އަލިފުށީ ކައުންސިލުގެ ނައިބު ރައީސް އިބްރާހިމް ޒަހީން "ސީއެންއެމް" އަށް ވިދާޅުވީ، ރޯވެ އަނދަމުންދަނީ ދޯނި ބަނުމަށް ބޭނުންކުރާ ފައިބަރުތަކެއްގައި އަލިފާން ހިފައިގެން ކަމަށެވެ. ކުނިގޮނޑުގެ ކުނި ބަހައްޓާފައި ހުރި ބަޔާއި ވަކިން ހުރި މި ފައިބަރުތަކުގައި ރޯވެ، ގާތްގަނޑަކަށް 100 ފޫޓު ފުޅާ ސަރަހައްދަކަށް އަލިފާންގަނޑު ފެތުރިފައިވާ ކަމަށް އޭނާ ވިދާޅުވި އެވެ. 

ޒަހީން ވިދާޅުވީ، ވައި ހުރީ މީހުން ދިރިއުޅޭ ސަރަހައްދާއި ދުރަށް ކަމުން، އެއްވެސް އިމާރާތަކަށް އަލިފާންގަނޑު ފެތުރުމުގެ ބިރެއް އަދި ނެތްކަމަށެވެ. އެ ސަރަހައްދާއި އެންމެ ކައިރީގައި ހުންނަނީ ރަށުގެ އިންޖީނު ގެ އެވެ. މީހުން ދިރިއުޅެނީ އެ ސަރަހައްދާއި 600 ފޫޓު ދުރުގަ އެވެ.  

ރޯވެފައިވާ އަލިފާންގަނޑު ނިއްވާލުމުގެ މަސައްކަތް ކަމާއި ބެހޭ އިދާރާތަކާއި ރަށުގެ ރައްޔިތުން ގުޅިގެން ކުރަމުންދާއިރު، ފައިބަރުތަކުގައި އަލިފާން ހިފަން މެދުވެރިވި ސަބަބު އަދި ދެނެގަނެވިފައެއް ނުވެ އެވެ. ޒަހީން ވިދާޅުވިގޮތުން އެ ސަރަހައްދުގައި މީގެ ކުރިންވެސް މިފަދަ ހާދިސާތައް ހިނގާފައި އެބަހުއްޓެވެ. ނަަމަވެސް އަލިފާން ރޯވަނީ ކިހިނެތްކަމެއް ބުނާކަށް ނޭނގެ އެވެ. 

މި އަލިފާންގަނޑު ރޯވެފައިވާތަން ފެނުނީ މިއަދު 14:00 ގައެވެ.