ވ. އާރަށު މައްސަލާގައި ޔާމީންގެ ދިފާއުގައި މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ހެކިބަސް ދީފައިވަނީ ނުހިނގާ ކަމެއް ހިނގި ކަމަށް ބުނެ ވަކި ގޮތަކަށް ހެކިބަސް ދިނުމަށް ތައްޔާރުވެގެން ކަމަށް ކްރިމިނަލް ކޯޓުން މިދިޔަ އާދިއްތަ ދުވަހު ކުރި ހުކުމުގައި ފާހަގަކޮށްފައި ވެއެވެ.
އެމައްސަލަ ތަހުގީގު ކުރަމުންދާ ކަމަށް ފުލުހުން މިއަދު ބުނެފައިވާއިރު، މިއަދު އިދިކޮޅު ޕީޕީއެމް/ޕީއެންސީ ކޯލިޝަނުން ބޭއްވި ނޫސްވެރިންގެ ބައްދަލުވުމުގައި އެކަމާއި ގުޅޭގޮތުން ނޫސްވެރިން ކުރި ސުވާލުތަކަށް ޖަވާބު ދެއްވަމުން ޕީއެންސީގެ ރައީސް އަބްދުރަހީމް އަބްދުﷲ ވިދާޅުވީ، ޔާމީންގެ ފަރާތުން ކޯޓުގައި ދޮގު ހެކިބަސް ދީފައި ނުވާނެ ކަމަށެވެ.
އަދި ދައުލަތުގެ ފަރާތުން ހުށަހެޅި ހެކިވެރިންގެ ތެރެއިން އެމައްސަލާގައި ހުކުމް އިއްވާފައިވާ ކުރީގެ ޓްއަރިޒަމް މިނިސްޓަރު އަހްމަދު އަދީބާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު އަބްދުﷲ ޒިޔަތުގެ ހެކިބަސް ސައްހަ ވާ ގޮތާއިމެދު ސުވާލު އުފައްދާފައި ވެއެވެ.
އަދުރޭ ވިދާޅުވީ ކްރިމިނަލް ކޯޓުން ޔާމީންގެ މައްޗަށް 11 އަހަރުގެ ހުކުމެއް އިއްވީ މާގިނަ ހެކިތަކަށް ބަލައިގެން ކަމަށް ގަބޫލު ނުކުރެވޭ ކަމަށާއި، އެ ހުކުމަކީ ސްޕްރީމް ކޯޓުން މީގެ ކުރިން ނިންމާފައިވާ ނިންމުމަކާއި ހިލާފަށް ނިންމާފައިވާ ހުކުމެއް ކަމަށެވެ. ވޮޑަމުއްލާ މައްސަލާގައި 2021 ވަަނަ އަހަރު ޔާމީން މިނިވަން ކުރި ހުކުމުގައި ސްޕްރީމު ކޯޓުން ވަނީ އަދީބާއި ޒިޔަތުގެ ހެކިބަހުގެ މައްޗަށް ބުރަދަނެއް ދިނުމަކީ ރައްކާތެރި ކަމަކަށް ނުވާނެކަން ފާހަގަކޮށްފަ އެވެ.
ކްރިމިނަަލް ކޯޓުން އާދިއްތަ ދުވަހު އިއްވި ހުކުމުގައި ވަނީ ނަރީޝްގެ ހެކިބަހުގައި ކުދި ކުދި ތަފްސީލުތައް ހަނދާނުގައި ނެތްކަމަށް ބުނުމަށްފަހު، ދިފާއުގެ ސުވާލުތަކަށް ތަފްސީލީ ޖަވާބު ދީފައިވާތީ، ސަބަބުވެެރި އިންސާނެއްގެ ވިސްނުމުން ބަލާއިރު އެއީ އަޖައިބު ކުރުވަނިވި، ހައިރާން ކުރުވަނިވި ކަމެއްކަން ފާހަގަކޮށްފަ އެވެ. އަދި، ފައިސާ ގުނުމުގައި އަމަލުކޮށްފައިވާގޮތް ބުނެދިނުމުގައި ފުށުއެރުންތައް ހުރުމާއި، އެ ފައިސާ ހިފައިގެން ދޫވެހިން ޔޫސުފް ނައީމްގެ ގެއަށް ދިޔަގޮތާއި އެކަން ހިނގީ ކޮން ދުވަހެއްގައި އަދި ކޮން ވަގުތެއްގައިކަން ނަރީޝްއަށް ބުނެ ނުދެވުނު އިރު އެއީ ދުވާލުގަޑީގައި ނުވަތަ ރޭގަނޑުގެ ވަގުތެއްގައި ހިންގި މުއާމަލާތެއްކަންވެސް ބުނެނުދެވުނުކަމަށް ކޯޓްގެ ހުކުމުގައި ފާހަގަކޮށްފައި ވެއެވެ.
