ބަހުގެ ހިދުމަތް ދެމުން އަންނަ އެމްޓީސީސީއިން މިއަދު ކޮށްފައިވާ އިއުލާނެއްގައި ބުނެފައިވަނީ، މިއަދު މާލޭގެ ނީލަން ފިހާރަ ސަރަހައްދުގައި ހިނގި އަލިފާނުގެ ހާދިސާ އާއި ގުޅިގެން ބޮޑުތަކުރުފާނު މަގުގެ ސަރަހައްދެއް ބަންދު ކުރެވިފައި ވާކަމަށާއި، އެހެން ކަމުން ހިދުމަތް ދެމުން އަންނަ ރޫޓް ތަކަށް ބަދަލުތައް ގެނެވިފައިވާ ކަމަށެވެ.
އެގޮތުން ބަހުގެ ހިދުމަތް ދެމުން އަންނަ ރޫޓް އެކެއް (ވެސްޓް ޕާކު - ހުޅުމާލެ ފޭސް 1) އަދި ރޫޓް ހަތެއް (ހުޅުމާލެ ފޭސް 2 - ވެސްޓްޕާކު) ގެ ބަހުގެ ހިދުމަތް ވަގުތީ ގޮތުން ކާނިވާ ސަރަހައްދަށް ބަދަލުކުރެވިފައިވާ ކަމަށާއި، ރޫޓް 11 (އަމީނީ ރޫޓު) ވަގުތީ ގޮތުން މެދުކަނޑާލާފައިވާ ކަމަށެވެ.
މީގެ އިތުރުން އެމްޓީސީސީއިން ބުނީ، ބޮޑުތަކުރުފާނު މަގު އަލުން ހުޅުވުމާއި އެކު އަލުން ބަހުގެ ހިދުމަތް ކުރިން ދެމުން ދިޔަ ގޮތަށް ދެވޭނެ ކަމަށާއި، މިކަމާއި ގުޅޭ އިތުރު މައުލޫމާތެއް ސާފުކުރަން ބޭނުންވާނަމަ އެމްޓީސީސީ ހޮޓްލައިން 1650 އިން ލިބޭނެ ކަމަށް ވެސް އެކުންފުނިން ބުނެ އެވެ.
ނީލަން ފިހާރާގައި ރޭ ފަތިހު ހިނގި އަލިފާނުގެ ހާދިސާގެ ސަބަބުން އެ ފިހާރަ ބަރި އާއި އެ ސަރަހައްދުގައި ހުރި ބިދޭސީން ތިބޭ ބްލޮކް އެއް ވަނީ އެއްކޮށް އަނދާ ހުލިވެފަ އެވެ. މި ހާދިސާގައި އެއްވެސް މީހަކަށް އަނިޔާވި ކަމުގެ ރިޕޯޓެއް އަދި ލިބިފައި ނުވެ އެވެ.
