ads
ފޯކައިދޫ ސްކޫލުގެ ދަރިވަރުންތަކެއް----ފޮޓޯ: ފޯކައިދޫ ސްކޫލް
"ފޯކައިދޫ ސްކޫލުގައި ދިވެހި ކިޔަވައިނުދޭތާ އަހަރެއް ނުވޭ، ފަތުރަނީ ދޮގު ވާހަކަތަކެއް"
ށ. ފޯކައިދޫ ސްކޫލުގައި ދިވެހި މާއްދާ ކިޔަވައިނުދޭތާ އަހަރެއް ވެފައިވާތީ ގުރޭޑު 10 ގެ ދަރިވަރުން ސްކޫލަށް ދިއުން ހުއްޓާލި ކަމަށް ބުނެ ދެކެވޭ ވާހަކަތައް އެ ސްކޫލުން ދޮގުކޮށްފި އެވެ.

އޯލެވެލް ފެށެން ތިން މަހަށްވެފައިވާއިރު، ގުރޭޑު 10 އަކަށް ދިވެހި މާއްދާ ކިޔަވައިނުދޭތާ އަހަރެއް ވެފައިވާ ކަމަށާއި، ދިރާސީ އާ އަހަރު ފެށުނުއިރު ބޭސްފަރުވާއަށް ދިޔަ ގޮތަށް، ދިވެހި ޓީޗަރު އަދިވެސް ހުރީ އިންޑިއާގައި ކަމަށް ބުނެ ބެލެނިވެރިޔަކާއި ހަވާލާދީ މީޑިއާއަކުން މިއަދު ރިޕޯޓު ކޮށްފައި ވެއެވެ.

އެމައްސަލާގައި ރޭގެ ވަގުތެއްގައި އިހުތިޖާޖުކޮށް، ދަރިވަރުން ސްކޫލަށް ގެންދިއުން މިހާރު ހުއްޓާލާފައިވާ ކަމަށްވެސް ރިޕޯޓުކޮށްފައި ވެއެވެ. 

މިކަމާއި ގުޅިގެން "ސީއެންއެމް" އާއި ވާހަކަދައްކަވަމުން އެރަށު ސްކޫލުގެ ޕްރިންސިޕަލް ޝަމީމް މިއަދު ވިދާޅުވީ، އެއީ އެއްވެސް ހަގީގަތެއް ނެތް ދޮގު ވާހަަކަތަކެއް ކަމަށެވެ. ޝަމީމް ވިދާޅުވީ، ދިވެހި މާއްދާ އެ ސްކޫލުގައި ކިޔަަވައި ނުދޭތާ އަހަރެއް ވެފައި ނުވާ ކަމަށާއި، ދިވެހި މާއްދާގެ ކްލާސްތައް މެދުކެނޑުނީ ހަފްތާ އަކަށް ކަމަށެވެ. އަދި މިހާރު އެކްލާސްތައް އަލުން ފަށާފައިވާ ކަންވެސް އޭނާ ފާހަގަކުރެއްވި އެވެ. 

"ދިވެހި ކްލާސްތައް ނަގައިދިނުން މެދުކެނޑުނީ ހަފްތާއަކަށް. އެއީ ބޭސްފަރުވާއަކަށް ކުއްލިއަކަށް އިންޑިއާ އަށް ދިވެހި ޓީޗަރު ދާން ޖެހުމުން. އެއީ ޓީޗަރަކަސް، ލިބިދެވޭ ހައްގެއް ކަމަށް އަޅުގަނޑު ދެކެނީ. ހަފްތާއެއް ވަރު ވީ. މިހާރު ކްލާސްތަކަށް ހާޒިރުވެ ކްލާސްތައް ނަގައިދެއްވަމުން ގެންދަވަނީ،" ޝަމީމް ވިދާޅުވި އެވެ.

ގާނޫނުތަކުން ކޮންމެ މުވައްޒަފަކަށްވެސް ލިބިދެވޭ ސަލާމް ބުނުމުގެ ހައްގުގެ ތެރެއިން ޓީޗަރު ނެންގެވި ހަފްތާއެއްހާ ދުވަހަކީ، އަހަރު ދުވަސް ކަމަށް ބަލައި ހަގީގަތެއް ނެތް ދޮގު ވާހަކަތަކެއް ފަތުރަނީ، ސިޔާސީ މަގުސަދުތަކެއް ހާސިލުކުރުމަށް ކަމަށް ބެލެވޭ ކަމަށް އޭނާ ވިދާޅުވި އެވެ. 

ޝަމީމް ވިދާޅުވީ، އިމްތިހާން ކައިރިވެފައިވާ ދުވަސްވަރެއްގައި އެންމެ ކްލާހެއް ގެއްލުނަސް އެކަމާއި ބެލެނިވެރިން ކަންބޮޑުވާނެ ކަމަށާއި، އެ ކަންބޮޑުވުންތައް ބެލެނިވެރިން ފާޅުކުރި ކަމަށެވެ. އެކަމަކު، އިހްތިޖާޖުކޮށް، ކިޔަވައިދެމުންދަނިކޮށް ދަރިވަރުން ގޮވައިގެން ބެލެނިވެރިން ގެއަށް ގޮސްފައި ނުވާ ކަމަށާއި، ސްކޫލަށް ގެނައުން ހުއްޓާލާފައިވެސް ނުވާ ކަމަށް ޝަމީމް ވިދާޅުވި އެވެ. 

"އެއްވެސް ހަގީގަތެއް ނެތް ދޮގު ވާހަކަތަކެއް ތިއީ. އަޅުގަނޑަށް ބޮޑަށް ލަފާކުރެވެނީ މިދުވަސްވަރު ސިޔާސީ މަގުސަދުތަކެއް ހާސިލުކުރުމަށް ވަކި ބަޔަކު ދައްކާ ވާހަކަތަކެއް ހެން،" ޝަމީމް ވިދާޅުވި އެވެ.

ޝަމީމް އިތުރަށް ވިދާޅުވީ، ދިމާވާ ކަމެއްގެ ސަަބަބުން ޓީޗަރަށް ސްކޫލަށް ހާޒިރުނުވެވި، އެއްވެސް މާއްދާއެއްގެ ކްލާހެއް ގެއްލޭނަމަ، އެގެއްލޭ ދުވަހެއްގެ ފިލާވަޅުތައް އެ ޓީޗަރަކު ނަގާ ދެއްވާނެ ކަމަށެވެ. ނަމަވެސް ބައްޔެއްގެ ސަބަބުން ސަލާމް ނެންގެވުމަކީ ޓީޗަރަކަށް ނަމަވެސް، ގާނޫނުތަކުން ލިބިދެވޭ ހައްގެއް ކަން ޝަމީމް ފާހަގަކުރެއްވި އެވެ. 

ފޯކައިދޫ ސްކޫލުގެ ގްރޭޑް 10 ގައި ޖުމަލް 30 ކުދިން ކިޔަވަމުން ދެއެވެ. 

14%
ކަމުގޮސްފި
0%
އަޑުއެހިތާ މިހުރީ
29%
ސަތޭކައަކުން ސުމެއް
57%
ވަރަށް ސަލާމް
ކޮމެންޓްސް