އެޗްޑީސީން ބުނީ މުދާ އުފުލާ ބަރު އުޅަނދުފަހަރަށް ހާއްސަކޮށްގެން ބީލަމުގެ އުސޫލުން ދޫކުރުމަށް ހަމަޖެހިފައިވާ މި ޖާގަތަކަށް ޝައުގުވެރިވާ ފަރާތްތަކަށް ބީލަން ހުށަހެޅުމުގެ ފުރުސަތު މިހާރު ހުޅުވާލާފައިވާ ކަމަށެވެ.
- ކުއްޔަށް ދޫކުރުމަށް ހަމަޖެހިފައިވަނީ 19 ޖާގައެއް
- ބީލަން ފޯމު ބަލައިގަތުމަށް ހަމަޖެހިފައިވަނީ މި މަހުގެ 31 ވާ އަންގާރަ ދުވަހުގެ 10:00 އާއި 11:00 އާ ދެމެދު
- ބީލަން ފޯމު ހުޅުވުމަށް ހަމަޖެހިފައިވަނީ އެ ދުވަހުގެ 11:00 ގައި
- ފޯމް ބަލައިގަތުމާއި ހުޅުވުން ކުރިޔަށް ދާނީ އެޗްޑީސީގެ އެގްޒިބިޝަން ސެންޓަރުގައި
އެ ކޯޕަރޭޝަނުން ކުއްޔަށް ދޫކުރުމަށް ނިންމާފައިވާ ޕާކިންގް ޒޯނަކީ ހުޅުމާލެ އެމްޕީއެލް ސަރަހައްދު ކައިރީގައި އޮންނަ އެ ފަަދަ އުޅަނދުފަހަރު ޕާކު ކުރާ ޕާކިންގް ޒޯނެއް ކަމަށް އެޗްޑީސީން ބުނެއެވެ.
ކުއްޔަށް ދޫކުރެވޭ ޕާކިންގް ޖާގަތަކުގެ ތެރޭގައި ހިމެނެނީ:
- 40 ފޫޓު ޓްރެއިލާގެ ތިން ޖާގަ
- 20 ފޫޓު ޓްރެއިލާގެ ދެ ޖާގަ
- ޑަމްޕްޓްރަކް ނުވަތަ ލޮރީފަދަ އުޅަނދުތަކަށް ހާއްސަ ކުރެވިފައިވާ 10 ޖާގަ
- ކްރޭން ޕާކު ކުރުމަށް ކަނޑައެޅިފައިވާ 4 ޖާގަ
ޕާކިންގް ޖާގަތައް ކުއްޔަށް ދޫކުރުމަށް ހަމަޖެހިފައިވަނީ ބީލަމުގެ އުސޫލުން އެންމެ މަތިން އަގު ހުށަހަޅާ ފަރާތްތަކުގެ ތަރުތީބުން ކަމަށް އެ ކޯޕަރޭޝަނުން ބުނެއެވެ. އެ ގޮތުން މި ޖާގަތަކުގެ ބީލަން ފެށޭ އަގަކީ އަކަފޫޓަކަށް މަހަކު 12.01 ރުފިޔާ ކަމަށާއި ޖާގަތައް ކުއްޔަށް ދޫކުރުމަށް ނިންމާފައިވަނީ ދެ އަހަރު ދުވަހުގެ މުއްދަތަކަށް ކަމަށް އެޗްޑީސީން ބުނެއެވެ.
މި ޖާގަތައް ދޫކުރުމަށް ހަމަޖެހިފައިވަނީ:
- ހަމައެކަނި މުދާ އުފުލާ ބަރު އުޅަނދުފަހަރު ޕާކިންގް ބޭނުމަށް
- ޖާގަތަކުގައި ޕާކު ކުރެވޭނީ 100 އިންސައްތަ ދިވެހި ވިޔަފާރިއެއްގެ ނަމުގައި، މާލޭ ސަރަހައްދުގައި ދުއްވުމަށް ރަޖިސްޓަރީ ކުރެވިފައިވާ، ހުޅުމާލޭގެ ސިނާއީ މަސައްކަތުގައި ބޭނުންކުރާ ބަރު އުޅަނދުތަކަށް
އުޅަނދުފަހަރު ޕާކު ކުރުމަށް ދިމާވެފައިވާ މައްސަލަތަކަށް ހައްލު ހޯދުމަށް ގިނަ މަސައްކަތްތަކެއް ކުރަމުންދާ ކަން ފާހަގަކޮށް އެޗްޑީސީން ބުނި ގޮތުގައި މިދިޔަ އަހަރުގެ އެޕްރީލް މަހު ޕެއިޑް ޕާކިންގް ޒޯންތަކުން ބީލަމުގެ އުސޫލުން ދެ ޒޯނަކަށް ބަހާލައިގެން 70 ކާރު ޕާކް ކުރާނެ ޖާގަ ދޫކޮށްފައިވާ ކަމުގައެވެ.
އެޗްޑީސީން ބުނީ ހުޅުމާލޭގައި ދިރިއުޅޭ ފަރާތްތަކާއި އެކި ބޭނުންތަކަށް ހުޅުމާލެ އަށް ޒިޔާރާތްކުރާ ފަރާތްތަކަށް އުޅަނދުތައް ޕާކްކުރުމުގައި މިހާރު ދިމާވަމުންދާ ދަތިތަކާއި މަގުތަކުގައި ޕާކުކޮށްފައި ހުންނަ އުޅަނދުތައް މަދުކުރުމަށް ކުރާ މަސައްކަތުގެ ތެރެއިން މިދިޔަ އަހަރު ހުޅުމާލޭގައި ޕާކިންގް ބިލްޑިންގްއެއް ތަރައްގީކުރުމަށް ދަމާސް ކުންފުންޏާ ހަވާލުކުރެވިފައިވާ ކަމަށެވެ.
