދީ ގޭބަންދަކަށް ބަަދަލުކޮށްދިނުމަށް ނައީމުގެ ފަރާތުން އެދިފައި ވެއެވެ. ނަމަވެސް ޝަރީއަތުން ބުނީ، އަދަބު ދަށްކުރާނެ އަދި މަތި ކުރެެވޭނެ ހާލަތެެއް ވެސް ނެތް ކަމަށެވެ.
އަދި ކުށްކޮށްފައިވާ ގޮތަށް ބަލާއިރު، އެއީ ރާވައިގެން ދުރާލައި ކޮށްފައިވާ ކުށަކަށްވުމުން ގޭބަންދަށް ބަދަލު ކޮށްދިނުމުގެ ލުއިވެސް ނުދެވޭނެ ކަމަށެވެ. އެހެންވެ، އޭނާގެ މައްޗަށް އިއްވީ ކުށުގެ އަސާސީ އަދަބު، ތިން އަހަރާއި ދެމަހާއި 12 ދުވަހުގެ ޖަލު ހުކުމެކެވެ.
ދައުލަތުން ބުނެފައިވާ ގޮތުން ކުއްޔަށް ދޫކުރުމުގެ މުއާމަލާތުގެ ތެރެއިން ޔާމީނަށް ރިޝްވަތުގެ ގޮތުގައި 1 މިލިއަން ޑޮލަރު ނައީމު ދިނެވެ.
ވ. އާރަށު މައްސަލާގައި ރައީސް ޔާމީންގެ މައްޗަށް އުފުލި ދެ ދައުވާވެސް ސާބިތުވެ 5 މިލިއަން ޑޮލަރުގެ ޖޫރިމަނާއަކާއިއެކު 11 އަހަރަށް ޖަލަށް ލާން ކްރިމިނަލް ކޯޓުން އިއްޔެ ވަނީ ހުކުމް ކޮށްފަ އެވެ.