އަދީބާއި ޒިޔަތަކީ، އެމްއެމްޕީއާރްސީ މައްސަލައިގެ ހިޔާނާތުގައި ދައުވާކޮށް ހުކުމް އިއްވާފައިވާ ދެމީހުން ނެވެ. އެދެމީހުންގެ އަދަބު ލުއިކޮށްދީފައިވަނީ ދައުލަތާއިއެކު ހެދި އިއުތިރާފުގެ އެެެއްބަސްވުމެެއްގެ ދަށުން ނެވެ. އަދި އަދީބު މިވަގުތު ހުރީ ބަލިކަމަށް ބުނެ ގޭގަ އެވެ.
އަދުރޭ ވިދާޅުވީ އަދީބާއި ޒިޔަތު އަދިވެސް ތިބީ ހަމަ އެމައްސަލާގައި ޖަލު ހުކުމެއްގައި ކަމުން އެދެމީހުންގެ ހެކިބަސް ސައްހަވާންޖެހޭނެ އެއްވެސް ގޮތެއް "ސަބަބުވެރި ވިސްނުމަކުން ވިސްނާއިރު" ނުވިސްނޭ ކަމަށެވެ.
އަދީބާއި ޒިޔަތުގެ ހެކިބަހަކީ އެހެކިބަހަށް އެހެން ހެއްކެއް ނުވަތަ ގަރީނާއެއް ނެތް ހާލަތުގައި އެހެކިބަހަށް ބުރަދަނެއް ދިނުން ރައްކާތެރި ހެކިބަހެއްކަމަށް ދެކެވަޑައި ނުގަންނަވާ ކަމަށް ފަނޑިޔާރު މަހާޒް އަލީ ޒާހިރު ވެސް މީގެ ކުރިން ވަނީ ވިދާޅުވެފަ އެވެ.
އަދީބާއި ޒިޔަތަކީ އެއްމައްސަލައެެއްގައި ކުށް ސާބިތުވެ ދައުލަތާއިއެކު އިއުތުރާފު އެއްބަސްވުން ހަދާފައިވާ ދެ މީހުނަަށްވާތީ ދައުލަތުން ހުށަހެޅި ހެކީގެ ތެރެއިން އަދީބާއި ޒިޔަތުގެ ހެކިބަސް ބަލައިނުގަތުމަށް ކުރިންވެސް ޔާމީންގެ ފަރާތުން އެދުނެވެ. އަދި އެއީ މައްސަލައިގައި ހެކިބަހުގެ ސައްހަކަން ގެއްލޭނެ ކަމެއްގެ ގޮތުގައި އެކަންބޮޑުވުންވެސް ޔާމީންގެ ފަރާތުން އޮތީ ފާޅުކޮށްފަ އެވެ. އެގޮތުން އެދެމީހުންނަކީ ޔާމީނާ ދެކޮޅަށް ހެކި ހުށަހަޅަން ދައުލަތުން ތައްޔާރުކޮށްފައިވާ "މެޝިން" ތަކެއްގެ ގޮތުގައި އަދި "ފާސިގުން"ގެ ގޮތުގައި ސިފަކޮށްފައިވެެ އެެވެ. ނަމަވެސް ޝަރީއަތުން ވަނީ އެދެމީހުންގެ ހެކިބަސްވެސް ބަލައިގަނެފައެވެ.
