ޖުމްލަ ފަސް ޓީމުގެ މެދުގައި ކުޅެމުން އަންނަ މި ފުޓްބޯޅަ މުބާރާތުގެ ފައިނަލަށް ޗަކުލީ ޓީމް ދަތުރުކުރީ ޓީމް "ކަންމަތި" އާއި ބައްދަލު ކުރި މެޗުން މޮޅުވެގެންނެވެ.
ދެޓީމުގެ ދެމެދުގައި ވާދަވެރި ކުޅުމެއް ފެނުނު މެޗުން ޗަކުލީ ޓީމް މޮޅުވީ 3 ލަނޑު 2 ލަނޑުންނެވެ. މެޗުގެ މޮޅު ކުޅުންތެރިޔާއަށް ހޮވިފައިވަނީ ޗަކުލީ ޓީމުގެ ޖާޒީ ނަންބަރު 10 އަޙްމަދު ރަޝީދެވެ. މި ނަތީޖާއާއެކު ޗަކުލީ ޓީމްވަނީ މި މުބާރާތުގެ ފައިނަލްގެ ފުރަތަމަ ޖާގަ ކަށަވަރު ކޮށްފައެވެ. އެއީ ކުޅުނު 5 މެޗުންވެސް މޮޅުވެގެންނެވެ.
ފައިނަލްގެ ދެވަނަ ޖާގައަށް ވާދަކުރާ ދެޓީމުގެ ސެމީ ފައިނަލް މެޗް މިއަދު ހަވީރު ކުޅުމަށް ހަމަޖެހިފައި ވެއެވެ. މިއަދު ކުޅޭ ސެމީ ފައިނަލް މެޗުގައި ބައްދަލުކުރާނީ ކުޅުދުއްފުށީ ހިރަފުސް ޓީމާ ޓީމް ކަންމަތި އެވެ. މިދެޓީމް ކުރިން ބައްދަލުކުރި މެޗް ނިމިފައިވަނީ އެއްވަރު ވެގެންނެވެ. އެހެންކަމުން މިއަދު ހަވީރު ކުޅޭ ސެމީ ފައިނަލް ފޯރިގަދަވާނެކަމަށް ބެލެވެއެވެ.
ނޮޅިވަރަމުގެ ދެ ޒުވާނުން އިސްނަގައިގެން ކުރިޔަށް ގެންދާ މި މުބާރާތުގެ ފައިނަލް މެޗް ކުޅުމަށް ހަމަޖެހިފައިވަނީ މިމަހުގެ 12 ވާ ބުރާސްފަތި ދުވަހު އެވެ.
