އެ ދެ ސުކޫލުގެ ކިޔެވުން މިއަދު މެދު ކަނޑާލުމަށް ނިންމުމުގެ ކުރިން ސުކޫލުގައި ކިޔަވައިދިނުމަށް މަސައްކަތް ކުރި އެވެ. އެހެން ނަމަވެސް ދުމުގެ އަސަރު ވަރަށް ބޮޑަށް ހުރުމާއި އެކު، ދަރިވަރުންނާއި މުދައްރިސުންގެ ސަލާމަތާއި ރައްކާތެރިކަމަށްޓަކައި ދެ ސުކޫލުގެ ކިޔެވުން މެދުކަނޑާލުމަށް ނިންމީ އެވެ.
މީގެ އިތުރުން އިމާދުއްދީން ސުކޫލްގައި އަލިފާނުގެ ހާދިސާގެ ސަބަބުން ހާލުގައި ޖެހުނު ގިނަ އަދަދެއްގެ ބިދޭސީން ތިބުމާއި އެކު އެ ސުކޫލުގެ ކިޔެވުން މިއަދު މެދުކަނޑާލުމަށް ނިންމީ އެވެ.
މިކަމާއި ގުޅިގެން "ސީއެންއެމް" އަށް މައުލޫމާތު ދެއްވަމުން އިއްޒުއްދީން ސުކޫލްގެ އޮފިޝަލަކު ވިދާޅުވީ، މިއަދު ހެނދުނު 10:00 އަށް ކިޔެވުން ފަސް ކުރުމަށް ނިންމި ނަމަވެސް ދުމުގެ އަސަރު ވަރަށް ބޮޑަށް ހުރުމާއި އެކު ރައްކާތެރިކަމުގެ ފިޔަވަޅެއްގެ ގޮތުން ކިޔެވުން މެދުކަނޑާލުމަށް ނިންމީ ކަމަށާއި، އެހެން ނަމަވެސް މާދަމާ ސުކޫލްގައި ކިޔެވުން ކުރިއަށްދާނެ ކަމަށެވެ.
އިމާދުއްދީން ސުކޫލްގެ ކިޔެވުން މެދުކަނޑާލަން ނިންމުމާއި ގުޅޭގޮތުން މައުލޫމާތު ދެއްވަމުން އެޑިއުކޭޝަން މިނިސްޓްރީގެ މީޑިއާ އޮފިޝަލް ވިދާޅުވީ، އެ ސުކޫލް މިވަގުތު ބޭނުން ކުރަމުން ދަނީ، އަލިފާނުގެ ހާދިސާގެ ސަބަބުން ހާލުގައި ޖެހުނު ފަރާތްތަކުގެ ވަގުތީ ހިޔާއެއްގެ ގޮތުގައި ކަމަށެވެ.
ނީލަން ފިހާރާގައި ރޯވި އަލިފާންގަނޑު މިހާރު ކޮންޓްރޯލް ކޮށްފައިވާއިރު މިހާދިސާގައި އެއްވެސް މީހަކަށް އަނިޔާއެއްވި ކަމުގެ މައުލޫމާތެއް އަދި ލިބިފައެއް ނުވެ އެވެ.
