ރައީސް ނަޝީދު މިހެން ވިދާޅުވީ، އެމްޑީޕީގެ ރިޔާސީ ޕްރައިމަރީގެ ކެމްޕެއިނުގައި ބ. އަތޮޅުގައި ވާހަކަ ދައްކަވަމުންނެވެ. އިންތިހާބުގެ ކެމްޕެއިނުގެ ފޯރި އިންތިހާއަށް ގަދަވެފައިވާއިރު، ރައީސް ނަޝީދު ވިދާޅުވީ، ރައީސް ސޯލިހު ދެވަނަ ދައުރު ނިންމުމަށް ފަހު ގާނޫނުއަސާސީ ބަދަލު ކުރާ ވާހަކަ ވެސް އެ މަނިކުފާނު ދައްކަވާނެ ކަމަށެވެ. އަދި ތިން ވަނަ ދައުރަކަށް އިންތިހާބު ވާން ބޭނުންވުމަކީ ވަރަށް ގިނައިން ފެންނަ މަންޒަރެއް ކަމަށް ވެސް ނަޝީދު ވިދާޅުވި އެވެ.
ރައީސް ނަޝީދު އަންނަނީ ކެމްޕެއިނުގައި ރައީސް ސޯލިހަށް ފާޅުގައި އެކި ގޮތްގޮތުން ފާޑު ވިދާޅުވަމުންނެވެ. ނަޝީދު ވިދާޅުވީ ރާއްޖޭގައި 30 އަހަރު ވެރިކަން ކުރެއްވި ކުރީގެ ރައީސް މައުމޫން އަބްދުލްގައްޔޫމްގެ "މައުމީނީ ސިފަތައް" އެމްޑީޕީގެ ތެރެއަށް ވަންނަން ފަށައިފި ކަމަށެވެ. ނަޝީދު ގެންދަވަނީ ތަކުރާރުކޮށް މި ވާހަކަ ވިދާޅުވަމުންނެވެ.
