ބީއެމްއެލް އަށް 40 އަހަރު ފުރުން ފާހަގަ ކުރުމަށް ކްރޮސް ރޯޑްސް ގައި ބޭއްވި ހަފްލާގައި ވާހަކަ ދައްކަވަމުން ރައީސް ވިދާޅުވި ގޮތުގައި ބީއެމްއެލް އަކީ ރައްޔިތުންގެ އުންމީދުތަކާ ގުޅިފައިވާ ބޭންކެއް ކަމުން ބޭންކުގެ އެންމެ އިސް ވާޖިބަކަށް ވާން ވާނީ އާންމުންނާއި ވިޔަފާރިވެރިންގެ އެކައުންޓުތަކުގައި ބަހައްޓާފައި ހުންނަ ފައިސާ އަމާނާތްތެރިކަމާ އެކު ބަލަހައްޓައި އެ ފައިސާއަށް ރައްކާތެރިވުން ކަމުގައެވެ.
އާންމުންނާއި ވިޔަފާރިތަކުން ބޭންކަށް ކުރާ އިތުބާރު ދަމަހައްޓަން ޖެހޭ ކަން ފާހަގަކުރައްވާ ރައީސް ވިދާޅުވީ ވިޔަފާރިތަކާއި އާންމުން ބޭންކުގައި ބަހައްޓާ ފައިސާ ރައްކާތެރި ކުރުމަށް އިތުރު ހަރުދަނާ ފިޔަވަޅުތައް އަޅަންޖެހޭ ކަމަށެވެ.
ރައީސް ވަނީ ބޭންކުން ވިޔަފާރިވެރިންނަށް ފޯރުކޮށްދޭ ހިދުމަތްތައް މިހާރަށްވުރެ ފަސޭހަކަމާ އެކު ލިބޭނެ އިންތިޒާމުތަކެއް ހަމަޖައްސައިދިނުމަށް އިލްތިމާސްކުރައްވާފައެވެ. އަދި ހަމަ އެއާއެކު، ރާއްޖެ އިން ބޭރުގައި ކިޔަވަން ތިބޭ ކުދިންނަށް ފައިސާ ފޮނުވުމަށް ނުވަތަ ޓީޓީ ހެދުމުގެ އުސޫލު މިފަހުން ހަރުކަށިކޮށްފައިވާތީ އެކަމަށް ލުޔެއް ހޯއްދަވައިދެއްވުމަށް އެމްއެމްއޭ އާއި ބީއެމްއެލްގެ ކިބައިން ރައީސް އެދިވަޑައިގެންނެވިއެވެ.
އާ އަހަރާ އެކު، މަރުކަޒީ ބޭންކުން ބޭންކުތަކަށް ޑޮލަރު ދޫކުރާ މިންވަރު މަދުކުރުމާ ގުޅިގެން ރާއްޖޭން ބޭރުގައި ކިޔަވަން ތިބޭ ކުދިންނަށް ފައިސާ ފޮނުވުން ނުވަތަ ޓީޓީ ހެދުމުގެ އުސޫލު ބީއެމްއެލުން ވަނީ ހަރުކަށިކޮށްފައެވެ.
ބޭންކުގެ އިންތިޒާމުތައް ހަރުދަނާ ކުރުމަށް ރައީސް ގޮވާލެއްވިއިރު، ސްކޭމްތައް ގިނަވެ ބޭންކުގެ އެކައުންޓުތަކުގައި ހުރި އާންމުންގެ އެތައް މިލިއަން ރުފިޔާ އެއް ގެއްލިފައިވާ ކަމުގެ ޝަކުވާތަކަކީ މިފަހަކަށް އައިސް ވަރަށް ގިނަ ބައެއްގެ ކަންބޮޑުވުމާ ގުޅިފައިވާ ކަމެކެވެ.
ދިވެހި ސަރުކާރުން އުފެއްދި ފުރަތަމަ ބޭންކަކީ ބީއެމްއެލްއެވެ. ބޭންކް ހުޅުވާފައިވަނީ 1982 ވަނަ އަހަރުގެ ނޮވެމްބަރު މަހުގެ 11 ވަނަ ދުވަހުއެވެ.
